وەزیری ئاوەدانکردنەوە و نیشتەجێکردنی هەرێم ڕایدەگەیەنێت: دوو هەزار یەکەی نیشتەجێبوون لە #شنگال# دروست دەکەین و کار بۆ ئاوەدانکردنەوەی ئەو ناوچە کوردستانیانەش دەکەین، کە لەژێر دەستی #داعش# ڕزگار کراون.
35 وڵات ئامادەییان دەربڕیوە
#دەرباز کۆسرەت ڕەسوڵ# وەزیری ئاوەدانکردنەوە و نیشتەجێکردنی هەرێم لە لێدوانێکیدا بۆ ئاژانسی ئەنادۆڵ ڕایگەیاندوە: بەشێکی زۆر لە ناوچە کوردستانیەکانی دەرەوەی ئیدارەی هەرێم، بەهۆی شەڕی داعشەوە وێران بوون، بەڵام بەهۆی قەیرانی داراییەوە هیچ بودجەیەکمان بۆ ئاوەدانکردنەوەی ئەو ناوچانە نییە و هەرکاتێکیش دۆخی دارایی باشتر بێت، ڕاستەوخۆ دەست دەکەین بە تەواوکردنی ئەو پڕۆژانەی کە بە نیوەچلی بەجێماون.
وتیشی: (#حکومەتی هەرێم# لەگەڵ بانکی نێودەوڵەتی و نەتەوە یەکگرتووەکان لە گفتوگۆی بەردەوامدایە بۆ ئاوەدانکردنەوەی ئەو ناوچانەی بەهۆی جەنگەوە وێران بوون، هەروەها زیاتر لە 35 وڵاتیش ئامادەییان دەربڕیووە بۆ هاوکاریکردنی عیراق، بەڵام تائێستا سندوقی دووبارە ئاوەدانکردنەوەی عیراق تەمویل نەکراوە، بڕیاریشە ئەڵمانیا قەرزێکی 500 ملیۆن دۆلاری بداتە عیراق بۆ پڕۆژەکانی بواری ئاوەدانکردنەوە، لەو قەرزەش بەشی کوردستانی تێدایە).
-سندوقی ئاوەدانکردنەوەی عیراق
وەزیری ئاوەدانکردنەوە و نیشتەجێکردنی هەرێم ئاشکراشیکرد: حکومەتی هەرێم پلانێکی تایبەتی بۆ شارۆچکەی شنگال هەیە، ئەویش جگە لە ئاوەدانکردنەوەی قوتابخانە و نەخۆشخانەکان، لە پلانیدایە بۆ ساڵی 2018 زیاتر لە دوو هەزار یەکەی نیشتەجێبوون بۆ دانیشتوانی شنگال دروست بکات، تا بە ئارامی تێیدا بژین، بۆ جێبەجێکردنی ئەم پلانەش حکومەتی هەرێم هەماهەنگی لەگەڵ سندوقی ئاوەدانکردنەوەی عیراق کردوە و ئومێد دەکەین ساڵی داهاتوو بکەوێتە بواری جێبەجێکردنەوە.
ماڵپەڕی کوردستانی نوێ: 08-08-2017