ئەمڕۆ 1/7/2018، لە دیوانی پارێزگای #سلێمانی#دا؛ پارێزگاری سلێمانی سەرپەرشتیی کۆبوونەوەی لیژنەی باڵای ئارامیی پارێزگای سلێمانی کرد، لە کۆبوونەوەکەدا بەوردیی باس لە بارودۆخی ئاسایش و ئارامیی پارێزگاکەو هەرێمی کوردستان و ناوچەکە کراو، سوپاسی هاووڵاتیان و هەموو فەرمانگەو لایەنە پەیوەندیدارەکان کرا کە بە دڵسۆزانەو گیانێکی بەرپرسانەو نیشتمانییانەوە ئەرکەکانی خۆیان جێبەجێ‌ کردووە.
لەپێناوی پاراستنی ئارامیی و ئاسایشی هاووڵاتیان و پارێزگاکەشماندا بڕیاردرا بە:
یەکەم: بەردەوامبوونی لیژنەی هاوبەشی هێزەکانی ناوخۆ کە پێشتر بەفەرمانی پارێزگار پێکهێنراون، بۆ بنەبڕکردنی تاوان و دیاردەی چەکداریی و ئۆتۆمبێلی بێ‌ ژمارەو بێ‌ مۆڵەت و هەر سەرپێچییەکی تر.
دووەم: بەردەوامبوونی هەماهەنگیکردنی لیژنەی ئارامیی شاری سلێمانی و لیژنەکانی قائیمقامییەتی سلێمانی و لایەنە پەیوەندیدارەکانی تر بۆ جێبەجێکردنی ئەو ڕێنماییانەی بۆ قەدەغەکردنی دیاردەی سەرپێچیکردن و زیادەڕەویی و خراپیی کوالێتیی و سواڵکردن و تێکدانی نەزمی گشتیی و هەر دیاردەیەکی نەخوازراوی تر پێکهێنراون.
سێیەم: دەستگیرکردنی هەموو ئەو گومانلێکراوانەی لەلایەن دادگاوە داواکراون.
چوارەم: هەر کەسێکی بیانیی کە مۆڵەتی مانەوەی لە هەرێمی کوردستاندا پێدراوە؛ پێویستە سێ‌ مانگ جارێک پشکنینێکی تەندروستیی ڕەسمیی بکات و بەپێچەوانەوە خۆیشی و ئەو شوێنەیشی کاری تێدادەکات بەرپرسیار دەبن.
پێنجەم: هێزەکانی لیوای یەکی پاراستنی سلێمانی و پۆلیسی بەرگریی و فریاکەوتن، هاوکارو هەماهەنگی هێزەکانی ناوخۆو ئاسایش دەبن بۆ ڕێگرتن لە هەر زیادەڕەویی و سەرپێچیکردن و هەر دۆخێکی پێویست؛ بەپێی ڕێنمایی پارێزگاری سلێمانی.
شەشەم: بەڕێوەبەرایەتیی بەرگری شارستانیی پارێزگای سلێمانی، هەموو تیمەکانی ئامادە دەکات بۆ هەر حاڵەتێکی نەخوازراوو ئاگرکەوتنەوەیەک، لەم بارەیەوە ڕێنمایی پێویست پێشکەش بە هاووڵاتیان و فەرمانگەو کۆمپانیاکان دەکات.
حەوتەم: بەڕێوەبەرایەتیی پۆلیسی دارستان و ژینگەی پارێزگای سلێمانی، ڕێگریی لە هەر حاڵەتێکی بیرهەڵکەندنی نایاسایی دەکات و بەپێی یاساو لەبەر ڕۆشنایی ڕێنماییەکانی پارێزگاری سلێمانیدا؛ مامەڵە لەگەڵ ئەم دۆسیەیەدا دەکات، هەروەها بەوردیی ڕێنماییەکانی پەیوەست بە پاراستنی دارستان و ژینگەو ڕاوکردن جێبەجێ‌ دەکات.
هەشتەم: ڕێکخستنەوەی گرتوخانەکان و نەهێشتنی هیچ جیاوازیی و جیاکارییەک و چاودێریکردنی وردی شێڵتەرو خانەو گرتوخانەو دامەزراوە کۆمەڵایەتییەکانی تر.
نۆیەم: پێویستە هەموو یەکە کارگێڕییەکانی سنووری پارێزگای سلێمانی، لەگەڵ بڵاوکردنەوەی ئەم ڕاگەیەندراوەدا، بڕیارو ڕێنماییەکانی لیژنەی باڵای ئارامیی پارێزگای سلێمانی جێبەجێبکەن.
دەیەم: لیژنەی باڵای ئارامیی پارێزگای سلێمانی لەچوارچێوەی کۆبوونەوەکانی سەروەریی یاسادا؛ لەگەڵ بەڕێزان سەرۆکی دادگاکان و داواکاری گشتیی و دادوەرەکاندا کۆدەبێتەوە، بەمەبەستی دانانی چێوەیەکی یاسایی پتەو بۆ چەسپاندنی یاساو سزادانی تاوانباران.
یانزدەیەم: ڕێکخستنەوەی شوێن و دامەزراوە گەشتیارییەکان و شوێنە گشتییەکان بەپێی ڕێنماییەکانی پێشووی لیژنەی باڵای ئارامیی پارێزگای سلێمانی.
دوانزدەیەم: تیمی فریاکەوتنی هاوبەش بۆ شوێنە گەشتیاریی و گشتییەکان پێکدەهێنرێن.
سیانزدەیەم: هەموو ئەم بڕیارو ڕێنماییانە بەبێ‌ جیاوازیی و گوێدانە پلەو پایەو پۆستی کەسە سەرپێچیکەرەکان، جێبەجێدەکرێن.
چواردەیەم: پارێزگاری سلێمانی؛ پشتیوانیی و هاوکاریی پێویست پێشکەش بە هەموو فەرمانگەو لایەنە پەیوەندیدارەکان دەکات بۆ باشتر بەڕێوەچوونی کارەکانیان‌.
لیژنەی باڵای ئارامیی پارێزگای سلێمانی سوپاسی بڕیارو دەستپێشخەرییەکەی فەرماندەیی گشتیی هێزی پێشمەرگەی کوردستان و دامەزراوەکانی تر دەکات، کە پشتیوان و جێبەجێکاری بڕیارو ڕێنماییەکانی پارێزگاری سلێمانی و لیژنەی باڵای ئارامیی پارێزگای سلێمانی دەبن.[1]
#01-07-2018#