- ناوەندی چاپەمەنی و ڕاگەیاندنی یەپەگە ئەنجامەکانی شەڕ و پێکدادانی بیست و چوار کاتژمێری ڕابردووی نێوان یەکینەکانی پاراستنی گەل و چەکدارانی ڕێکخراوی تیرۆریستی داعش لە شارۆچکەی حەسەکە و کانتۆنی کۆبانێ ڕایگەیاند. لە ڕاگەیەندراوەکەی یەپەگەدا هاتووە: "ئۆپەراسیۆنی یەکینەکانی پاراستنی گەل لە دژی چەکدارانی ڕێکخراوی تیرۆریستی داعش لە حەسەکە دەستیپێکردووە و شەڕ و پێکدادانی سەخت هاتووەتە ئاراوە و لە دەوروبەری عەین عیسا شکستیان پێهێناون و لاشەی 26 چەکدارەکانی ئەو ڕێکخراوە تیرۆریستییە کەوتوونەتە بەردەست شەڕڤانەکانمان".
- وەزیری کاروباری شەهیدان و ئەنفالکراوەکانی حکومەتی هەرێم ڕایدەگەیەنێت، بە گوێرەی پڕۆژە یاسایەک سەرجەم قوربانیانی شنگال بە شەهید و ڕزگاربووانەوە بە زیندانی سیاسی هەژماردەکرێت و هەمان ئەو ماف و ئیمتیازاتەیان دەبێت، ئاماژە بەوەشدەکات، قەرەبووکردنەوەی زیانلیکەوتوان لە ئەستۆی حکومەتی عیراقە کەچی ئەو خۆی دەدزێتەوە.
- بەپێی ڕاگەیەندراوێکی ئاژانسی کەشناسی و بومەلەرزەی هەرێمی کوردستان، ئەمشەو کاتژمێر 09:28 خولەک بە کاتی هەولێر بومەلەرزەیەک بە گوری 4.3 پلە بە پێی پێوەری ڕێختەر لە دووری 27کم لە چەمچەماڵ و 38کم لە شاروچکەی کۆیە و 51 کم لە شاری کەرکووک بە قولایی 10 کم ڕویدا و هاوڵاتیانیش لە قەزای تەق تەق هەستیان پێکردوە بە بێ ئەوەی هیچ زیانی هەبێت.