بەپێی ئامارێکی بەڕێوەبەرایەتی هاتوچۆی پارێزگای سلێمانی بەهۆی ڕوداوەکانی هاتوچۆ لەشەش مانگی ڕابردوی ئەمساڵ 107 کەس گیانیان لەدەستداوە و بەبەراورد بەساڵی ڕابردو ئاماری قوربانیانی هاتوچۆ کەمیکردوە.
سلێمانی، ئاوێنەنیوز: لەمیانەی کۆنگرەیەکی ڕۆژنامەوانیدا لەهۆڵی پارێزگای سلێمانی، بەڕێوەبەرایەتی هاتوچۆی پارێزگای سلێمانی ئاماری شەش مانگی ڕابردوی قوربانیانی ڕوداوەکانی هاتوچۆ و چەند زانیارییەکی تری تایبەت بەبەڕێوەبەرایەتیەکەی خستەڕو.
بەپێی ئامارەکە لەماوەی شەش مانگی ڕابردوی ئەمساڵدا 107 کەس بەروداوەکانی هاتوچۆ گیانیان لەدەستداوە، لەکاتێکدا لەشەش مانگی سەرەتای ساڵی ڕابردوو، 120 کەس گیانیان لەدەستداوە و به و پێیەش بەبەراورد بەساڵی 2012، 13 کەس کەمیکردوە.
هەروەک لەشەش مانگی ڕابردوی ئەمساڵ 1371 کەس برینداربون، بەڵام ژمارەی برینداربوان لەساڵی ڕابردوو 1886 کەس بوە.
بەڕێوەبەری هاتوچۆی پارێزگای سلێمانی، تاهیر محەمەد، ڕایگەیاند، پلانیان لەبەردەستدا بۆ ئەوەی لەمساڵدا جەخت بکەنەوە لەسەر مەرجەکانی توندوتۆڵی ئوتومبیل.
وتیشی، 77 کامیرای نوێی تۆمارکردنی خێرایی ئوتومبیلیان بۆ هاتوە و دابەشی دەکەن بەسەر قەزا و ناحیەکانی سەر بەپارێزگای سلێمانی.
سەبارەت بەئاماری دەرهێنانی مۆڵەتی شۆفێری ڕاگەیەنرا 24181 مۆڵەتی شۆفێری لەمساڵ دەرهێنراوە کە لەشەش مانگی ساڵی 2012 ژمارەکە 31177 مۆڵەت بووە.
هاوکات لەم شەش مانگەدا 20570 ئوتومبیلی نوێ تۆمارکراوە کە بەبەراورد بەساڵی ڕابردوو کەمیکردووە کە 22390 ئوتومبیل تۆمارکراوە.
- 16-07-2013