31 ساڵ لەمەوبەر، ڕۆژی 7 پووشپەڕ، لە جەنگەی شەڕی ئێران- عێڕاق دا، شاری #سەردەشت# و دەورووبەری لە لایان فڕۆکە شەڕکەرەکانی عێڕاقەوە بۆردومانی کیمیایی کرا. گیان لە دەسدان و بریندار بوون و ماڵوێرانیی ژمارەیەکی بەرچاو لە دانیشتوان، قوربانیی و ئاکامەکانی ئەو کردەوە دژی مرۆڤییە بوو.
لە سێ دەیەی پێشوودا تاران، هەرگیز جێگا و بایەخی شیاوی بە کیمیابارانی شاری سەردەشت نەدا؛ چوونکە سەردەشت کوردستانه و تاران نەیویستووە ئه و تاوانە بکەوێتە بەر سەرنج و بەدواداچوونی کۆمەڵگای نێودەوڵەتی. هاوکات گرووپەکانی بەناو ئۆپۆزیسیۆنی ئێرانیش، قەت ئاوڕیان لەو ڕووداوە نەدایەوە، لەبەر ئەوەی مەبادا، تمامیت ارضی ئێران و سەروەریی تاران لە سەر کوردستان، لاواز ببێت.
لە 500 ساڵی ڕابوردوودا کردنی خاکی کوردستان بە گۆڕەپانی شەڕی دەوڵەتان وژێنۆساید و کوشتاری بێبڕانەوەی کورد، ئه و ڕاستییەی سەلماندووە کە نەبوونی دەوڵەت و سەروەریی سیاسیی، دەرفەتی خوڵقاندنی ئەم تاوانانەی بە داگیرکەرانی کوردستان و بێدەنگی کۆمەڵگای نێودەڵەتیی و ڕێکخراوەکانی داوە.
بۆیە پارتی ئازادیی کوردستان لەم بۆنە خەمناکەدا، جارێکی دیکە ڕاشکاوانە و بەپانەوە پێ لە سەر دیسکۆرسی دەوڵەت و سەربەخۆیی دادەگرێتەوە و ڕۆڵەکانی نەتەوەکەمان له و ڕاستییە ئاگا دەکاتەوە کە جێگۆڕکێی نێوان دەستە و تاقمەکانی نەتەوەی سەردەستی فارس لە ئێران و بوونە دەستەچیلە بۆ هاتن و چوونی ئەم تاقم و ئه و تاقمی دەسەڵاتدار یان ئۆپۆزیسیۆن بە تەمای تراویلکەی “دیمۆکراسی بۆ ئێران و فیدڕالیزم بۆ کوردستان”، تەنیا دەرفەت ڕەخساندنە بۆ بەردەوامیی سەروەریی نەتەوەی فارس وبە هەدەردانی هێز و توانای کورد.
لە31 هەمین ساڵوەگەری کیمیابارانی سەردەشت دا، پارتی ئازادیی کوردستان وێڕای دەربڕینی هاوخەمی لەگەڵ زیان دیتووانی ئه و ڕووداوە، خوازیاری ئەوەیە کۆمەڵگای نێودەوڵەتی بە دواداچوونی شێلگیرانەی بۆ بکا و میراتگرانی دەوڵەتی عێراق ئەرکدار بکا بە قەرەبوو کردنەوەی دڵسووتاوان وزیان لێکەوتووانی ئه و تاوانە، هاوکات بە ئیرادەیەکی بە هێزەوە درێژە بە خەبات لە پێناو دەرچوون لە تەوقی سەروەریی تاران و گەیشتن بە سەربەخۆیی و بەدەوڵەتکردنی کوردستان دەدا.
پارتی ئازادیی کوردستانPAK
6 پووشپەڕی 2718
#27-06-2018#