بەهۆی پابەند نەبوون بە ڕێنماییەکانەوە، لە لایەن بەڕێوەبەرایەتی چاودێری بازرگانی گەرمیانەوە لەسەرەتای ئەمساڵەوە 440 سەرپێچیکار سزادراون، بەڕێوەبەری ئەو بەڕێوەبەرایەتیەش ئاماژە بۆ ئەوەدەکات، لە دوو مانگی کۆتاییدا کەمترین سەرپێچی تۆمارکراوە.
حیکمەت ئەحمەد، بەڕێوەبەری چاودێری بازرگانی گەرمیان بە (خەندان)ی ڕاگەیاند: لە لایەن لیژنەکانەوه و لەسەرەتای ئەمساڵەوە تاوەکو کۆتایی ئەم مانگە، لە سنووری ئیدارەی گەرمیان پشکنین بۆ حەوت هەزار و 300 شوێنکار کراوە و له و چوارچێوەیەشدا، 440 سەرپێچیکار سزادراون.
ئاماژەی بەوەشدا: له و ماوەیەدا بەهۆی هەڵنەواسینی نرخەوە، 173 فرۆشیار و بەهۆی بوونی خۆراکی بەسەرچووەوە 242 شوێنکار سزادراون، هەروەک بەهۆی گرانی نرخەوە 14 فرۆشیار سزادراون.
بەڕێوەبەری چاودێری بازرگانی گەرمیان وتیشی:"هەر له و ماوەیەدا 11 سەرپێچی جۆراوجۆر تۆمارکراون و شەش شوێنکاریش داخراون.
حیکمەت ئەحمەد، ئەوەشی خستەڕوو: تێبینی کراوە لە دوو مانگی کۆتاییدا کەمترین سەرپێچی لەلایەن فرۆشیارانەوە ئەنجامدراوە، بەشێوەیەک لە مانگی ئەیلولدا، تەنها 10 سەرپێچی و لەمانگی تشرینی یەکەمدا تەنها 11 سەرپێچی ئەنجامدراوە، لەکاتێکدا لەمانگی کانونی دووەمدا زیاتر لە 60 سەرپێچی و لەمانگی شوباتدا نزیکەی 80 سەرپێچی لە لایەن فرۆشیارانەوە ئەنجامدراون.
بەڕێوەبەری چاودێری بازرگانی گەرمیان، هۆکاری کەمبونەوەی سەرپێچییەکانی گەڕاندەوە بۆ ڕێنماییپێدانی زیاتری هاوڵاتیان فرۆشیاران لەلایەن لیژنەکانیانەوە و هاوکات بەرزی ئاستی ڕۆشنبیری هاوڵاتیان بەرامبەر بە پابەند بوون بەڕێنماییەکان و ڕێگەگرتن لە خۆراکی خراپ و بەسەرچوو.
- 31-10-2013