رێڤەبەرێ شەهید و ئەنفالکریان ل پارێزگەها #دهۆک# ئاشکرا کر، بەرهەڤیێن تەمام هاتینە کرن بۆ بەلاڤەکرنا پارچێن ئەردی ل سەر خێزانێن شەهیدێن شەرێ داعش و پتر ژ 600 پارچێن ئەردی دێ ل سەر خێزانێن شەهیدان هێنە بەلاڤەکرن.
رەجەب ئیبراهیم جاسم ڕێڤەبەرێ گشتیێ شەهیدان و ئەنفالکریان ب وەکالەت بۆ (باس) گۆت: پێشترژی و نوکەژی، پارێزگەها دهۆک بوویە پایتەختێ شەهیدان، شەهیدێن شەرێ داعش 615 شەهیدین و نێزیکی 45 خوبەخشانە کو پێنچ ژ خوبەخشان ژ ئەورۆپا هاتبوون و چەکێ شەرەفێ هەلگرتبوو، مل ب ملی پێشمەرگەیڤە شەر کرینە و هەتا هاتینە شەهیدکرن و دیسا سەردەری ل گەل شەهیدێن شەرێ داعش دهێتە کرن وەک شەهیدێن پێشتر وەک ناڤ و ئمتیازات، وەک پارچا ئەردی دێ وەرگریت و دیسا کور و کچێنا وان ژ باغچێ زارۆکان هەتا دگەهیتە پەیمانگەه و زانکۆیان دێ ل سەر کیستێ حوکمەتێ بەردەوامیێ دەنە خواندنا خوە.
زێدەتر گۆت: ل دووڤ زانیاریێن مە ل دەمێ شەهیدبوونێ ژی هەتا 15 ملیون دیناران وەک پارێزگەه و پەرلەمانێ کوردستانێ بۆ هەر خێزانەکێ هاتینە تەرخانکرن، دیسان ل نەخۆشخانێن ئەهلی دەمێ نەخۆشەکی سەرەدانێ بۆ دکەت و نشتەگەریان ئەنجام بدەت ڕێژەکا هەرە باش ژ پارەی دهینە خوارێ، دیسا نەخوشخانەک شەهیدان هەیە و ئه و بۆ خێزانێن شەهیدان بێ بەرامبەرە و ئەڤ جۆرە نەخوشخانە چار ل پارێزگەها دهۆک مە هەنە.
گۆتژی: ”زور سوپاس بۆ کومەلگەها ڕۆژ یا نوشداری و د. زەیا وەک گرێبەستەکێ ل گەل مە گرێ دا و بۆ ماوێ شەش هەیڤا خێزانێن شەهیدێن شەرێ داعش خزمەتێن نوشداری بۆ دکرن و بێ بەرامبەر و دیسا پشتی شەش هەیڤان ژی بەردەاومی دایی کو هەتا شەر ب دووماهی بهێت، دیسا زور سوپاس بۆ دەزگەهێ خێرخوازێ بارزانی و دەزگەهێ ڕەوانگە و دیسا سەنتەرێ لاف ژی ڕولەکێ بەرچاڤ هەبوویە، دەزگەهێ خێرخوازێ بارزانی بۆ زارۆیێن شەهیدان ئەگەر کێمتر ژ 18 سالیێ هەبن مۆچەکی ژی هەر چەند هەیڤان بۆ تەرخان دکەت.
رێڤەبەرێ شەهیدان زێدەترژی گۆت: ل سالێن 2014 و 2015 کچ و کورێن شەهیدان ئەوێن د خواند ل سازیێن ئەهلی (520) بووینە و هەموو مەزاختی ب ستوویێ حکومەتا هەرێما کوردستانێ بوون و هەتا هاتن و چوونژی.
رێڤەبەرێ گشتیێ شەهیدان و ئەنفالکریان ل پارێزگەها دهۆک ئەوژی گۆت: داخاز دکەین هندەک جهێن وبەرهێنانێ بۆ خێزانێن شەهیدان بهێنە تەرخانکرن و بیتە داهاتەک بۆ کەسوکارێن شەهیدان و ئەڤە دێ بیتە بارسڤکی بۆ حوکمەتێ ژی و دیسا دێ زووتر خزمەت گەهیتە خێزانێن شەهیدان، هەتا نوکە مە چو داهات وەک ڕێڤەبەریا گشتی یا شەهیدان و ئەنفالکریان نینە کو بشێن خزمەتا خەلکێ خوە بکەین. [1]
19-09-2017