کوردو دیموکراسی
بابەت: گێرانەوە
نووسینەوەی: خالید حسەین
لە هەشتاکان #مام جەلال# سیمینارێک دەگێڕێ باس لە سیستەمی دیموکراسی دەکات کە ڕۆژئاوا و ئەوروپییەکان پیادەی دەکەن و دایمە گوێ لە ڕای زۆرینە دەگیرێت، لە کاتی پرسیارو وەڵاما #مام ڕۆستەم# پرسیاری ئەوە دەکات کە چەند هەزار پێشمەرگەمان هەیە، زانیاری یەکان لای #کاک نەوشیروان# دەبێت و دەڵێت ڕۆستەم بۆچیتە؟ لە نێوان حەوت
تا دە هەزار پێشمەرگە، ئەڵێ ئەی جاش، ئەڵێت نزیکەی چوارسەدهەزار، مام ڕۆستەم ئەڵێت کەواتە ئەوان زۆرینەن و ئێمە هەڵەین.....
کادرێک باس لەچینی پڕۆلیتاریا دەکات لە جیاوازی چینایەتی کە چینێکی ماندون و کاریان نیە و شەڕ لەگەڵ ژیان دەکەن، دەڵێت ئەوانەی بوونەتە جاش لە کۆمەڵگای کوردی لەبەر بێکاری و نەداری چەکیان هەڵگرتوە ئەگینا ئەوانە هەموو پرۆلیتاریان...
بەیانی کە خەبەریان دەبێتەوە سەیر دەکەن وا جاش مۆڵی داوەو بەرەوگوندەکە دێن، حەمەی تەلە- شاهۆ ناسراو بوو بەقسەخۆش و خۆش مەجلیس ناوی دەرکردبوو، کادرەکە لەخەو هەڵدەستێنێ ئەڵێ کاکی کادر خێرا هەڵسە وا چینی پڕۆلیتاریا گەیشتە سەرمان.