لە ماوەی یەک هەفتەی ڕابردوودا نزیکەی 280 هاوڵاتی ئێزیدی لە دەستی چەکدارانی داعش ڕزگار کراون بەمەش ژمارەی ڕزگاربوانی دەستی داعش دەگاتە نزیکەی هەزار و 275 کەس.
حسێن کۆڕۆ، بەڕێوەبەری نووسینگەی ڕفێندراوانی ئێزدیی بە دەنگی ئەمەریکای ڕاگەیاند: ڕۆژی سێشەممەی ڕابردوو 34 هاوڵاتی ئێزیدی لە تەلەعفەر و چوارشەممە 217 کەس لە باشووری کەرکووک و پێنچشەممەش 27ی دیکە لە تەلەعفەرەوە ڕزگارکران و بە هەماهەنگی هێزی پێشمەرگە گەیەنرانە هەرێمی کوردستان و چارەسەری پێویستیان بۆ کرا.
وتیشی: "ئه و هاوڵاتیەیانەی تا ئێستا ڕزگارکراون زۆربەیان پیرو پەککەوتە و منداڵن".
خەیری بۆزانی بەڕێوەبەری گشتی کاروباری ئێزدیەکان لە وەزارەتی ئەوقافی حکومەتی هەرێم دوا ئاماری ڕزگاربوان و ئەوانەی تا ئێستا لە دەست چەکدرانی داعش ماونەتەوە و کوژراوەکان بۆ دەنگی ئەمەریکا ئاشکرا دەکات کە بەم شێوەیەی خوارەوەیە.
تا 6ی ئەم مانگە 996 کەس ئازادکرابوون کە 216 پیاو و 452 ژن و 169 منداڵی کوڕ و 159 منداڵی کچ بوون، هەروەها لە ماوەی هەفتەی ڕابردووشدا نزیکەی 280 هاوڵاتی تری ئێزیدی ڕزگاریان بووە کە ژمارەی کۆتایی و ڕەسمی ڕزگابوان تا ئێستا گەیشتوەتە نزیکەی 1275 کەس.
خەیری بۆزانی دەڵێت: "ژمارەی گشتی ئێزیدیەکان لە عیراق 550 هەزار کەسە له و ژمارەیە 400 هەزار کەس ئاوارە و 65 هەزار کەسیش بوونەتە پەنابەر. ژمارەی ڕفێندراوانیش سێ هەزار و 500 کەسە و 841 کەسیش ونن و چارەنوسیان نادیارە 1280 کەس کوژراون و280 کەسیش مردون".
تا ئێستا 11 گۆڕی بە کۆمەڵ دۆزراونەتەوە، 18 مەزار و شوێنی پیرۆزی ئاینی ئێزدیەکان تەقێندراونەتەوە.
ئه و کارە بەدەستەی ئێزیدییەکان دەڵێت: "رزگابوانی دەستی داعش لە ڕەوشێکی تەندروستی و دەروونی خراپ دان و پێویستیان بە چارەسەر هەیە. هەروەک دەشڵێت لە ڕووی دەروونی و مەعنەوییەوە داوایان لە چەندین ڕێکخراوی مرۆیی نێودەڵەتی کردوە تا لە ڕێگای کردنەوەی خولی پێویست جارێکی تر بگەڕێنەوە دۆخی جارانیان.
لەسەر ئاستی هاوڵاتیان و ڕێکخراو و چالاکانی ئێزیدیی بە جۆرەها ڕێگا فشارەکانیان بۆ سەر حکومەتی هەرێم و ناوەند و کۆمەڵگای نێودەوڵەتی بەردەوامە بۆ بە جینۆساید ناساندنی کارەساتی شنگال.
- 14-04-2015