مانگی تەمموزی ئەمساڵ جگە لەگەرما پڕوکێنەکەی، دۆخێکی ئەمنی گەرم و ناهەمواریشی بەدوای خۆیدا هێنا، کە بوە مانگی قوربانی بۆ #کەرکووک#یەکان، تەنها لە25 ڕۆژی ئەم مانگەدا (واتە تا 25/7) زیاتر لە256 قوربانی هەبوە، 79 کوژراوو 177 بریندار.
ئا: سۆران کامەران
لەمبارەیەوە ئەندامێکی ئەنجومەنی پارێزگای کەرکووک لەسەر لیستی تورکمانی نەجات حوسێن بەئاوێنەی ڕاگەیاند زۆرجار گلەیی ئەوەمان لێدەکرێت، بەڵام لەماوەکانی ڕابردو ئێمە داوامان کرد لەئەنجومەن بۆ بانگێشتکردنی بەرپرسە ئەمنێکان و مناقشەمان کرد تا لیوا جەمال بەڕێوبەری پۆلیسی کەرکووک وتی، من بەرپرسیارێتی هەندێ لەتێکچونی دۆخەکە دەگرمە ئەستۆ و دەستلەکاردەکێشمەوە. بەڵام بۆ ڕۆژی دواتر بابەتەکان گۆڕا، وەک دەزانن ئەنجومەنی پارێزگا زۆربەی کورده و ئێمە داوای گۆڕانکاریمان کرد لەبەرپرسە ئەمنیەکان بەڵام بەداخەوە حیزبە سیاسیەکان ڕازی نەبون.
لەلایەکی دیکەوە ئەرشەد ساڵحی سەرۆکی #بەرەی تورکمانی# لەکەرکووک بەرپرسیارێتی ڕژانی خوێنی هاوڵاتیانی شارەکەی خستە ئەستۆی سەرۆکی لیژنەی ئەمنی کەرکووک نەجمەدین کەریم و فەرماندەی پۆلیسی کەرکووک لیوا جەمال تاهیر.
ساڵحی وتی پۆلیسی کەرکووک خاوەنی 15 هەزار پۆلیسە بەڵام نەبڵاوبونەتەوە و نەپلانیان هەیە.
لەبەرامبەردا ئەندامێکی کوردی ئەندامی ئەنجومەنی پارێزگای کەرکووک ئەحمەد عەسکەری بەئاوێنەی ڕاگەیاند ئەم بارودۆخە سەرەتایە بۆ هاوینێکی گەرم کە ئەمە شەڕێکی تائیفیە، بەڵام ڕانەگەیەنراوە، ئەو وتی ئەگەر کردەوەکانی چەند ڕۆژی ڕابردو هەڵبسەنگێنی دەزانی بەچ شوێنێکدا دەڕوات و کێ کردویەتی بەرامبەر بەکێ.
وتیشی هەڵاتنی زیندانیانی تاجی و ئەبو غرێب هۆکارێکی دیکەی تێکچونی دۆخەکەن لەکەرکووک و شەڕەکە ئەمجارە ڕو لەشەڕی تائیفیە نەک ئیرهاب.
هەرچەندە لەم مانگەدا ساڵیادی هاتنەسەرکاری حیزبی بەعس بو لە عێراقدا و هەندێ لەچاودێران پێیانوایە ئەو کردەوانە دەستی بەعسێکانی تێدابێت بۆ نیشاندانی هێزی خۆیان، عەسکەری وتی کە کێشەکان لەبەغدا لەنێوان سوننه و شیعە دەبێت، ڕەنگدانەوەی دەبێت لەسەر پارێزگاکانی دیکە بەگشتی و کەرکووکش بەتایبەتی، هەروەک چۆن ئەگەر ململانێ لەنێوان هەرێم و ناوەند هەبێت ڕەنگدانەوەی لەکەرکووک دەبێت، چونکە هەمو ئەوانە بەشیان هەیە لەکەرکووک
#31-07-2013#