دواڕۆژ، نوسینگەی هەولێر
وەزارەتی پلاندانانی حکومەتی هەرێمی کوردستان، رایدەگەیەنێت"ژمارەی خوێندەواری بێ کاری نێرینەو مێینە لە ماوەی چوار ساڵدا بۆتە سێ ئەوەندە".
بە پێی راپۆرتێکی وەزارەتی پلاندانی حکومەتی هەرێم کە دەست دواڕۆژ کەوتووە ئاماژەبەوەکراوە، رێژەی مێینەی خوێندەواری بێکار لە ساڵی 2012 دا (10) هەزار کەس بووە و لە 2015 دا بۆتە (41) هەزار کەس و رێژەی نێرینەی خوێندەواری بێکاریش لە ساڵی 2012 دا نۆ هەزار کەس بووە لە (2015) دا بۆتە (26) هەزار کەس، بەمەش رێژەکە بۆ سێ ئەوەند بەرزبۆتەوە.
لە بارەی سیستەمی بیمەی کۆمەڵایەتی، ئاماژەبەوەکراوە، زیاتر لە 50% دەستی کار لە هەرێمی کوردستان سیستەمی بیمەی کۆمەڵایەتی دەیانگرێتەوە و زۆربەشیان کارمەندی کەرتی گشتین و 50% خەڵکی سەرووی تەمەنی (65) ساڵیش لە هەرێمی کوردستان سوودمەندن لە سیستەمی موچەی خانەنشینی.
لە راپۆرتەکەی وەزارەتی پلاندانان ئاماژەش بەوەکراوە، موچەو خانەنشینی و پارەی هاوکاری کۆمەڵایەتی و پاڵپشتی نرخی هەندێ کەرەستەی وەک (کارەبا، بەنزین، ئاو، کشتوکال) زیاتر لە 50% بودجە دەبەن و باجیش لە 4.7%کۆی داهاتی هەرێمە.
لە راپۆرتەکەدا هاتووە" خەرجییە گشتییەکان (پارەدان بۆ موچە) دەدرێت بە یەک ملیۆن و (320) هەزار کەس، بەشێوەیەک (680) هەزار کەس لە کەرتی گشتی و (125) هەزار قوتابی و (247) هەزار خانەنشین و (90) هەزار تۆڕەکانی پاراستنی کۆمەڵایەتی خێزان و (101) هەزار تۆڕەکانی پاراستنی کۆمەڵایەتی کەمئەندام و (77) هەزار شەهیدان و ئەنفالکراوان".
- 04-10-2016