نووسینی: کاوە تەیب جەلال
(چاپی یەکەم 2017)
لە بڵاوکراوەکانی #دەزگای ئایدیا بۆ فکر و لێکۆڵینەوە#
هەڵبەتە کەرتبوون زیاتر بە دەربڕینە عەرەبییەکەی ناسراوە (ئینشیقاق)، کە بە مانای درز کەوتنە شتێکەوە دێت و لە کایەی سیاسییدا بۆ درزکەوتنە ناو پارت و ڕێکخراوەکانەوە بەکاردێت، یەکێکە لە ڕووخسارەکانی ململانێی سیاسی نێوان پارتە سیاسییەکان لە هەر جێگەیەکی جیهاندا بێت. ڕاستە کەرتبوون لەناو زۆربەی پارتە سیاسییەکانی جیهاندا بۆتە دیاردەیەکی زەق و بەرچاو، بەڵام مەرج نییە هەمیشە مانایەکی نەرێنیی هەبێت، بەڵکو دەشێت هەندێک جار مانای ئەرێنیشی هەبێت. بەڵام ڕاستییەکی تاڵ هەیە دەبێت دانی پێدا بنێین، زۆرینەی کەرتبوونەکانی خۆرهەڵاتی ناوەڕاست بە گشتی و کەرتبوونی نێو پارتە کوردییەکان بەتایبەتی، زیاتر ڕووخسارە نەرێنییەکەی دەبینرێت. کەرتبوون یەکێکە لە قۆناغەکانی ململانێی سیاسی یاخود کێشەی ناوخۆیی حزب، وەک چۆن چەندین قۆناغی دیکە هەیە. ئەم توێژینەوەیە بەدیاریکراوی قۆناغێکی مێژوویی هەڵبژاردوە بۆ سەرنجدان لە کەرتبوونی نێوان پارتەکان و هۆکار و زەمینەیان، ئەویش قۆناغی نێوان ساڵانی (1976- 1988)ە. توێژەر لەم توێژینەوەیەدا زۆر بە وردیی سەرجەم فاکتەرە ناوخۆیی و دەرەکییەکانی پەیوەست بە کەرتبوونی نێوان پارتە سیاسییەکانی لێکداوەتەوە، بەتایبەت کەرتبوون لەنێو پارتە سەرەکییەکانی وەک (پارتی دیموکراتی کوردستان) و (یەکێتیی نیشتیمانیی کوردستان) و هەر یەک لەو پارت و ڕێکخراوانەی لەم دوو پارتەوە سەریانهەڵداوە. [1]