یەکەمین کۆنفرانسی یەکێتی ژنانی جەوانی ڕۆژهەڵاتی کوردستان لە ژێر درووشمی "پێداگری لە سەر ڕیبازی شەهید فەراشین و مادوراکان گارانتی شۆرشە لە ڕۆژهەڵاتی کوردستان دا" پێک هات.
کۆنفرانسی یەکێتی ژنانی جەوان کە لە 28 و 29 ی مانگی حوزەیران دا لە هەرێمی سەربەستی میدیا بەرێوەچوو.
تیایدا داواکرا بۆ چارەسەری کێشەکانی کۆمەڵگا و بەتایبەتی ژنان کۆتایی هێنان بە هەر چەشنە سیاسەتێکی چەپەڵی ڕژیم، هەموو ژنان و جەوانان بگەنە ئاستی خۆبەرێکخستن کردن و پاراستنی نرخەکانی ئازادی و سروشت و مرۆڤایەتی.
لە ئەنجامنامەی کۆنفرانسە‌کەدا هاتووە کە یەکێتیەکەیان ڕێکخستن کردنی جەوانانی ڕوژهەڵاتی کوردستان و ئێران (بەلووچ، عەرەب، فارس، ئازەری و...) بە ئامانجە سەرەکییەکانی خۆی دادەنێت.
دەقی بەیاننامەی کۆنفرانسەکە بەم شێوەیەیە:
یەکەمین کۆنفرانسی یەکێتی ژنانی جەوانی ڕۆژهەڵاتی کوردستان لە قۆناخێکی زۆر هەستیاردا کە جیهان بە گشتی و ڕۆژهەڵاتی ناوەراست و کوردستان بە تایبەتی بەره ‌و ئاڵوگۆڕی بەرچاو هەنگاو دەنێن پێک هات. بە تایبەت کە لە بەهاری گەلاندا ژنان هێزی پێشەنگ و دیارکەری شۆرش بوون و تەنانەت لەم پێناوەشدا زۆرترین تێکۆشان و قۆربانیان دا. چ لە گۆڕەپانی ڕاپەڕین و چ لە گۆرەپانی شەر دا بە فیداکاری و خۆڕاگری دژ بە ڕژێمە دەسەڵاتدارەکان تێکۆشانی ئازادیخوازیان دەگەیەننە لووتکە. زهنیەتی پیاوسالار لە بەرامبەر هێز و ورەو ڕوحی ئازازیخوازی ژنان لاواز بووە، هەر بۆ ئەوەش پەرە بە هەر چەشنە سیاسەتی دژ بەژن دەدات.
ئێران یەک لەو وڵاتانەی کە ڕۆژانە سیاسەتی دژە مرۆڤانە بە سەر گەلان دا دەسەپێنێت و هاوکات لە گەڵ‌ بەرەسمیەت نەناسینی ماف و ناسنامەی گەلان، حاشا لە فرەرەنگی و فرەدەنگی کۆمەڵگای ڕۆژهەڵاتی کوردستان و ئێران دەکات. لە دەرئەنجامی سیاسەتی ڕژیمی داگیرکەری ئێراندا، کۆمەڵگای ئێران و ڕۆژهەڵاتی کوردستان تووشی قەیرانی سیاسی، کۆمەڵایەتی، ئابووری و کەلتووری بووە. هەموو ئەم قەیرانانەش لە پێشێل کردنی مافی گەلان و بە تایبەت ژن سەرچاوە دەگرێت. ئێران لە قۆناخی سەرۆک کۆماری حەسەن ڕوحانی دا هەوڵی دا بە شێوازێکی زۆر فۆرمالیتەش بێت، باس لە ئاڵ وگۆڕی کۆمەڵایەتی و بە تایبەت باشتر کردنی ڕەوشی ژنان بکات. بەڵام ئەوەی لە ڕاستیدا بەرچاو بوو بەردەوام کردنی سیاسەتی نکۆڵی و قڕکردنی کۆمەڵگا و بەتایبەت ژنان و جەوانانە. ئەمە لە کاتێکدایە کە ڕێژەی ئەو کەسانەی کە لە ساڵی دواییدا لەسێدارە دراون، بە تایبەت ڕێژەی ژنانی لەسێدارەدراو سەرنج ڕاکێشە و ئەمەش سیاسەتی هەنووکەی ئێران لە کوردستاندا ڕاشکاوانە نیشان دەدات. لە جێگای ئەوەی کە لە گۆڕەپانەکانی سیاسەت، ئابووری، کۆمەڵایەتی و هتد دا مافی بەشداری ئازادانە بۆ ژنان بڕەخسێ، ئەو بڕە مافەی کە لە پێش تر دا هەیبوو لێی زەوت کراوە. لە بەرامبەر زهنیەتی کۆنەپەرست و دواکەوتووی ڕژیمی ئیسلامی، تێکۆشان و نارەزایەتی ژنانی ڕووناکبیر، چالاکوان، ڕۆژنامەوان و هتد کە ئاستی هۆشیاری ئەوان نیشان دەدات گرینگیەکی تایبەتی هەیە لە تێکۆشانی ژنان دا.
ئاستەنگ کردنی ئازادی ژنان هەم لە بواری کار و هەم لە بواری ژیانیدا، کەم کردنەوەی ژمارەی ژنانی پارلەمانتار، لە سێدارە دان، بەسیج کردن، بەکارهێنانی مادەی هۆشبەر، لەشفرۆشی، بەرزبوونی ڕێژەی خۆسووتاندن، قەتڵی نامووسی، سیغەو... ئاستی قووڵ بوونی عەقلییەتی باوک سالاری و ڕەگەزپەرەستی پیاو لە سەر ژن ئاشکرا دەکات. بەڵام کۆڵنەدانی ژنانی تێکۆشەر و ئازادیخواز لە بەرامبەر ڕژیمی سێدارە و دژەژنی ئیسلامی ئێران دا، وەکوو (شەهید شیرین عەلەم هولی) کە خەتی بەرخۆدانی و تەسلیم نەبوون هەڵ‌دەبژێرێ و لە سێدارە دەدرێت. لە هەمان دەم دا زەینەب جەلالیان و بە دەیان ژنی دیکە کە ناویان نازانرێت، بە خۆڕاگری و قەبووڵ کردنی هەر چەشنە ئەشکەنجەیەک ڕێی بەرەو ئازاد بوون و ڕزگاری دەپارێزن وبە هیچ شێوەیەک سەری تەسلیمیەت دانانەوێنن، بابەتێکی حاشاهەڵنەگرە. ڕژیمی ئیسلامی ئێران سیاسەتی ئەشکەنجە، زیندان، چاوترساندن و سێدارە و... بە تایبەت لە بەرامبەر ژنان و جەوانان دا بە مەبەستی دوورخستنەوەیان لە گۆڕەپانی تێکۆشانی ئازادیخوازی بە ئاشکرایی بەرێوە دەبات. هەر بەم شێوەیەش لە کوردستاندا، ژنان و جەوانان وەکوو هێزێکی دژبە تەڤگەری ئازادیخوازی بەکار دێنێت.
ئەگەرچی لە ڕۆژهەڵاتی کوردستان دا لێگەڕینی داهاتوویەکی ئازاد هەمیشە هەیە بەڵام هەتا ئێستا یەکێتی گەلان و بەتایبەت ژنان بە ڕادەی پێویست پێک نەهاتووە. بۆیە دامەزراندنی یەکیتی ژنانی جەوان لە ئێران و ڕۆژهەڵاتی کوردستاندا بۆ درووست کردنی دۆخێکی دیموکراتیک پێویستییەکی سەرەکەیە.
روژانە ئاماری قڕکردنی جەستەیی و زهنیەتی و... ژنان و جەوانان لە ئێران دا بەرەو زیادبوون و دۆخێکی خەتەر دەچێت. ئەژماری لە سێدارەدان زیاتر دەبێت و ئەشکەنجە کردن، دەستدرێژی، زیندانی، سیغە کردن، تووشکردنی ژنان و جەوانان بە ماددە هۆشبەرەکان، سیاسەتی بەسیج کردن و بەکرێگیراوی و... لە هەمو شوێنێکی ڕوژهەڵاتی کوردستان و ئێران بە ئاستی هەرە بەرزی خۆی گەیشتووە.
لە یەکەم کۆنفرانسی یەکێتی ژنانی جەوان کە لە 28 و 29 ی مانگی حوزەیران دا لە هەرێمی سەربەستی میدیا بەرێوە چوو، ئەو بابەتانە باسیان لە سەر کرا. بۆ چارەسەری ئەو کێشانەو کۆتایی هێنان بەم چەشنە سیاسەتانەی ڕژیم، پێویستە هەمو ژنان و جەوانان بگەنە ئاستی خۆبەرێکخستن کردن و پاراستنی نرخەکانی ئازادی و سروشت و مرۆڤایەتی. لە چوارچێوەی پێکهێنانی کۆمەڵ‌گای ئەخلاقی- سیاسی دا ئەوە ژنە کە دەتوانێ ببێَ بە هێزی چارەسەری. بە پارادیگمای نوێی ڕێبەر ئاپۆ ژنانی جەوان لە ڕوژهەڵاتی کوردستان دەبن بە هێزێکی مەزنی چارەسەری کێشەکانی ژنان و کێشە نەتەوەییەکان کە ئەوەش دەبێ بە چارەسەرییەکی بناغەیی بۆ قەیرانەکانی کە ئێستا ژن، گەلی کورد و گەلانی ئێران تێیدا دەژین. هەروەکو لە ڕۆژئاوای کوردستان دا بە پێشەنگایەتی حەرەکەتی ئازادیخوازی ژنان بناغەی پرۆژەی چارەسەری و ئازادی بۆ هەمو گەلان دامەزرا لە ڕوژهەڵاتی کوردستانیش ئامانجمان ئەوەیە کە لە ناو سیستەمی کۆمەڵگای ژنانی ئازادی ڕوژهەڵاتی کوردستان "کژار" دا ئێمە وەکو یەکێتی ژنانی جەوان ڕێکخستنمان بە هێز کەین. بەو ئامانج و بەرنامانەی کە دامانناوە، دەتوانین ڕێکخستن کردنی هەمو ژنانی جەوانی ڕوژهەڵاتی کوردستان و ئێران بە ئیرادەیەکی بە هێزەوە دەست پێبکەین و نوێنەری ڕاستەقینەی تێکۆشانی ئازادی ژنان و نەتەوەکەمان بین.
یەکێتی ژنانی جەوان لە ناو بریارگای (KCR) دا ڕێکخستنێکی تایبەت بە خۆی هەیە و بۆ بەرێکخستن کردنی ژنانی جەوان و پەروەردە کردنیان خەبات دەکات. کادرەکانی یەکێتی ژنانی جەوان بۆ گواستنەوەی بیر و ئایدیۆلۆژی ڕێبەر ئاپۆ بۆ ناو ژنانی جەوانی (بەلووچ، عەرەب، فارس، ئازەری و گەلانی تری ئێران) ئەرکی خۆیان دەبینن.
کادرەکانی ژنانی جەوان لە سەر ئەساسی ئایدیۆلۆژیای ئازادی ژن، لە سەر ڕێبازی ملیتانی، چالاکانە تێکۆشانی ڕەگەزی بەرێوە دەبات. ڕێکخستن کردنی جەوانانی ڕوژهەڵاتی کوردستان و ئێران (بەلووچ، عەرەب، فارس، ئازەری و...) بە ئامانجە سەرەکییەکانی خۆی دادەنێ و لە ناو ژنانی جەوان لە زانکۆ، دەبیرستان، مەدرەسە و شوێنی کارەکان دا کۆمیتە، مەجلیس، کۆمین پێکدێنێت و چالاکانە کاری ڕێکخستنی دەکات و ڕێکخراوە و نەهادەکانی پێوەندیدارەکان بونیاد دەنێت.
کۆمیتەکانی یەکێتی ژنانی جەوان بەرپرسیاری پێکهێنانی چالاکیەکان و ڕێکخستن کردنی "کەژار" ن. وەکو ئەرکی ئەساسی بە هێز کردن و زیادکردنی ئەژماری ه.پ.ژ ئەساس دەگرن.
لە دژی زهنیەت و کرداری دەسەڵاتداری ڕژیمی ئێران کە ژنان بێ ئیرادە دەکات، دەکوژێت، لە ڕێی ماددە هۆشبەرەکان و ناوەندەکانی لەشفرۆشی ژیان و کەسایەتیان بێ واتا دەکات، خەبات دەکات و پاراستنی زاتی پێش دەخات.
بێگومان سەرهەڵدانی گەلانی ئازادیخوازیش لە سەر ئەم بنەمایە بۆ سەرخستنی شۆرشی ئازادی گەلان دەستی پێکردووە و هەتا ئاستێک هاتووە. لە سەرجەم ئەو شۆرشانە دا ژنان بۆ گەییشتن بە سەرکەوتن و ئازادی کۆمەڵگاکەیان ڕۆڵی پێشەنگیان گێڕاوە.
ئەم کۆنفرانسە‌ و دامەزراندنی یەکیتی ژنانی جەوانی ڕۆژهەڵاتی کوردستان سەرەتا لە دامەزرێنەری ئایدیۆلۆژیای ژنی ئازاد و سیستەمی کۆنفیدراڵیسمی دیموکراتیک، (رێبەر ئاپۆ) و هەروەها لە هەموو ژنانی ئازادیخواز، بە تایبەتی ژنانی کورد و ئێرانی و سەرجەم گەلی ڕۆژهەڵاتی کوردستان و گەلانی ئێران پیرۆز دەکەین. و هە ڕوەها پێشکەشی دەکەین بە هەمو ژنانی شەهیدی ڕێگای ئازادی و شهید زیلان پەپوولە، شهیدان کاوەندا، ئاخین و بەرچەم و ساریا ئونور و بە سەدان و هەزاران شەهیدی تر، نمونەی ئاشکرای ئەو ژنانەن کە ژیانێکی ئازادیان هەڵ‌بژارد و بۆ تێکشکاندنی کۆیلەتی و جنسیەتگەرایی قارەمانانە تێکۆشانیان کرد و بوون بە سەمبولی ژنی ئازاد. پێویستە ئێمەش بزانین کە دروستترین و بە واتا ترین ژیان، ژیان کردن لە گەڵ ژنی ئازادە کە کەرامەت و ڕۆڵی خۆی و حەقیقەتی خۆی دیتووەتەوە و بۆ پێکهێنانی نیزامی کۆنفێدێرالیسمی دێموکراتیک پێشەنگایەتی هەمو ژنانی جیهانی بە ئەستۆ گرتووە.
سڵاو ڕێزی شۆرشگێری

کۆردیناسیۆنی یەکێتی ژنانی جەوانی ڕۆژهەڵاتی کوردستان
30-06-2015