بەگوێرەی ئەنجامە ڕاگەیەنراوەکانی هەڵبژاردنی ئەنجومەنی نوێنەرانی عیراق، یەکێتی نیشتمانی کوردستان لەسەر ئاستی هەرێمی کوردستان هێزی دووەمە.
ئەمڕۆ کۆمسیۆنی باڵای هەڵبژاردنەکانی عیراق ئەنجامی کۆتایی هەڵبژاردنی ئەنجومەنی نوێنەرانی عیراقی ڕاگەیاند کە 30ی مانگی ڕابردوو بەڕێوەچوو.
بەگوێرەی ئەنجامە ڕاگەیەندراوەکان، پارتی دیموکراتی کوردستان لە پارێزگای هەولێر زۆرترین دەنگی هێناوە کە 354 هەزار و 735 دەنگە و لە پارێزگای دهۆک 340 هەزار و 977 دەنگی هێناوە و لە پارێزگای سلێمانی-ش 93 هەزار و 410 دەنگی هێناوە کە تێکڕا دەکاتە 789 هەزار و 122 دەنگ بەوپێیەش لەسەر ئاستی هەرێم هێزی یەکەمە.
یەکێتی نیشتمانی کوردستان-یش کە لە هەڵبژاردنی پەرلەمانی کوردستان کە لە 21ی ئەیلولی ڕابردوو بەڕێوەچوو، ژمارەی کورسییەکانی لە 28 کورسییەوە کەمبووەوە بۆ 18 کورسی وەکو هێزی سێیەم مامەڵەی لەگەڵدا دەکرا، لەم هەڵبژاردنەدا دەنگەکانی بەشێوەیەکی بەرچاو بەرزبووەتەوە.
بەگوێرەی ئەنجامەکانی کۆمسیۆن، یەکێتی نیشتمانی کوردستان کە بةراورد بە شارةکانی تر، لە شاری سلێمانی زۆرترین دەنگی هێناوە کە 294 هەزار و 265 دەنگە، لە شاری هەولێریش 168 هەزار و 688 دەنگ و لە شاری دهۆکی-ش 37 هەزار و 457 دەنگی هێناوە کە تێکڕا دەکاتە 500 هەزار و 410 دەنگ بەوشێوەیەش بووە بە هێزی دووەم لەسەر ئاستی هەرێم.
هاوکات بزووتنەوەی گۆڕان کە لە هەڵبژاردنی 21ی ئەیلولی ڕابردوودا توانی بە بەدەستهێنانی 24 کورسی پەرلەمان ببێتە هێزی دووەم، لەگەڵ ئەوەی لە سلێمانی لە پلەی یەکەمدایە، بەڵام لەم هەڵبژاردنەدا تێکڕا 474 هەزار و 506 دەنگی هێناوە کە بەسەر شارەکاندا بەمشێوەیە دابەشبووە "سلێمانی، 347 هەزار و 799 دەنگ، هەولێر 104 هەزار و 59 دەنگ و دهۆک، 22 هەزار و 648 دەنگ".
ئەمەش ژمارەی دەنگ و کورسییەکانی ئه و سێ حزبەیە لەسەر ئاستی هەرێم لە هەڵبژاردنی ئەنجومەنی نوێنەرانی عیراق
- 19-05-2014