لە ماوەی مانگی ڕابردوودا لە شاری سلێمانی لیژنەی چاودێری ڕێستۆرانت و کافتریا و یانەکانی شەوانە، سەردانی 103 شوێنیان کردووە و 32 شوێن بەهۆی سەرپێچییەوە غەرامەکراون و دوو شوێنیش دراونەتە دادگا و هەشت شوێنی تریش بەهۆی جۆری سەرپێچیەکەیانەوە داخراون.
فریا عەبدولڕەحمان، سەرۆکی لیژنەی چاودێری ڕێستۆرانت و کافتریا و یانەکانی شەوانە کە سەر بە لیژنە هاوبەشەکانی قایمقامیەتی سلێمانییە بە خەندانی ڕاگەیاند: "ژمارەیەکی بەرچاو لە هاوڵاتیان بۆ کات بەسەربردن سەردانی یانە و کافتریاکان دەکەن و لیژنەکەیان بۆ پاراستنی تەندروستی هاوڵاتیان و ڕێکخستنی ئه و شوێنانە بەردەوام سەردان و چاودێری وردی هەموو ئه و شوێنانە دەکات و لە چۆنیەتی مەرج و ڕێنماییەکان دەکۆڵێتەوە و ڕێگری لە هەموو کارێکی ڕێگە پێنەدراو نایاسایی دەکرێت".
سەرۆکی لیژنەکە وتیشی: "1-1 بۆ 01-02-2015 سەردانی 103 شوێنمان کردووە و لە چۆنیەتی جێبەجێکردنی مەرج و ڕێنمایی کارکردنمان کۆڵیوەتەوە و لە ئەنجامی گەڕان و بەدواداچوونەکانمان 32 شوێن غەرامەکراون و دوو شوێنیش دراونەتە دادگا و هەشت شوێنیش بەهۆی جۆری سەرپێچییەکەیانەوە داخراون".
ئاماژەی بۆ ئەوەشکرد: "هۆکاری داخستن و غەرامەکردنی شوێنەکان لەسەر بنەمای پابەند نەبوون بووە بە مەرج و ڕێنماییەکان و نەبوونی مۆڵەتی کارکردن و کارتی تەندروستی و بەڵگەی مانەوەی ئه و کەسانەی له و شوێنانە کاردەکەن، لەگەڵ هەبوونی یاری بەخت کە دەبێتە هۆی دروستبوونی کێشەی کۆمەڵایەتی".
- 09-02-2015