بەناوی خوای گەورە و میهرەبان
لە ئێستادا هاوڵاتیانی هەرێمی کوردستان بە سەختترین بارودۆخی ژیان و بژێویاندا تێپەڕدەبن بەهۆی ئەو مافیایانەی دەستیانگرتووە بەسەر دەسەڵات و داهاتی هەرێمدا. ماوەی چەند ڕۆژێکیشە هەزاران فەرمانبەر و مامۆستا لەهەرێمی کوردستان خۆپیشاندان دەکەن و داوای موچە و مافەکانیان دەکەن کە لەلایەن دەسەڵاتەوە لێیان زەوتکراوە. بەڵام حکومەتی هەرێم و سەرۆکەکەی بێ ئەوەی هەست بە شەرمەزاری بکات بەدوور لە گرنگییەوە باس لە مافی فەرمانبەران و مامۆستایان و داواکانیان دەکات و لەبری ئەوەی باس لە هێرش و هەڵمەتی دەستگیرکردنی مامۆستایان و فەرمانبەران و ڕۆژنامەنوسان و ئافەرەتان و پیر و گەنجان دەکات و وەک کارێکی ئاسایی سەیریی دەکات.
جەنابی برازاکەی بارزانی، ئەڵێی بیرتان چووەتەوە کە زەین ئەلعابدین سەرۆکی تونس یەکەم پریشکی شۆرشی ئیهمالکرد و بە سوکییەوە سەیریکرد کە بوعزێزی بوو، بەڵام دواتر ناچار بوو بە پەلە ڕابکات و وڵات بەجێبهێڵێت. ئەی قەزافیت بیرچووەوە کە بە میللەتەکەی دەوت زەنگە زەنگە دواتان دەکەوین بەڵام بە قۆندەرەی میللەتەکەی کوژرا و لەناوبرا. بەسە خۆبەزلزانینتان بەسەر میللەتەوە، ئەو میللەتەی کە لە کەرەج بوون لە ئێران خزمەتیدەکرن و کە گەڕانەوە لەدوای ڕاپەڕین خزمەتی دەکردن، بێڕێزی بەرامبەر کەرامەتی میللەت و تواناکانیان مەکەن بۆ قڵپکردنەوەی مێزەکە بەسەرتاندا.
لێرەوە داوا لەسەرۆک وەزیرانی فیدراڵ دەکەم کە ڕۆڵی خۆی بگێڕیت لە پاراستی هاوڵاتیانی هەرێمی کوردستان و مامەڵە لەگەڵ سەرۆکی حکومەتی هەرێم و جێگرەکەی نەکات تا کاتی هەڵبژاردنی پەرلەمانی نوێی هەرێمی کوردستان، وە لە بری ئەوە مامەڵە لەگەڵ پارێزگاکان بکات چونکە حکومەتی هەرێمی کوردستان ئێستا شەرعییەتی نەماوەو دوژمنی گەلی کوردە.
#سروە عەبدولواحید# - ئەندامی ئەنجومەنی نوێنەرانی عێراق
#29-03-2018#