کۆمیسیۆنی باڵای هەڵبژاردنەکانی عیراق ڕایدەگەیەنێت، کە هەموو ئامادەکارییەکانی هەڵبژاردن تەواوکراوە و ڕۆژی 12ی مانگی داهاتوو هەڵبژاردنی ئەنجومەنی نوێنەران بەڕێوەدەچێت، ئەوەشی خستووەتەڕوو، کە 503 کاندید لە هەرێمی کوردستان، کێبڕکێ لەسەر 43 کورسی ئەنجومەنی نوێنەرانی عێراق دەکەن.
کاتژمێر 11:00ی پێشنیوەڕۆی ئەمڕۆ، لە ئۆفیسی هەرێمی کوردستانی دەستەی سەربەخۆی هەڵبژاردنەکان لە عێراق لە شاری هەولێر، لەبارەی بەشداریکردنی ژن لە هەڵبژاردنەکان، کۆنگرەیەکی ڕۆژنامەنووسیی بۆ مازن عەبدولقادر، سەرۆکی ئۆفیسی هەرێمی کوردستانی کۆمیسیۆنی باڵای هەڵبژاردنەکانی عیراق و پەخشان زەنگەنە، ئەمینداری گشتیی ئەنجومەنی باڵای کاروباری خانمان لە حکومەتی هەرێم بەڕێوەچوو.
لەبارەی ئامادەکارییەکان بۆ هەڵبژاردن، مازن عەبدولقادر ڕایگەیاند: ئێمە تەواوی ئامادەکارییەکانمان بۆ بەڕێوەچوونی هەڵبژاردنەکان لە هەرێمی کوردستان تەواوکردووە.
ڕاشیگەیاند، کە لەمڕۆوە بانگەشەی هەڵبژاردن دەستیپێکردووە و داوا لەسەرجەم لایەن و لیستەکان دەکەین ڕێنماییەکانی بانگەشە بپارێزن و پێشێلکاری ئەنجام نەدەن.
هەر لەکۆنگرە ڕۆژنامەنووسییەکەدا، بەخشان زەنگە، ئەمینداری گشتیی ئەنجومەنی باڵای کاروباری خانمان لە حکومەتی هەرێم وتی: دەبوو حزبەکان کاندیدی زیاتر دیاریبکەن بۆ ئەوەی پێگەی ژن لە ناوەندەکانی بریار و پەرلەمان زیاتر بێت، تاوەکو بتوانن داوای مافە ڕەواکانی ئافرەتان بکەن.
هەروەها وتیشی: نابێت هیچ لایەنێکی سیاسیی بۆ مەرامی تایبەتی خۆی قسەی ناڕەواو تەشهیر بەرامبەر بە کاندیدی ژن قبوڵ بکات.
بەپێی ئامارەکانی کۆمیسیۆن، لە هەرێمی کوردستان 3 ملیۆن و 144 هەزار دەنگدەر بوونیان هەیە، کە بەپێی یاسا 25 قەوارە لە سنووری هەرێمی کوردستان بەشداری دەکەن و پێکهاتوون لە 19 حزب و 4 هاوپەیمان و 2 کاندیدی سەربەخۆ.
لە کۆی ئەو لیستانە، 503 کەس لە هەرێمی کوردستان خۆیان کاندید کردووە، لەو ژمارەیەش 357 کاندیدیان پیاون و 146 کاندیدیشیان ژنن، بەپێی ئەو بڕگە یاساییەی کە لە یاسای هەڵبژاردنەکانی عێراقدا دیاریکراوە، دەبێت نوێنەرایەتیی ئافرەتان لە پەرلەمان لەسەدا 25 کەمتر نەبێت، هەموو ئەو کاندیدانەش لەسەر 46 کورسی پەرلەمانیی بۆ هەرسێ پارێزگاکەی هەرێمی کوردستان کێبڕکێ دەکەن.
لەم هەڵبژاردنانەدا، پارێزگای هەولێر 16 کورسی و پارێزگای سلێمانی 17 کورسی و پارێزگای دهۆک 12 کورسی بۆ دیاریکراوە، کە دوو کورسییان پشکی کەمینە ئایینییەکانە.
لە سەرتاسەری هەرێمی کوردستاندا، 173 بنکەی دابەشکردنی کارتی دەنگدان هەیە و تاوەکو ئێستا بنکەکان کراوەن، هەموو ئەوانەی کە لە ساڵی 2014وە تۆماری بایومەترییان کردووە، دەتوانن کارتەکانیان وەربگرنەوە، ئەوانەی تریش لە ڕێگای کارتە کۆنەکانی ساڵی 2014وە دەنگ دەدەن، بەڵام هیچ دەنگدەرێک بەبێ کارتی فەرمی دەنگدان مافی دەنگدانی نابێت.[1]
#15-04-2018#