بەناوی خوای گەورەو میهرەبان

بەڕێزان ئەندامانی پەرلەمانی کوردستان، خوشک و برایانی خۆشەویست
بە ناوی دەستەی سەرۆکایەتیەوە پیرۆزبایتان لێدەکەم بۆ دەسپێکردنی خولی گرێدانی ساڵی یەکەمی خولی هەڵبژاردنی چوارەمی پەرلەمان.
بەڕێزان ئێمە لە کاتێکدا دەست دەکەینەوە بە خولی گرێدانی پەرلەمان کە هەرێمی کوردستان بە بارودۆخێکی هەستیاردا تێپەڕدەبێ، وەک ئاگادارن لە دوای 10 حوزەیرانی ئەمساڵەوە عێراق و هەرێمی کوردستان بەهۆی پەلامارەکانی ڕێکخراوی تیرۆریستی داعشەوە پێی ناوەتە دۆخێکی مەترسیدار. جگە لە تاوانی جینۆسایدی ئێزیدیەکان، بە هەزاران خەڵکی بێ تاوان لە مەسیحی و شەبەک و کاکەیی ئاوارەی شاروشارۆچکەکانی کوردستان بوون، ئەمەش ئەرک و بارگرانییەکی گەورەی بۆ حکومەت و گەلەکەمان درووست کردوە.
لێرەوە بە پێویستی دەزانم ئاماژە بەو بارودۆخە ناهەموارەی ئابوری کوردستان بکەم کە دەرهاویشتەی گەورەو بارگرانی زۆری بۆ سەر ژیان و گوزەرانی خەڵکی کوردستان دروست کردوە، لە سەروی هەموشیانەوە قەیرانی دواکەوتنی موچەی فەرمانبەران و وەستانی پرۆژەکانی ئاوەدانی و پەکخستنی بازاڕو قەیرانی سوتەمەنیی، کە نابێ لەوە زیاتر درێژە بکێشێ و دەبێ هەرچی زووترە حکومەتی هەرێمی کوردستان چارەسەری گونجاویان بۆ بدۆزێتەوە و دڵنیایی بە خەڵک بدات کە دۆخەکە کاتییەو درێژە ناکێشێ. بەتایبەتی ئێستا قەیرانی بەنزین لە هەرێمی کوردستان پەرەی سەندووە و نرخی بەنزین و چۆنییەتی دەستکەوتنی، هێندەی تر هاوڵاتییانی هەرێمی نیگەران کردووە. پێویستە حکومەت لە لە هەر بڕیارێک دەیدات شەفافانە کێشەو گرفتەکانی لەگەڵ گەلی کوردستان باس بکات و چۆنییەتی چارەسەری کورتماوەو دوورمەودای بخاتە ڕوو، بۆ ئەوەی متمانە لە نێوان حکومەت و هاوڵاتیان درووست بێت.
لەم ڕووەوە بە ئەرکی سەرشانی خۆمانی دەزانین، بە ناوی خۆم و سەرۆکایەتی وئەندامانی پەرلەمانی کوردستانەوە سوپاسی خۆڕاگریی خەڵکی کوردستان بکەم کە سەرەڕای دواکەوتنی موچە و ناهەمواری بارودۆخی ئابورییان، بە هەستێکی بەرزی نەتەوەییەوە پشتیوان و پەرۆشی هێزی پێشمەرگەی کوردستان بوون، بەتایبەتیش لە ڕێگەی کۆکردنەوەی کۆمەک بۆ برا پێشمەرگەکانمان و چونە بەرەکانی جەنگ وەک هێزی پشتیوانی لە پیشمەرگەی کوردستان.
لێرەدا بە تایبەتی سوپاسی تایبەتی فەرمانبەرانی هەرێمی کوردستان دەکەم و لەو پێناوەدا وەک پێزانینێکی ڕەمزی بۆ ئەرک و ماندوبوون و خۆڕاگرییان بە فەرمی سوپاسنامەیەکی تایبەت ئاراستەی سەرجەم فەرمانبەرانی هەرێمی کوردستان دەکەین.
بەڕێزان ئەندامانی پەرلەمانی کوردستان..
سەرۆکایەتی پەرلەمانی کوردستان بە پێویستی دەزانێ لەم خولەی گرێدانەدا لە بواری یاساداناندا ئەولەویەت بدات بە کۆمەڵێک بابەت کە کاریگەری زۆریان هەیە بۆ سەر ژیانی خەڵک و باشتر کردنی سیستمی بەڕێوەبردن لە هەرێمی کوردستان لەوانە:
یەکەم:هەموارکردنەوەی پرۆژەی دەستوری هەرێمی کوردستان پەرلەمان بۆ دروستکردنی سازانی نیشتیمانی لە سەری و؛ ڕێگە خۆشکردن بۆ ئەنجامدانی ڕیفراندم لە سەر ئەو پڕۆژە دەستوورە.
دوەم: بەدامەزراوەیی کردنی کەرتی وزە لە هەرێمی کوردستان لە ڕێگەی دروستکردنی سندوقی داهاتە نەوتییەکان و دەستکردن بە دروستکردنی کۆمپانیا نیشتمانییەکانی بورای وزە.
سێیەم: ڕێکخستەوەی سیستمی دادوەری لە هەرێمی کوردستان لە ڕێی هەموارکردنی یاسای دەسەڵاتی دادوەری و پەسەند کردنی پرۆژە یاسای داواکاری گشتی.
چوارەم: دروستکردنی کۆمیسۆنی باڵای سەربەخۆی هەڵبژاردن و ڕاپرسی لە هەرێمی کوردستان.
پێنجەم: ڕێکخستنی سیستمی موچەو خانەنشینی لە هەرێمی کوردستان و بیمەی بێکاری و تەندروستی؛ هەروەها پێداچونەوە بە خانەنشینەکان بە جۆرێک دادپەروەری تێدا ڕەچاو بکرێت.
لە بواری چاودێریکردنیشدا، پەرلەمان لەم خولەدا بەم کارانە هەڵدەستێت:
یەکەم: بەدواداچونی بڕیارەکانی پەرلەمان بۆ ڕێکخستنەوەو یەکخستنەوەو بە پیشەیی کردنی هێزە چەکدارەکان و لە پێشەوەیشدا هێزی پێشمەرگەی کوردستان و باشکردنی گوزەران و موچەو چەک و تەقەمەنی و ڕاهێنانیان بە شێوەیەکی وا کە بتوانن ڕووبەڕووی هەر هەڕەشەیەک ببنەوە کە دووچاری هەرێمی کوردستان دەبێتەوە.
دوەم: بەدواداچون و لێپرسینەوە لە بەهەدەردانی سامانی گشتی، لە ڕێگەی کاراکردنی دیوانی چاودێری دارایی و دەستەی دەستپاکی و لیژنەی دەستپاکی پەرلەمان لە پرسی خانەنشینی چینە جیاوازەکانی هەرێمی کوردستان.
سێیەم: چاودێریکردنی پرۆسەی دانوسانەکانی نێوان هەرێمی کوردستان و حکومەتی ناوەندی لە بەغدا.
بەڕێزان...
لە کۆتایدا بە گرنگی دەزانم ئەوەتان بۆ دوبارە بکەمەوە کە کارکردنی ئێوە لە هەلومەرجێکدایە کە هەرێمی کوردستان بەگشتی و باروگوزەرانی خەڵەکەی بە دۆخێکدا تێپەڕ دەبێ زۆر سەخت ودژوارە، بۆیە دەبێ هەمومان بە گیانی بەرپرسیارێتەوە مامەڵەی لە گەڵدا بکەین، بە پێویستی دەزانم کارو ماندووبوونی ماوەی ڕابردووتان بەرز بنرخێنم، ئەم خولەی پەرلەمانی کوردستان بە هەوڵ و ماندووبوون و شەونخونی ئێوە بووەتە جێگەی ئومێدێکی گەورە بۆ خەڵکی کوردستان، بە توندی ئیدانەی هەندێک ڕەفتاری و وشەی نا بەجێ و ناشایستەی کەسانی نا بەرپرس دەکەین کە دەرهەق بە ئەندامانی پەرلەمان ئەنجامیان داوە.
خوای گەورە پشتیوانی هەموو لایەکمان بێت


یوسف محەمەد صادق
سەرۆکی پەرلەمانی کوردستان
2014/9/3