بەبۆنەی یەکی ئایار، ڕۆژی یەکیەتی و هاوپشتی نێونەتەوەیی چینی کرێکارەوە
یەکی ئایار ڕۆژی یەکیەتی و هاوپشتی نێونەتەوەیی چینی کرێکارە. ئایار، هەموساڵێک کرێکاران لەسەراسەری دونیادا بانگەواز دەکات، کەبەدەر لەناسنامە دروستکراوە ئاینی و نەتەوەیی ولۆکاڵیەکان، وەک چینێکی یەکگرتوویی هاوچارەنوس، بەرامبەر بەنەزم و نیزامی زاڵمانەی سەرمایەداری و بەربەریەتێک کەحاکمانی ئەم نیزامە بەره و ڕووی کۆمەڵگای بەشەری کردۆتەوە ڕاوەستن.
ئەمساڵ جیهان لەدۆخێکدا بەرەوپیری ئایار دەڕوات کە ئیمپریالیزم و دەوڵەتانی بۆرژوازی و دەسەڵات بەدەستانی وردو درشتی بۆرژوازی و دەسته و تاقمە مرۆڤکوژە نەتەوەپەرست و ئیسلامیەکان، کەوتونەتە پێشبڕکێیەکی خوێناوی و تیرۆریستیەوە. لەدەورەیەکدا کە کوشتاری بەکۆمەڵی ئینسان و ماڵوێرانی و ئاوارەیی، لەپاڵ سیاسەتی برسیکردن وپەلاماردانی سفرەی خاڵی خەڵکی کرێکارو زەحمەتکێش، بۆتە سیاسەتێکی سەرەکی بەدەست چینی بۆرژوازی و هێز و دەوڵەتە‌کانیەوە. لەپێناو دووبارە دابەشکردنەوەی دنیا بەپێی بەرژەوەندیەکانی ئەم هێزو دەوڵەتانە، کۆمەڵگای مرۆڤایەتی نەک هەر بەره و دواوه براوە، بەڵکو ژیانی ئێستا و نەوەکانی داهاتووی له بەردەم بەربەریەت و مەترسیەکی گەورەدا ڕاگرتووە. هاتنە سەرکاری فاشیزم لەئەمریکا، پەڕوباڵ دەرکردنی ڕەوته راسیستی و ڕاسترەوە پەڕگرەکان لەئەوروپا، توندبوونەوەی جەنگ و کاولکاری و تیرۆریزمی ڕەسمیی دەوڵەتی و تیرۆریزمی ئیسلامی لە ڕۆژهەڵاتی ناوەڕاست، پێشبڕکێی میلیتاریستی نێوان ئەمریکاو ڕوسیا، توندبوونەوەی بارگرژی لە نێوان جەمسەرگیریە جیهانیەکان و سەرهەڵدانی قەیرانی کوریا تا بەرینبوونەوەی تیرۆریزم لەدڵی کۆمەڵگاکانی ڕۆژئاوادا.. ئەمانە هەموویان نیشانەی ئەوەن که بۆرژوازی و دەوڵەتەکانی، نەک هەر فرسەتی ژیان و ئاسایشیان له دانیشتوانی سەر گۆی زەوی سەندۆتەوە، بەڵکو ئایندەی مرۆڤایەتیشیان لەسەر لێواری کارەسات و تیاچوون ڕاگرتووە!
چینی کرێکارو زەحمەتکێشانی کوردستان سەرەرای تەحەمولکردنی ئاکامەکانی ئەم دۆخە ناهەموارەی ناوچەکه و جیهان، هاوکات لەلایەن دەسەڵاتدارێتی بۆرژوازی کوردو حزبە ناسیونالیست و ئیسلامیەکانیەوە، ڕوبەروی هەڵومەرجێکی سەخت و دژوار بوونە‌تەوە. شەڕی داعش بۆ ئەم دەسەڵاته و حزبەکانی بوەتە بەرەکەتێک بۆ کۆکردنەوەی داهات و سەرمایە. لەم پێناوەدا هێزی پیشمەرگەیان خستۆتە خزمەتی بەرژەوەندیە سەربازی و سیاسیەکانی ئەمریکاوە و لەلایەکی دیکەوە دەستی کۆمپانیا زەبەلاحەکانی نەوت و بازرگانانی چەک و کاڵایان بۆ کوردستان ڕاکێشاوە و خەریکی تاڵان فرۆشکردنی نەوت و داچۆڕاندنی سەرچاوەکنی ژیانی خەڵکن. سەرەڕای ئەوە، شەڕی داعش بوەتە بەهانەیەک بۆشکاندنەوەی ئاسەوارەکانی جەنگ و قەیرانی ئابوری بەسەر هاوڵاتیاندا، تائەو ڕادەیە‌ی کە بەرپرسیارێتی خۆیان لە بەرامبەر سادەترین خزمەتگوزاریە گشتیەکانی وەک خوێندن و تەندروستی و ئاوو کارەباو بیمە کۆمەڵایەتیەکاندا دەرکێشن، لەوەش خراپتر، مووچەی کارمەند و کرێکارانی کەرتی حکومی زەوت بکەن و سەدان هەزار کرێکاری کەرتی تایبەتیش بێکاربکەن کە برسێتی هەڕەشە لە ژیانی خۆیان و خێزانەکانیان دەکات. لەمەش زیاتر بەرەکەتی داعش و شەڕی موسڵ، فرسەتی داوە بە پارتی و یەکیەتی کە بەناوی سازدانی ڕیفراندۆمەوە سەرنجی خەڵکی بێبەش و برسیکراوی کوردستان لەسەر کێشەو پرسە سەرەکیەکانی پەیوەند بە ژیان و گوزەرانیانەوە بە ئاقارێکی دیکەدا بەرن و لاپەرەیەکی دیکە لە بارگرژی و ساتوسەودا و گەمەی سیاسی بەناوی خەڵکی کوردستانەوە لەگەڵ دەولەتی مەرکەزیدا هەڵبدەنەوە، ئەمەش لەپێناو فراوانکردنەوەی دەسەڵاتیان بەسەر کەرکووک و ناوچە جێناکۆکەکاندا!
کرێکاران، خەڵکی بەشمەینەتی کوردستان!
چیتر ئەم دۆخه و ئەم بەربەریەتە تەحەمول ناکرێ! چیتر ناکرێ ژیانی خۆمان و نەوەکانی داهاتومان بە سیاسەت و مامەڵەی دەسەڵاتدارن و حزبە بۆرژوا ناسیۆنالیست و ئیسلامیەکان بسپێرین. هێزی ئێمە هێزی ژنان و پیاوانی کرێکارو ڕەنجدەرو زەحمەتکیش، مامۆستاو کارمەندی کەمدەرامەت، ئازادیخوازان و جەماوەری بەشمیەنەتە، ئەگەر یەکگرتوو ڕێکخراو بین لەدەوری ئاڵای کۆمۆنیزم و شۆڕشی کۆمەڵایەتیمان، دەتوانین نەک هەر بەر بەم بەربەریەتە بگرین، بەڵکو چارەنوسی کۆمەڵگا لەدەست بگرین و خۆمان کاروباری ژیانی سیاسی و کۆمەڵایەتیمان بەڕێوە بەرین.
یەکی ئایار ڕۆژی یەکیەتی و هاوپشتی و هاوخەباتیە. ڕۆژی وەستانەوەیە بەدژی ستەم و ژێردەستەیی، بەدژی جیاکاری و چەوسانەوە، جەنگ و کوشتارو کاولکاری، دژی هەژاری و بێکاری و برسێتی... ڕۆژی کۆکردنەوەی هێز و تواناکانمانە لەپێناو هەڵپێچانی سیستەمی نا یەکسان و چەوسێنەرانەی بەدیهێنانی دنیایەکی ئازادو یەکسان وخۆشگوزەران. کەوایە با ئایاری ئەمساڵ بکەین بە سەرەتای دەستپێکردنی بزوتنەوەیەکی بەهێزی جەماوەری لەدژی ئەم بارودۆخە کارەساتبارەی دەسەڵاتدارانی بۆرژوازی کورد بۆیان دروست کردوین. سەرەتای بەرێخستنی بزوتنەوەیەکی بەهێز لەدژی برسێتی و هەژاری بەرپا بکەین. بزوتنەوەیەک کە لە هەموو کارگاو کارخانەیەک، فەرمانگەو نەخۆشخانەیەک، زانکۆو قوتابخانەیەک، گەڕەک و کۆڵانێکەوە دەست پێبکات.
ژنان و پیاوانی کرێکار، گەنجان و لاوانی بێکار، مامۆستاو خوێندکار، خانەنشین و کەم ئەندام و خاوەن پێدوایستی تایبەت.... ئازادیخوازان و یەکسانیخوازان و هەموو ئەوانەی کە بەفڕاندنی پارووی دەمی مناڵی هەژاران نارەحەت و توڕەن.. بە نەمانی خزمەتگوزاری تەندروستی و بڕینەوەی دەستی ساواکانمان موویان گرژ دەبێت...هەموومان لەم بزوتنەوەیەدا بەشداربین. با هەموو بەیەک دەنگ ڕابگەیەنین کە چیتر ئەم بەربەریەتە تەحەمول ناکەین!
بژی ئایار!
بۆ پێشەوە بەرەو بەرپاکردنی بزوتنەوەیەکی بەهێز لەدژی هەژاری!
حزبی کۆمۆنیستی کرێکاری کوردستان
23-04-2017