$ژیاننامە$
دایکی سۆلاڤ، ناوی تەواوی سەبریە نوری قادر-ه،‌ لە ساڵی (1928) لە شاری #سلێمانی# لە دایک بووە، قۆناغی خوێندنی سەرەتایی تەواوکردووە، هەر لە منداڵییەوە هۆگری خوێندنەوەی شیعر و وێنەکێشان بووە، هەر لە تەمەنی منداڵیدا چەند شیعرێکی سادەی بۆ جوانی بەهار و شاخەکانی #گۆیژە# و #ئەزمەڕ# نووسیوە، و لە ساڵی (1996) ەوە، وەکو پەنابەرێکی کورد لە وڵاتی سوید، لە شاری ئۆپسالە دەژی و دایکی شەش کچ و کوڕێکە.
لە ساڵی 1956 دا بۆ یەکەم جار لە ڕۆژنامەی ژین دا بابەتێکی بە ناونیشانی ئافرەت و ژن و ماڵ بڵاوکردووەتەوە، کە تێیدا داکۆکی لە ئازادیی ژنان کردووە و دوای ئەوە چەند هۆنراوەیەکی تری بۆ منداڵان و چەند بابەتێکی دەربارەی داکۆکییکردن لە ئازادیی و مافی ژنانی کورد لە ڕۆژنامەی ژین و لە گۆڤاری دەنگی مامۆستا، دا بڵاوکردووەتەوه،‌ بێجگە لە دایکی سۆلاف، کە بە ناوی کچی چوارەمی سۆلاڤ ەوەیە، چەند شیعر و بابەتێکیشی، بە نازناوی خوشکە کوردێک- ەوە، بڵاوکردووەتەوە.
دایکی سۆلاڤ له و سەردەمەدا، داوای لە ژنانی کورد کردووە، کە واز لە باڵاپۆشی و لە ڕووپۆشی عەبا و پێچە بهێن، چونکە پییوابووە، کە ئەوە چاولێکەرییەکی بێگانەیە و داوایکردووە، کە بە جلی ڕەسەن و جوانی کوردییەوە دەرکەون، بۆیە خۆی دەبێتە پێشڕەوێک و لە ساڵی (1956) دا، لەگەڵ هێرۆی کچی گۆران-ی شاعیر، لە بەردەم سەرای شاری سلێمانیدا، عەباکانیان لادەبەن، ئیتر له و ڕۆژەوە، دایکی سۆلاڤ لە هەموو شوێنێکدا و لە هەموو بۆنەیەکدا، بە جلوبەرگی جوانی کوردییەوە دەبیندرێت.
دایکی سۆلاڤ، لە یەکێک لە چاوپێکەوتنەکانیدا وتویەتی:له و ڕۆژەداخەڵکێکی زۆر ئافەرین و دەستخۆشییان لێکردین و هەندێک ژن-یش، کە چەوساوەی پیاوسالاریی بوون، ئەم کارەیان پێ بوێرانە و چاونەترسیی بوو.
دایکی سۆلاڤ، یەکەمین ژن بووە، کە لەڕێگەی شیعرەوە، ڕێنمایی منداڵانی کوردیی کردووە، شیعرەکانیشی سادە و ئاسانن، بە زمانێکی شیرین و پەتی و ڕەوان دایان دەڕێژێت بەشێکیشیان ئاوازیان بۆ دانراون و کراون به ‌گۆرانی.
$بڵاوکراوەکان$
لەهەردوو بواری شیعر و چیرۆکی منداڵان ئەم نامیلکە و کتێبانەی خوارەوەی بڵاو کردووەتەوە:
1- چەپکێک وەنەوشە، 1982 لە بەغدا چاپکراوە، کۆمەڵە شیعرێکە.
2- ئاسۆگە، 1982 لە بەغدا چاپکراوە، کۆمەڵە شیعرێکە بۆ منداڵان.
3- بەهەشتی منداڵان، 1983 لە سلێمانی چاپکراوە، کۆمەڵە شعرێکە بۆ منداڵان.
4- قاسپەی کەو، 1985 لە سلێمانی چاپکراوە، کۆمەڵەشیعرێکە بۆ منداڵان.
5-سروودی خۆر، 1987 لە بەغدا چاپکراوە، کۆ مەڵەشیعرێکە بۆ منداڵان.
6- زەنگی ژیان، 1998 لە سوید چاپی کردووە، کۆمەڵێک شیعرە بۆ منداڵان.
7- داپیرە و مام ڕێوی، 1998 لە سوید چاپکراوە، چیرۆکە شیعرێکە بۆ منداڵان و لە هەمان چاپدا، بە پیتی لاتینی کوردیی و بە پیتی عەرەبی، نووسیویەتی، کە دێڕەکان بە هەردوو شێوەکە بەرانبەر بە یەکترین، چیرۆکەکەش ئەندێشەیی فۆلکۆری کوردییە و بە شیعر دووبارە دایڕشتووە.
دایکی سۆلاڤ، لەبواری وێنەکێشانیش دەستی هەیە، 52 وێنەی سەرکردە قارەمانەکانی کورد و ژنە ناودارەکانی کوردی کێشاوە و لە ئەرشیفی تایبەتی خۆیدا پاراستوونی.[1]