دواڕۆژ، بورهان یەحیا:
بەرپرسێ راگەهاندن و پەیوەندیێن جەماوەرى ل کۆمسیۆنا بلندا هەلبژارتنان تایێ دهۆک خویاکر، ب مەرەما بلندبوونا رێژەیا تۆمارکرنا بایۆمەترى بڕیار هاتەدان کو هەژمارا بنگەهێن تۆمارکرنێ ژ 14 بنگەهان بۆ 21 بنگەهان بهێنە زێدەکرن.
سەگڤان دێرەشى، بەرپرسێ راگەهاندن و پەیوەندیێن جەماوەرى ل کۆمسیۆنا بلندا هەلبژارتنان تایێ دهۆک بۆ دواڕۆژ زەلالکر "لدووڤ وان گازندەیێن پێشتر وەلاتییان دکر هەژمارا وان هاتنە زێدەکرن و پشتى ئه و دەستپێشەخەرییا ئەنجومەنێ وەزیران و پارێزگەها دهۆکێ کرى رێژەیا تۆمارکرنێ ژ 10% بۆ 18% زێدەبوو و ئەڤ رێژە هەمبەر یێن پارێزگەهێن هەولێر و سلیمانیێ پترە".
بەرپرسێ راگەهاندن و پەیوەندیێن جەماوەرى ل کۆمسیۆنا بلندا هەلبژارتنان تایێ دهۆک خویاکر "ئەڤرۆ کومسیۆن دگەل ئێکەتییا زانایان و ئەوقافا دهۆکێ کۆمبوو و ب فەرمى داخواز ژ وان هاتەکرن کو ب رێکا مامۆستایێن ئایینى و مینبەرێن مزگەفتان گرنگییا ڤێ پرۆسەیێ بۆ وەلاتییان شرۆڤە بکەن و بۆ تۆمارکرنا بایۆمەترى بۆ هەلبژارتنان بهێنە پالدان، هەر چەندە پێشتر ژى ئەوان هاریکارییا مە کرییە لێ ڤێجارێ دێ ب فەرمى و ب شێوەیەکێ بەرفرەهتر بیت".
ناڤبۆرى زەلالکر "ل وان ناحیە و قەزایێن بنگەهێن تۆمارکرنا بایۆمەترى لێنەیى نوکە هاتینە ڤەکرن و کارمەندێن زێدە ژ بنگەهێن دى بۆ ڤان بنگەهان هاتینە ڤەگوهاستن و پێشبینى دهێتەکرن رێژەیا تۆمارکرنێ بەرەڤ بلندبوونێ بچیت".
- 07-12-2016