بەوتەی ئەندامێکی لیژنەی دارایی ئەنجومەنی نوێنەرای عێراق، لەچوارچێوەی زیادبونی بودجەی گشتی عێراق، چاوەڕوان دەکرێت بوجەی هەرێمی کوردستانیش بۆ 16 ترلیۆن دینار زیاد بکات.
هێمن مامەند، ئاوێنەنیوز: لەلێدوانێکدا بۆ ئاوێنەنیوز، ئەندامی لیژنەی دارایی ئەنجومەنی نوێنەرای عێراق، نەجیبە نەجیب، ئەمرۆ پێنجشەممە، ڕایگەیاند، بودجەی ساڵی ڕابردوی عێراق 138 ترلیۆن دیناربووە، بەڵام لەمساڵدا بەپێی ئەو ستراتیجەی دەستنیشانکراوە، چاوەڕوان دەکرێت بودجەی گشتی عێراق بگاتە 157 ترلیۆن دینار.
لەبارەی زیادکردنی بودجەی هەرێمی کوردستانەوە نەجیبە نەجیب وتی، هەر کاتێک بودجەی عێراق زیاد بکات بودجەی هەرێمی کوردستانیش زیاد دەکات، بۆیە بودجەی ساڵی ڕابردوی هەرێم 14 ترلیۆن دیناربو بەپێی زیادکردنەکە چاوەڕوان دەکرێت بودجەی هەرێم بگاتە 16 ترلیۆن دینار.
بڕی بودجەی گشتی عێراق بۆ ساڵی 2013 پێکهاتبو لە (138) ترلیۆنو (424) ملیارو (608) ملیۆن دینار، لەو بڕەش بودجەی هەرێم بریتی بو لە 15 تریلیۆنو 257 ملیارو 849 ملیۆن دینار.
- 11-07-2013