بەرپرسێک لە ئیدارەی #گەرمیان# ئاشکرای کرد، کە ڕێکخراوێکی ئەڵمانی شەش هەزار هاووڵاتی لە هەرێمی کوردستاندا دادەمەزرێنێت.
بێستوون ژاڵەیی، بەرپرسی کاروباری مرۆیی لە ئیدارەی گەرمیان، بە (باسنیوز)ی ڕاگەیاند: ڕێکخراوی GIZی ئەڵمانی، بە مەبەستی ئەوەی هاوولاتیانی هەرێمی کوردستان کۆچ نەکەن بۆ دەرەوە، بڕیاری داوە بە دامەزراندنی شەش هەزار هاووڵاتی لەسەر ئاستی هەرێمی کوردستان، کە لەو ڕێژەیەدا، نزیکەی (500) کەسیان بەر گەرمیان دەکەوێت.
ئەوەشی گوت: ئەم کارە بە مەبەستی هاوکاریکردنی بەڕێوەبەرایەتییەکانی حکوومەتی هەرێمی کوردستانە و لە بوارەکانی (سەوزاییی، ئاو و ئاوەڕۆ، پەروەردە و چەندین لایەنی دیکە) ئەو هاووڵاتییانە دادەمەزرێنرێن.
بەرپرسی کاروباری مرۆیی لە ئیدارەی گەرمیان هێمای بۆ ئەوەش کرد، کە مووچەکەیان بە شێوەی ڕۆژانە بۆ هەر هاووڵاتییەک دەبێت، کە ئەو ڕێکخراوە دایدەنێت و خەرج دەکرێت و بڕەکەشی بۆ هەر ڕۆژێک لەنێوان 25 هەزار تا 40هەزار دیناری عێراقییە.
بێستوون ژاڵەیی دەشڵێت: دامەزراندنەکە بەشێوەی گرێبەستە و بۆ ماوەی ساڵێک و لەماوەیەکی نزیکیشدا شێوازی دامەزراندنەکە ئاشکرا دەکرێت.
05-06-2017