21-09-2015
رۆژین کەمال محەمەد ئەمین، ئەندازیاری تەلارسازی لەبەڕێوەبەرایەتی نەخشەدانانی سلێمانی سەر بەوەزارەتی شارەوانی‌و گەشت‌و گوزارو کاندیدی تواناسازی سەرکەوتووانە مناقەشەی توێژینەوەی دکتۆراکەی لەگەڵ 7 پرۆفیسۆری زانکۆکانی کالگەری‌و لاڤاڵ لەکەنەداو زانکۆی باشوری ئوسترالیا تەواوکرد. جگەلەوەی کۆنمرەی کۆرسەکانی ئاستی Α یە واتە نایابی باڵا، 4 لەئەندامانی لیژنەی مناقەشەکە توێژینەوەکەی (رۆژین) یان کاندید کرد بۆ وەرگرتنی خەڵاتی دەوڵەتی‌و نێودەوڵەتی. توێژینەوەکەی لەشێوازی ئینتەر دیسپلینەرییەو دەربارەی بەکارهێنانی نوێترین تەکنەلۆژیایە لەمۆزەخانەو بیناو شوێنەوارە مێژووییەکان بەمەبەستی گەشتیاری.
ساڵی پاریش لەکۆنفرانسێکی نێودەوڵەتی لەشاری لۆس ئەنجلۆسی ئەمریکا لەسەر پێشکەشکردنی بابەتی توێژینەوەکەی خەڵاتکراو دوابەدوای بڵاوبوونەوەی هەواڵەکە لەوێبسایتی زانکۆکەی، یاریدەدەری سەرۆکی زانکۆی کالگەری بۆ کاروباری نێودەوڵەتی نامەی پیرۆزبایی‌و سوپاس‌و پێزانینی ئاراستەی خاتوو ڕۆژین کرد. پێشتریش لەساڵی 2012دا نامەی پیرۆزبایی لەوەزیری ڕۆشنبیریی‌و کەلتوری موقاتەعەی ئەلبێرتاوە ئاراستەکرا بەبۆنەی وەرگرتنی سکۆلەرشیپێکی وەزارەتەکەوە بۆ پشتگیریکردنی توێژینەوەی دکتۆراکەی.
شایەنی باسە کە د. ڕۆژین ماستەرەکەشی لەزانکۆی کالگەری لەساڵی 2010 دا بەکۆنمرەی نایاب تەواو کردو خەڵاتی دیتۆماسی بۆ توێژینەوەی ماستەری لەلایەن زانکۆکەیەوە پێدرابوو لەکتێبێکدا ئاماژە بەتوێژینەوەی ماستەرەکەی کرابوو. بەدرێژایی خوێندنی ماستەرو دکتۆراکەی چەندین خەڵات‌و سکۆلەرشیپی لەسەر ئاستی زانستی‌و دەستکەوتە ئەکادیمییەکانییەوە پێدراوەو 21 کۆرسی لەبابەتی تازەی تەلارسازی‌و پلانسازی‌و تەکنەلۆژیادا خوێندووەو بۆ 3 مانگیش لەسەر مەسرەفی زانکۆی کانتبوری لەنیوزلەندا لێکۆڵینەوەی کردووە لەسەر چەند پڕۆژەیەک کە هاوشێوەی توێژینەوەی دکتۆراکەی بوون. خاتوو ڕۆژین توێژینەوەکانی لەچەندین کۆنفرانسی بەناوبانگی دەوڵەتی لەسەر ئاستی کەنەداو نێودەوڵەتی لەچەند وڵاتێکی وەک ئەمریکاو هۆڵەنداو ژاپۆندا پێشکەشکردووە. چەند جارێک بانگهێشتکراوە بۆ پێشکەشکردنی سیمینارو وانە وتنەوەو توێژینەوە لەباکوری ئەمریکاو ئەوروپاو وڵاتانی کەنداو.
بەدرێژایی ئەم چەند ساڵەی پێشوو، د. ڕۆژین بەشداریکردووە لەزیاد لە 600 خولی ڕاهێنان، ۆرک شۆپ، سیمینار، کۆنفرانس لەسەر ئاستی زانکۆکەی‌و شاری کالگەری بۆ پەرەپێدانی توانا کەسییەکان‌و پرۆفیشناڵییەکانی وەک پەرەپێدانی توانای سەرکردەیی‌و پرۆژە بەرێوەبردن‌و وانە وتنەوەو چەندەهای تر. ئەندام‌و لێپرسراوو ڕێکخەری چەند کۆنفرانس‌و کۆمیتی‌و ڕێکخراوێک بووەو چەند جارێکیش لەلایەن عەمیدی خوێندنی باڵاوە لەزانکۆکەی داوای لێکراوە کە ئەزموونی سەرکەوتنە ئەکادیمیەکانی بۆ خوێندکارە نێودەوڵەتییە تازەکانی زانکۆکە باس بکات لەدەستپێکی ساڵی نوێی خوێندندا.
سەرباری پێدانی هەلی کاری توێژینەوەو وانە وتنەوە لەباکوری ئەمریکاو ئەوروپاو وڵاتێکی کەنداو، د. ڕۆژین وەک پابەندبوونی یاسایی بەرامبەر بەحکومەتی هەرێم‌وو خەمخۆری بۆ خزمەتکردن‌و پێشخستنی کوردستان لەخۆ ئامادەکردندایە بۆ گەڕانەوە بۆ کوردستان لەچەند ڕۆژی داهاتووداو هیواخوازە کە جەژنی قوربان لەگەڵ خێزانەکەیدا بکات لەکوردستان لەپاش ئەو هەموو ماندووبوون‌و کۆششەی ساڵانی ڕابردووی.
هەروەک خۆی دەڵێت کە هەرچەندە بەدرێژایی ساڵی خوێندنم وەک خوێندکاری زەمالەی حکومەتی هەرێم لەخوێندنی ماستەرەکەیداو دواتر کاندیدی بەرنامەی تواناسازی لەدکتۆراکەیدا ڕۆژ نەبووە لەچەند دەزگایەکی حکومەتی هەرێم کێشەو سەریەشە بۆ خۆی‌و خێزانەکەی دروست نەکەن‌و ئەوە بۆ 2 ساڵ دەچێت لەسەر مەسرەفی خۆی‌و خێزانەکەی خوێندنی دکتۆراکەی تەواوکردووە، بەڵام هەموو ئەو شتانە گوڕو تین‌و مەبەستی زیاتریان پێداوە بۆ گەڕانەوە بۆ کوردستان تاوەکو یارمەتیدەربێت لەپێشخستنی کەلتوری خزمەتکردنی ئاست بەرزو نمونەی باش بۆ خزمەتی تاک‌و کۆمەڵی کوردی. لەهەمانکاتدا د. ڕۆژین سوپاسی ئەو کەس‌و فەرمانبەرانە دەکات کە بەدڵسۆزانە کاروباری هاوڵاتیان‌و کاندیدانی تواناسازیی ڕادەپەڕێنن‌و هیوادارە کە لەدام‌ودەزگاکانی حکومەتی هەرێمدا نموونەی ئەو کەسانە زۆربن. شایەنی باسە کە د. ڕۆژین کچی شەهید مفەوەز کەمال-ە کە تا دواساتەکانی ژیانە کورتەکەی خزمەتی کۆمەڵی کوردی کردووە.
http://www.ucalgary.ca/utoday/issue/2014-08-18/evds-phd-candidates-research-recognized-international-conference
http://www.ucalgary.ca/news/utoday/july26-2012/technology
http://evds.ucalgary.ca/evds_info/profiles/rozhen-mohammed-amin
Kurdipedia is niet verantwoordelijk voor de inhoud van deze opname en de eigenaar is daarvoor verantwoordelijk. Kurdipedia nam het op voor archiefdoeleinden.
Dit item werd in het (کوردیی ناوەڕاست) geschreven, klik op het pictogram
om het item te openen in de originele taal!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
Dit item is 9,345 keer bekeken
Schrijf uw commentaar over dit item!