خەندان- محەمەد کەرکوکی
بە پێی ئامارێکی باوەڕپێکراو لە تەقینەوه و پێکدادانەکانی دوێنیی شاری کەرکوک کە پەلاماری بەرێوەبەرایەتی دەزگای هەواڵگیری کەرکوک درا، 115 کەس بوونە تە قوربانی.
سەرچاوەیەکی باوەر پێکراو بە (خەندان) ی راگەیاند: دوای ئەوەی دوێنێ چوارشەممە لە بەردەم بەڕێوەبەرایەتی دەزگای هەواڵگری کەرکوک چەکدارانی قاعیدە ئۆتۆمبێلێکی بۆمبرێژکراویان تەقاندەوە و دوابەدوای ئه و کردەوەیەش چەند خۆکوژێک دزەیان کردە ناوبەرێوەبەرایەتییەکەوە.
سەرچاوەکە ئەوەشی روونکردەوە کە لەوکاتەشدا چەند چەکدارێکی دیکە چوونەتە سەربانی بازاری جەواهیر بە چەکی (قەناس) تەقەیان لە هێزە ئەمنییەکان و هاوڵاتیان کردووە.
سەرچاوەکە ئاماژەی بەوەشکرد: شەڕو پێکدادان لە لایەن هێزە ئەمنییەکان و چەکدارەکان تا درەنگانێکی شەوی رابردو بەردەوام بووە".
وتیشی: "بە پێی ئامارێکی باوەر پێکراو لە و کردەوانەدا نۆ کەس شەهیدبوون، کە چوارکەسیان کارمەندی دەزگای هەواڵگرین، هەروەک دوو کارمەندی ئاسایشن، دوانیان پۆلیس و یەکێکیش شۆفێری ئەمپوڵانسە".
سەرچاوەکە روونیکردەوە: 106 کەسیش بریندار بوون کە 54 یان لە هێزە ئەمنییەکانی شاری کەرکوکە و هەروەک 52 کەسەکەی دیکەش خوێندکارو کارمەندی فەرمانگەکان و هاوڵاتی مەدەنی شاری کەرکوکن.
- 05-12-2013