رێکخستنەکانی گشتیی پارتی دیموکراتی گەلان- هەدەپە ئاشکرایکرد، حکومەتی تورکیا بەهۆی ئۆپەراسیۆن و گەمارۆ سەربازییەکان لە باکووری کوردستان 161 هاونیشتمانی کوشتوون، ‌لەنێو کوژراوەکانیشدا 30 ئافرەت هەن‌.
رۆژی یەکشەممە 10-1-2016، ڕێکخستنەکانی گشتیی هەدەپە ڕاپۆرتێکی بڵاوکردەوه،‌ بەپێی ڕاپۆرتەکە حکومەتی تورکیا لە ڕێککەوتی 16ی ئابی 2015 گەمارۆی سەربازیی بەسەر چەندین شار و شارەدێدا سەپاندووه، بەهۆیانەوە 161 هاونیشمانی کوژراون، 30 لە کوژراوەکانیش ئافرەتن.
لە ڕاپۆرتەکەدا هاتووە "ماوەی 280 ڕۆژە ئۆپەراسیۆن و گەمارۆی سەربازی، سیاسەتی قەدەخەکردنی هاتووچۆ و ئۆپەراسیۆنی سەربازی و هەڵمەتی هەڵکوتان بۆسەر ماڵان لە 7 شار و 20 شارەدێ جێبەجێکراوە و تائێستاش بەردەوامن، هەروەها 56 جار قەدەخەکردنی هاتووچۆ نوێکراوەتەوه، وێڕای هەڵوەشاندنەوەی لە بەشێکی شارەدێکان، بەڵام بەکرداری تائێستا ئەنجام دەدرێت".
وەک هەدەپە ئاماژەی پێداوە، تەنیا لە شارەدێکانی جزیرێ و سلۆپی و سووری ئامەد 70 هاونیشتمانی کوژراون، لەنێویاندا 24 ئافرەت هەن. لە کۆمەڵکوژییەکەی سوروچ 10 ئافرەت و لە تەقینەوەکانی ئەنقەرەش 30 ئافرەت بوونەتە قوربانی.
لە 4ی کانوونی دووەمی 2016 دا 3 ژنە چالاکڤانی پارتی هەرێمە دیموکراتەکان- دەبەپە بەناوەکانی سێڤە دەمیر، پاکیزە ناییر و فاتمە ئویار کوژران. لە ڕاپۆرتەکەدا هاتووه،‌ لە ماوەی 26 ڕۆژدا لە جزیرێ بۆتان 14 ئافرەت، لە سلۆپی 7 ئافرەت و لە سووریی ئامەد 3 ئافرەت کوژراون.
- 10-01-2016