بەشی ڕاگەیاندن و پەیوەندییەکانی کۆمپانیای #ئاسیاسێڵ#، ڕاگەیێندراوێکی بڵاوکردەوە و لە بەشێکی ئەو ڕاگەیێندراوەدا هاتووە ئاسیاسێڵ تاوەکو ئێستا نزیکەی پێنج تریلیۆن دیناری داوە بە حکومەت، وەکو کرێی مۆڵەت و هەموو جۆرەکانی باج و بڕەپارەی فەرمی دیکە.
لەو ڕاگەیێندراوەدا کە وێنەیەکی بۆ تۆڕی میدیایی ڕووداوی نێردراوە، باس لەوە کراوە، کاری کۆمپانیاکانی مۆبایل بەپێی یاسا لەلایەن کۆمیسیۆنی ڕاگەیاندن و گەیاندنی عێراقی رێکخراوە.
هەر لە ڕاگەیێندراوەکەدا ئاماژە بەوەشدراوە، مۆڵەتی کارکردنیان لەلایەن کۆمیسیۆنی ڕاگەیاندن و گەیاندنی عێراقییەوە پێدراوە و نووسراویشە ئاسیاسێڵ یەکێکە لەو کۆمپانیایانە کە هەڵدەستێت بە دانی باجی داهات بە دەستەی گشتی باجەکان و تاوەکو ئێستاش نزیکەی پێنج تریلیۆن دیناری داوە بە حکومەت، وەکو کرێی مۆڵەت و هەموو جۆرەکانی باج و بڕەپارەی فەرمی دیکە.
ئاسیاسێڵ یەکێکە لەو سێ کۆمپانیایەی مۆبایل کە لەسەر ئاستی عێراق مۆڵەتی کارکردنی هەیە و زیاتر لە 12ملیۆن بەشداربووی لە سەرتاسەری عێراقدا هەیە.
ئەو ڕاگەیێندراوەی کۆمپانیای ئاسیاسێڵ، لەکاتێکدایە کە ڕۆژی دووشەممە 9-10-2017 ئەنجوومەنی ئاسایشی نیشتمانی عێراق بە سەرۆکایەتیی حەیدەر عەبادی سەرۆک وەزیرانی عێراق کۆبووەوەو بەگوێرەی ڕاگەیێندراوێک، بڕیاردراوە سەرجەم تۆڕەکانی مۆبایل بخرێنە ژێر دەسەڵاتی حکومەتی ناوەند و بگوازرێنەوە بۆ بەغدا.[1]
11-10-2017