دواڕۆژ، #عیسا عەبدولقەهار#
#وەزارەتی بازرگانی# و پیشەسازی هەرێمی کوردستان ئاماری هاوردەکردنی ئۆتۆمبێلی چوار ساڵی ڕابردووی ڕاگەیاند و بەپێی ئامارەکەش سەرەڕای قەیرانی دارایی، بەڵام هاوردەکردنی ئۆتۆمبێل بەرێژەی 64% زیادیکردووە.
دوێنێ سێشەممە 2ی کانوونی دووەمی 2018، وەزارەتی بازرگانی و پیشەسازی هەرێم ئاماری ساڵی 2017 و سێ ساڵی ڕابردووی هاوردەکردنی ئۆتۆمبێلی ئاشکراکرد.
بەپێی ئامارەکە، لە ماوەی ساڵانی 2014 و 2015 و 2016دا زیاتر لە 300 هەزار و ساڵی 2017_ش 60 هەزار ئۆتۆمبێلی جۆراوجۆر لە دەروازە سنوورییەکانی هەرێمی کوردستانەوە هاوردە کراون.
وەزارەتی بازرگانی و پیشەسازی، ئاماژەی بەوەشکردووە زۆربەی ئەو ئۆتۆمبێلانە بۆ ناوچەکانی ناوەڕاست‌ و باشووری عیراق نێردراون، بەڵام سەرجەمیان لەلایەن بەڕێوەبەرایەتی هاتوچۆی هەرێمەوە تۆمارکراون.
لەبارەی ڕێژەی زیادکردنی هاوردەکردنی ئۆتۆمبێل لە ساڵی 2017، وەزارەتی بازرگانی ئاشکرایکردووە بەهۆی قەیرانی داراییەوە هاوردەکردنی ئۆتۆمبێل لەساڵی 2016دا بەرێژەی 74% کەمیکردووە، بەڵام لەساڵی 2017دا بەریژەی 64% زیادیکردووە.[1]
#03-01-2018#