هاووڵاتییانی بەڕێز
جەماوەری دڵسۆزی پارتیمان..
بە بۆنەی سەرکەوتنی گەلی کوردستان لە پرۆسەی هەڵبژاردندا کە پێگەی سیاسیی هەرێم و قەوارە سیاسییەکەمان بەهێزتر و ئەزمونە دیموکراتییەکەمان بەرەو پێشتر دەبات، بە ناوی #پارتی دیموکراتی کوردستان#ەوە سوپاسی بێپایان ئاڕاستەی تێکڕای بەشداران و دەنگدەرانی ئەو پرۆسە پیرۆزە دەکەین و هیوادارین ئەنجامەکانی بەخێر و قازانجی کۆی خەڵکی کوردستان بشکێتەوە.
سەرکەوتنی مەزنی لیستی پارتیمان لەم هەڵبژاردنەدا، بەڵگەی هۆشیاری سیاسیی و پابەندیی جەماوەری گەلەکەمانە بە ڕێبازی ڕاستەقینەی کوردایەتی و نیشتمانپەروەری، پاداشتێکی میللی فروانە بۆ هەڵوێستە نەتەوەیی و نیشتمانییەکانی پارتی، بۆ داکۆکی سەرسەختانەی پارتی لە دەستکەوت و مافە ڕەواکانی خەڵکی کوردستان. وەفادارییە بۆ #پێشمەرگە# قارەمانەکان و بۆ ئەو پارتە خۆڕاگرەی لە ڕۆژە سەختەکانی قەیران و ناڕەحەتیدا شانی دایە بەرمەسئولیەت و قەوارەی سیاسیی کوردستانی لە جۆرەها هەڕەشە و پیلان پاراست و لە ئاست فشار و پڕکێشییەکاندا خۆی نەچەماند.
گەلی کوردستان بە نوێکردنەوەی متمانە بۆ پارتی، دەریخست کە کوردستانێکی بەهێزی دەوێت، ئارامی و ئاساییش و سەقامگیریی سیاسی دەوێت، ئاوەدانی و پێشکەوتن و خۆشگوزەرانی دەوێت، ئەو ئامانجانەش بە پارتییەکی بەهێز و پێشڕەو دێنەدی.
ئێمە لە کاتێکدا سڵاو و دەستخۆشی بۆ یەک بە یەکی کادیر و ئەندامانی پارتیمان و جەمارە دڵسۆز و کۆڵنەدەرەکەی و کۆی خەڵکی کوردستان دەنێرین، هەموو لایەک دڵنیا دەکەینەوە کە لە ئاستی دەنگ و متمانەی گەل دەبین و خواست و ئیرادەی ئەوان لە پێکهێنانی حکومەتێکی تۆکمە و مونسەجیم و بەهێز و یاساپەروەر و خزمەتگوزاردا بەرجەستە دەکەین.
هەموو هەوڵ و تواناکانمان بۆ ئەجردانەوەی ئەم گەلە خۆڕاگر و قوربانیدەرە تەرخان دەکەین.
هەر لەم بۆنەیەدا، سەرەڕای سەرنج و تێبینیمان لەسەر بەڕێوەچوونی پرۆسەکە لەهەندێ ناوچە، جارێکی دیکە پەیامی یەکڕیزی و یەکدەنگیی دووپاتدەکەینەوە و بە هیواین هەموو لایەکمان دەست بدەینە دەستی یەکدی و بەرژەوەندی و سوودی گەلەکەمان لەسەروو هەر ئیعتبارێکی دیکەوە دابنێین و خزمەتی خەڵک و هەرێمەکەمان بکەینە ئەولەویەت.
جارێکی دیکە پیرۆزبایی گەرمی خۆمان ئاڕاستەی گەلی کوردستان و جەماوەری پارتیمان و لە پێش هەموانیشەوە ئاڕاستەی بنەماڵەی سەربەرزی شەهیدان و پێشمەرگە قارەمانەکان دەکەین.
پیرۆزبایی تایبەتمان ئاراستەی سەرۆک بارزانی دەکەین کە لە شەڕ و ئاشتیدا دلێرانە ڕابەرایەتی کاروانی خەباتی پارتیمان دەکات و هەموومان لە ورەی بەرزی ئەو هێزی خۆڕاگری و وانەی کۆڵنەدان فێردەبین.
هەزاران سڵاو لە گیانی پاکی باوکی کورد و دامەزرێنەری پارتیمان مستەفا بارزانی نەمر و کاکە ئیدریسی هەردەم لە یاد
هەزاران سڵاو بۆ گیانی پاکی شەهیدە نەمرەکانمان
بژی کورد.. بژی کوردستان
مەکتەبی سیاسی پارتیی دیموکراتی کوردستان
#22-10-2018#