دواڕۆژ، عیسا عەبدولقەهار
بەرپرسێکی وەزارەتی تەندروستی ئاشکرایدەکات، لەماوەی چوار ساڵی ڕابردوو بەهۆی هەڵەی پزیشکی و کەموڕییەوە 152 کەس سزادراون و 75 کەیسی هەڵەی پزیشک و کارمەندانی تەندروستی دراونەتە دادگا.
خاڵس قادر بەڕێوەبەری دیوانی وەزارەتی تەندروستی هەرێم، ئەمڕۆ شەممە 22ی نیسانی 2017 بە دواڕۆژی ڕاگەیاند، چاوپۆشی لە هەڵەی هیچ کارمەند و پزیشکێک ناکرێت و ئەوانەشی لە کەیسی دەستبڕینەوەی منداڵەکەی دهۆک تۆمەتبارن، سزادەدرێن.
ئه و بەرپرسەی وەزارەتی تەندروستی، ڕوونیدەکاتەوه، لەماوەی سێ بۆ چوار ساڵی ڕابردوو لەسەر هەڵەی پزیشک و کارمەندان، 75 کەیس ڕەوانەی دادگا کراوه و سزادراون.
وتیشی ئەو کەسانە، سزادراون بە دوورخستنەوه و لێ سەندنەوەی پلەی ئیداری و کارگێڕی و سزای جۆراوجۆری تر.
خاڵس قادر، ئاماژەی بەوەشکرد، وەزارەتی تەندروستی ئەرکێکی قورسی لەسەرشانە، بەڵام بەهیچ جۆرێک چاوپۆشی لە هەڵه و کەموڕییەکان ناکات و هەر پزیشک و کارمەندێک کەمتەرخەمبن بە توندی سزادەدرێن.
22-04-2017