ئێوارەی ئەمڕۆ بەسەرپەرشتی هەڤاڵ کۆسرەت ڕەسول عەلی جێگری سکرتێری گشتی مەکتەبی سیاسی لە سلێمانی کۆبۆوە، کە تایبەت بوو بە باسکردنی هەڵبژاردنەکان.
سەرەتا مەکتەبی سیاسی پیرۆزبایی لە خەڵکی کوردستان کرد بە بۆنەی سەرکەوتنی هەڵبژاردنەکان و بەسەرکەوتنی پرۆسەیەکی گرنگی دیموکراسی باسکرد، کە خزمەت بە قووڵکردنەوەی ژیانی دیموکراسی لە کوردستان ئەکاو یەکێکیشە لە ئامانج و دروشمە سەرەکی و لەمێژینەکانی یەکێتی نیشتمانی کوردستان.
هەروا سوپاسی هاوڵاتیانی کوردستانی کرد، کە بە جۆش و خرۆشەوە بەشداری پرۆسەکەیان کرد. سوپاسی گەرمی هەڤاڵان و دۆست و لایەنگر و دەنگدەرانی یەکێتی نیشتمانی کوردستان و کەسواری شەهیدان و ئەنفالکراوان و زیندانیانی سیاسی و کەمئەندامانی سەنگەر و پێشمەرگە و پێشمەرگە دێرینەکان و ڕێکخراوەکان و ژنان و پیاوان و کچ و کوڕانی دەنگدەری یەکیێتی کرد، کە چ لە وەختی بانگەشە و چ لە ڕۆژی دەنگداندا وەفاداری خۆیان بۆ یەکێتییەکەیان دەربڕی.
کۆبوونەوە سڵاوی نارد بۆ گیانی نەمری ئەو سێ هەڤاڵەی یەکێتی کە لە ماوەی بانگەشە و ڕۆژی دەنگداندا بە هۆی توندوتیژی دژ بە کەمپینەکانی لیستی یەکێتی شەهید بوون، وەک چۆن سڵاوی خۆشەویستیشی نارد بۆ کەسوکاری ئەو شەهیدە سەربەرزانە و هیواشی خواست بریندارانی ڕووداوەکانی هەڵبژاردن بە زوویی چاک ببنەوە.
کۆبوونەوە، گەرچی پێی وابوو ئەبێ چاروەڕوانی ئەنجامە ڕەسمییەکانی هەڵبژاردن و یەکلاکردنەوەی سکاڵاکان بکرێ، بەڵام هاوکات لەسەر ئەنجامە بەراییەکان هەڵوەستەی کردو بڕوای وابوو کە ئەو ئەنجامە بەراییانە بۆ یەکێتی جێی نیگەرانین و دڵخۆشکەر نین و هاوتای مێژوو و پێگەی یەکێتی نین لە تێکۆشانی خۆیدا، بەڵام ئەنجامەکان وەک پەیامێک، بە جدییەوە وەرئەگرێ.
تەئکیدیشی کردەوە کە لە بەرامبەر هەڤاڵان و دڵسۆزانی یەکێتیدا، تەواوی بەرپرسیارێتی لە ئەستۆ ئەگرێ. هاوکات لە هۆکارە جۆراوجۆرەکانی ئەو ئەنجامانە ئەکۆڵێتەوە و بە ڕاوێژ لەگەڵ ئەنجومەنی سەرکردایەتی و کادرانی پێشکەوتوو و شارەزایانی دۆستی یەکێتی، وێڕای لێکۆڵینەوه و هەڵسەنگاندنی جدی و ڕوون، بە شێوازو میکانیزمەکانی کارکردن و بەڕێوەبردن، بە بەرنامه و کەرەسەکانی کارکردن، بە ئەرکی بەرپرسیارێتییەکانی ناو یەکێتیشدا ئەچێتەوە.
هاوکات مەکتەبی سیاسی جەختی کردەوە کە، یەکێتی ڕێز لە ئیرادەی گەلەکەمان ئەگرێ و پێیەوە پابەند ئەبێ.
ئازاد جندیانی، وتەبێژی مەکتەبی سیاسی ڕایگەیاند کە لە کۆتایی ئەم هەفتەیەدا ئەنجومەنی سەرکردایەتی بۆ هەمان مەبەست کۆئەبێتەوە
- 22-09-2013