بەناوی خودای بەخشندەو میهرەبان
بەناوی گەلەوە
پەرلەمانی کوردستان عێراق
ژمارەی بڕیار: 19
مێژووی بڕیار: 2 03-07-2014
بڕیاری
تایبەت بە هێزەکانی #پێشمەرگە#
پشت بە حوکمەکانی بڕِگەی (1)ی ماددەی (56) لەیاسای هەڵبژاردنی پەرلەمانی کوردستان عێراق ژمارە (1)ی ساڵی 1992ی هەموارکراو، پەرلەمانی کوردستان لە دانیشتنی ئاسایی ژمارە (18)ی ڕۆژی 2 03-07-2014 ئەم بڕیارەی دا:
یەکەم: #وەزارەتی پێشمەرگە# بۆ وەرگرتنی مووچەی مانگانە یەکەم وەزارەت دەبێت.
دووەم: پێویستە دەرماڵەی مەترسی تایبەت (الخگورە الخاصە) بۆ هێزی پێشمەرگە سەرف بکرێت.
سێیەم: مووچەی وەزارەتی پێشمەرگە هاوتای مووچەی هێزەکانی ناوخۆ و ئاسایشی هەرێمی کوردستان دەکرێت.
چوارەم: پێویستە هەموو هێزەکانی پێشمەرگە لە ماوەی شەش مانگ لە دەرچوونی ئەم بڕیارەوە لە چوارچێوەی وەزارەتی پێشمەرگەدا وەک هێزێکی نیشتیمانی یەک بخرێت، بەتایبەتی یەکەکانی (70 و 80).
پێنجەم: پێویستە پێداچوونەوە بکرێت بە بەرزکردنەوە و بەرزبوونەوەی پلە(ترقیە) سەربازییەکانی پێشمەرگە.
شەشەم: پێویستە نەسرییەی یەکەکانی هێزی پێشمەرگە یەک بخرێت.
حەوتەم: پێویستە مووچەخۆری بێ دەوام لە هێزەکانی پێشمەرگە نەهێڵرێت.
هەشتەم: پێویستە کاتی دەوام و پشووی هێزی پێشمەرگە یەک بخرێت.
نۆیەم: پێویستە هێزە ئەمنیەکان لە ناوچە کوردستانییەکان یەک بخرێن.
دەیەم: پێویستە هەموو ئەو چەک و تەقەمەنی و پێداویستیی وئامێرە سەربازییانەی لە پاش ڕووداوەکانی گرتنی #موسڵ# کەوتوونەتە دەست هێزە جیاجیاکانی هەرێمی کوردستان بگەڕێنرێنەوە بۆ وەزارەتی پێشمەرگە.
یازدەیەم: پێویستە سووتەمەنی و پێداویستی تەندروستی بەشێوەیەکی باشتر بۆ هێزی پێشمەرگە دابین بکرێن.
دوازدەیەم: دابینکردنی خواردنی تەندروست و گەیاندنی بەهێزی پێشمەرگە لەکاتی خۆیدا.
سێزدەیەم: دابینکردنی چەک و تەقەمەنی پێویست بۆ هێزی پێشمەرگە.
چواردەیەم: ئەو پێشمەرگانەی کە شەهید دەبن دەبێت لە ڕێوڕەسمێکی شایستەدا بەخاک بسپێردرێن و هاوکارییەکی ماددی خانەوادەکانیشیان بکرێت.
پازدەهەم: پێویستە حکومەتی هەرێم ئەرکی چارەسەری بریندارەکان لە ئەستۆ بگرێت، لە کاتی برینداربونیانەوە تا چارەسەرکردنیان و، هاوکاری مادیش بکرێن.
شازدەهەم: پێویستە هێزی پێشمەرگە لەو جێیانە نەکشێتەوە کە لەدوای 09-06-2014 تێدا جێگیر بوون.
حەڤدەهەم: حکومەت لەکاتی کۆتایی هاتنی قەیرانی دارایی هەرێم، دەبێت هەموو ئەو بڕگانەی ئەم بڕیارە کە لە ئێستادا ناتوانرێت جێبەجێ بکرێن، جێبەجێیان بکات.
هەژدەهەم: پێویستە ئەنجومەنی وەزیران پێڕەو و ڕێنمایی پێویست بۆ ئاسان جێبەجێکردنی ئەم بڕیارە دەربکات.
نۆزدەیەم: کار بەهێچ دەقێکی یاسایی یان بڕیارێکی ناکۆک لەگەل حوکمەکانی ئەم بڕیارە ناکرێت.
بیستەهەم: لەسەر ئەنجومەنی وەزیران و لایەنە پەوەندیدارەکان پێویستە حوکمەکانی ئەم بڕیارە جێبەجێ بکەن.
بیست و یەک: ئەم بڕیارە لە ڕۆژی دەرچوونیەوە کاری پێدەکرێت و لە ڕۆژنامەی فەرمی (وەقایعی کوردستان)دا بڵاودەکرێتەوە.
هۆیەکانی دەرچوواندنی ئەم بڕیارە
لە پێناو باشتر کردنی ژیان و گوزەرانی هێزی پێشمەرگە و، ڕێکخستنی کاروبارەکانیان و، دابین کردنی پێداویستیەکانیان، ئەم بڕیارە دەرچوێندرا.
یوسف محمد صادق
سەرۆکی پەرلەمانی کوردستان عێراق