سەرەتا لەتۆڕی کۆمەڵایەتی فەیسوک گروپێک بەناوی 17ی شوباتەوە پەیجێکیان کردەوەو دروشمی سەرەکییان "بەڵێ بۆ خۆپیشاندانی جەماوەری، نا بۆ کپکردنی دەنگی ناڕەزایی"بو، لەم پەیجەوە هەڵمەتێکی فراوان بەرێوەدەچو بۆ ئەنجامدانی خۆپیشاندانی سەرتاسەری لەهەرێمی کوردستان، پاش تێپەڕینی ساڵێک بەسەر روداوەکەی بەردەم لقی 4ی پارتی دیموکراتی کوردستان لە 17ی شوباتی 2011دا.
وەک هەوڵێک بۆ سەرکوتکردنی سەرهەڵدانی هەر خۆپیشاندانێک لەشاری سلێمانیو بەدیاریکراویش لەبەردەرکی سەرای سلێمانی، لە 15-02-2012وە هێزەکانی وەزارەتی ناوخۆ خرانە ئینزارو حاڵەتی ئامادەباشییەوە.
لە 16-02-2012وەو تا چەند رۆژێک دوای 17ی شوبات، هێزێکی سەربازیو ئەمنی گەورە، بەشێوەیەکی نهێنی لەنزیک بارەگای لقی چواری پارتی دیموکراتی کوردستان لەسلێمانی جێگیرکران.
لەترسی سەرهەڵدانەوەی خۆپیشاندانو ناڕەزایەتیەکان، چەند رۆژێک پێش 17ی شوبات هێزە ئەمنیەکان لەسەرانسەری شاروشارۆچکەکانی کوردستاندا خرانە ئامادەباشییەوەو بەسەر چەند شوێنێکدا بڵاوکرانەوەو شەوی 16 لەسەر 17ی شوبات، ئەو هێزانانە تەواوی بەردەرکی سەراو شەقامەکانی دەوروبەریان تەنی.
لەگەڵ هەڵهاتنی خۆر لە17ی شواتی 2012، چەندین هێزی ئەمنی جۆراوجۆرو هێزی چالاکییە مەدەنییەکان سەرەتای شەقامی مەولەویان تەنیو بەکۆڵانەکانی دەوروبەری مەولەوی بڵاوبونەوە.
بەهۆی ئەو بارە نائاساییەی لەسلێمانی ۆاگەیەندرابو هەر کەسێک لەبەردەرکی سەرا وەک رۆژنامەنوس خۆی دەربخستایەو بەمەبەستی روماڵو وێنەگرتن سەردانی ئەو ناوچانەی بکردایە راستەوخۆ لەلایەن هێزە ئەمنیەکانەوە پاش لێدانو سوکایەتی پێکردن، دەستگیردەکرا.
لەپێشنیوەرۆی ئەو رۆژەدا هێزە ئەمنییەکان رۆژنامەنوسێکی ئەڵمانیان بەناوی (هێنرێک ئاهرێنز) دەستبەسەرکرد، بەهۆی ئەوەی ویستبوی وێنەی بەردەرکی سەرای سلێمانی بگرێت.
کەمێک دواتر رۆژنامەنوسو رێکخەری سەنتەری میترۆ بۆ داکۆکیکردن لەمافی رۆژنامەنوسان، رەحمان غەریب، لەبەردەرکی سەرا پاش لێدانی دەستگیرکرا.
پێش نیوەرۆی ئەو رۆژە گەنجانو دانیشتوانی ناڕازی سلێمانی گروپ گروپ لەنزیک سەرای سلێمانیو شەقامەکانی دەوروبەری لەهەوڵی کۆبونەوەو دەستپێکردنەوەی خۆپیشانداندا بون، بەڵام راستەوخۆ لەلایەن هێزە ئەمنییەکانەوە هێرش دەکرا سەریانو بڵاوەیان پێدەکرا.
هەمان رۆژو لەناو بازاڕی قەزای کەلار هێزێکی چەکداری زۆر لەناوبازاڕی قەزاکەدا بڵاوکرانەوە، بەمەبەستی سەرکوتکردنی هەر جوڵەیەکی جەماوەری خەڵکانی ناڕازیی.
نیوەرۆی 17ی شوبات، لەبەردەرکی سەرای سلێمانی، سێ فۆتۆگرافەر بەناوەکانی کامەران نەجم، پژار محەمەدو سەبستیان مایۆر کە ئەمەی سێیەمیان فۆتۆگرافەرێکی ئەمەریکی بو، دەستگیرکران.
لەپاڵ هێزە ئەمنییەکانی پۆلیسو ئاسایش، دەیان چەکداری بێ ناسنامە بەجلی کوردییەوەو بەدارو چەکی جۆراوجۆرەوە، لەبەردەرکی سەرای سلێمانی رێگرییان لەهاتوچۆی هاوڵاتیان دەکردو ئیهانەی ئەو گەنجانەیان دەکرد کە بەبەردەمیاندا تێدەپەرین.
هێزە ئەمنییەکان هێرشیان کردە سەر مامۆستایەکی ئامادەیی بەناوی مامۆستا رزگار لەردەرکی سەراو پاش لێدانێکی زۆر دەستگیرکراو بەرەو شوێنێکی نادیار برا.
بەڕێوەبەری ئاسایشی سلێمانی ئاشکرای کرد کە ئەو ئاگای لەو هێزە سەربازییانە نییە کە بەجلی مەدەنییەوە لەناو شاری سلێمانیدا بڵاوبونەتەوە.
بەشێکی زۆری هێزەکانی پێشمەرگە لەناوچە جێناکۆکەکانی پارێزگای دیالە گوێزرانەوە بۆ قەزای کەلار بەمەبەستی "سەرکوتکردنی" دانیشتوانی ئەو قەزایەو لەبارەگایەکی یەکێتی ئەو هێزانە جێگیرکران.
هێزەکانی ئاسایش لەدەوروبەری ژمارەیەک لەمزگەوتەکانی شاری سلێمانی جێگیرکران بەمەبەستی روبەروبونەوەی هەر کۆبونەوەیەکی هاوڵاتیان کە سەر بکێشێت بۆ ئەنجامدانی خۆپیشاندان.
نیوەرۆی 17ی شوبات لەبەردەرکی سەرای سلێمانی هێزە ئەمنییەکان پەلاماری پارێزەر، هیلال ئیبراهیم-یانداو دوای لێدانێکی زۆر دەستگیریانکردو بەرەو شوێنێکی نادیار راپێچیانکرد.
بەرپرسی مەڵبەندی هەڵەبجەی شەهیدی یەکگرتوی ئیسلامی کوردستان ئاشکرای کرد کە بەشیچوەی ناراستەوخۆ لەلایەن بەرپەرسی مەڵبەندی یەکێتی نیشتمانییەوە هەڕەشەی لێکراوه، لەئەگەری ئەنجامدانی خۆپیشاندان لەهەڵەبجە.
سەرجەم خاڵە پشکنینەکانی یەکێتی لەچواردەوری شاری سلێمانی توندوتۆڵکرانو رێگری لەو گەنجانە دەکرا کە بەنیازبون بێنە ناو سلێمانییەوە، بەتایبەت ئەوانەی گومانیان لێدەکرا بەمەبەستی ئەنجامدانی خۆپیشاندان بۆ سلێمانی دەهاتن.
لەبەیاننامەیەکدا سەنتەری میترۆ بۆ داکۆکیکردن لەرۆژنامەنووسان، ئیدانەی دەستدرێژیو دەستگیرکردنی رۆژنامەنوسو رێکخەری سەنتەرەکە، رەحمان غەریبی کرد کە لەلایەن پۆلیسو هێزەکانی ئاسایشەوە لەبەردەرکی سەرای سلێمانی دەستگیرکرا.
پاشنیوەرۆی ئەو رۆژە ئاوێنەنیوز ئاشکرایکرد کە ئەو کەسانەی لەبەردەرکی سەرای سلێمانی دەستگیر دەکران، دوای لێدانو ئیهانەکردنێکی زۆر، بەپاسی تایبەت رەوانەی فەرماندەیی گشتی هێزەکانی پێشمەرگەی سەر بەیەکێتی دەکران.
لەبەیاننامەیەکدا وتەبێژی بزوتنەوەی گۆڕان رایگەیاند، "پێشێلکردنی مافی مرۆڤ لەهەرێمی کوردستان جێگەی قبوڵکردن نییەو بەتوندی ئیدانەی دەکەین"، هاوکات گۆڕان ئۆباڵی پەرەسەندنەکانی 17ی شوباتی 2012ی خستە ئەستۆی دەسەڵاتدارانی سلێمانییەوە.
سەرلەئێوارەی هەمان رۆژ دەدان کەس لەدانیشتوانی قەزای هەڵەبجە لەچواڕڕیانی قەزاکە خۆپیشاندانێکیان ئەنجامداو دواتر هێزە ئەمنییەکان بڵاوەیان پێکردن.
سەرلەئێوارەی 17ی شوباتی 2012 هێزێکی دەمامکداری تایبەت هێرشیانکردە سەر ژمارەیەک گەنجو پاش لێدانو سوکایەتی پێکردن، سەرجەمیان بەرەو شوێنێی نادیار بران.
وتەبێژی کۆمەڵی ئیسلامیی کوردستان رایگەیاند، "پێویستبو دەسەڵات لەیادی 17ی شوباتدا بەدەم داخوازیی جەماوەرو کەسوکاری شەهیدانو 17خاڵەکەی پەرلەمانی کوردستانو بڕیارەکانی سەرۆکی هەریمەوە بهاتایە، نەک بەم شێوازە ناشارستانیە رەفتاری بکردایە".
دوای ئازادکردنی لەدرەنگانێکی ئەو رۆژەدا، رێکخەری سەنتەری میترۆ بۆ داکۆکیکردن لەمافی رۆژنامەنوسان ئەوەی خستەرو کە پێش دەستگیرکردنی بەشێوەی گەلەکۆمەکیو بەدارو سۆندە لێیدراوە، رەحمان غەریب داواشی لەحکومەتو سەرۆکایەتی هەرێم کرد،" چاوبخشێننەوە بەپەروەردەو هەڵسوکەوتی هێزانە ئەمنییەکاندا".
پاش ئەوەی لەساڵیادی 17ی شوباتدا هێزە ئەمنییەکان دەیان کەسیان دەستگیرکردو بەرەو زیندانە نارەسمییەکان دەیانبردن، قایمقامی پێشوی قەزای مەرکەزی سلێمانیو سەرۆکی لیژنەی ئەمنی ئەو کاتی سلێمانی، زانا حەمەساڵح، وتی، "زانیاریمان لەلا نییەو ئەو کەسانە لای فەرماندەی گشتی هێزی پێشمەرگەن".
ئێوارەی ئەو رۆژە پەیامنێرو وێنەگرێکی کەناڵی (nrt)، لەکاتی بەدواداچونی بۆ گواستنەوەی رەوشی ناو بازاری سلێمانی، لەلایەن هێزە ئەمنییەکانەوە دەستگیرکرا، پێشتریش تیمێکی دیکەی ئەو کەناڵە لە بەردەرکی سەرا دەستگیرکرابون. کە پێکهاتبون لەپەیامنێری کەناڵەکە ناوی کاروان رەحمانو وێنەگرێک.
رۆژی دواترو لە 18-02-2012دا لەبەیاننامەیەکدا لیژنەی داکۆکی لەئازادی رۆژنامەنووسیو مافی رۆژنامەنوسانی سەر بەسەندیکای رۆژنامەنوسانی کوردستان، ئیدانەی هێرشو پەلاماردانی سەر رۆژنامەنوسانی کرد لەساڵیادی 17ی شوباتدا.
⁉️ تایبەتمەندییەکانی بابەت - Meta-data