ناو: هێدی (محەمەد) گۆمەیی
ــ ساڵی 1943 لە شارۆچکەی بەکرەجۆی سەر بە پارێزگای سلێمانی لەدایک بووە، لە هەشت ساڵییەوە کەوتووەتە شاری کەرکووک.
ــ لە 22-10-1963 تا 11-03-1964 لەسەر ئەندامبوون لە یەکێتی قوتابییانی کوردستان لە خولی یەکهەمی حوکمی بەعس گیراو، سەرەتا لە سیخوڕخانە (أمن)ی کەرکووکو پاشان (معتقل عسکری) واتە ئەو بەنگەڵانەی لە کەرکووک بۆ عەمباری لەشکر درووستکرابوو.
ــ لە 02-09-1965دا پاش بەشداری خولێک بە پلەی بریکاری ئەفسەر بووە بە کارمەند لە ڕیزەکانی سپای عیراق.
ــ لە 05-12-1965 تا 24-10-1969 دوورخراوەتەوە بۆ شاری بەسرە لە خوارووی عیراق. لەوێدا درێژەی بە چالاکی کوردایەتی داوەو 3 ساڵ لەسەریەک لە ڕێکخەرە سەرکییەکانی بۆنەی نەورۆز بووە (بەنهێنی) لەگەڵ کۆمەڵێک خوێندکاری زانکۆی بەسرەو فەرمانبەری تری کورد.
ــ لە 25-10-1969دا بەهەمان پیشەی خۆی گوێزراوەتەوە بۆ کەرکووکو پاشان بۆ سلێمانی. لەوێیش وەک ئەندامی کارگێڕ لە ڕێکخراوی سەربازگەی کەرکووکو پاشان سلێمانی (پ د ک) چالاکانە سەرپەرشتی ڕێکخستنی کردووە تا ئەوکاتەی لەلایەن دەزگای زانیارگری سپای عیراقەوە فرمانی دەستگیکردنی دەردەچێت، لە 22-06-1972هەڵدێت بۆ دەڤەری ژێر دەسەڵاتی شۆڕشی کوردیو لە یەکێک لە بنکەکانی لیژنەی ناوچەی شارباژێڕی (پ د ک) دەبێتە کادر.
ــ لە مانگی 10/1972دا دەبێتە بەرپرسی دەزگای پاراستن لە پێنجوێنو پاشان هەڵەبجە تا نیسکۆی پاش ڕێکەوتنە نگریسەکەی جەزایر ئازاری 1975 لەنێوان شای ئێرانو سەددامی عیراق.
ــ کاتی گەڕانەوەی لەگەڵ کۆمەڵێ گەڕاوان (عائدون) بەمەبەستی لێکۆڵینەوە شەش هەفتە بەندکراوە لەبەڕێوەبەرایەتی زانیارگری گشتی (مدیریە الإستخبارات العسکریة) لە بنکەی شالیارگەی سپای عیراق، ئەوە لەکاتێکدا هیچ بەرپرسێکی ڕێکخستنی پارتی یان پلەدارانی هێزی پێشمەرگە لە دوو ڕۆژ پتر نەکەوتوونەتە بەر لێکۆڵێنەوە. مەبەست لەو زۆر هێشتنەوەی ئەو و جەمالی حاجی سەعید (کاتی ڕێخستنی ناوشار لەگەڵیدا ئەندامی کارگێڕی ڕێکخراوی سەربازگای سلێمانی بوو) بۆ ئەوەبوو ناوی هەڤاڵە هەڵنەهاووەکانی ڕێزی سپای عیراقیان بدەنێ بەڵام بێهوودە ئازادیان کردن.
ــ پاش نیسکۆی شۆڕشی ئەیلوول گەڕاوەتەوە بۆ شاری سلێمانی، پاش دەرکردنی لەڕیزی سپای عیراق، ماوەی دوو ساڵ لەکەرتی تایبەت کاریکردووەو پاشان بووەتە فەرمانبەر لە کۆمپانیا بازرگانییەکانی میری لە سلێمانی تا ئەو ڕۆژەی لەگەڵ ئەندامانی خێزانی لە 25-09-1987دا هەڵهاتوون بۆ ئێرانو لەوێوە بۆ هەندەران. لەو ماوەیەی ژیانی سلێمانیشدا چالاکانە لەڕیزاکانی (پ د ک)دا درێژەی بەخەبات داوە.
ــ پاش 9 مانگ مانەوە لەئێرانو 2 مانگ سووریاو نزیکەی یەک مانگ ڕێگە بەرەو هەندەران، لە 08-09-1988دا لەوڵاتی سوید گیرساوەتەوە. لەو کاتەوە لە سویدە وازی لە گشت ڕێکخستنێکی ڕامیاری هێناوە تەنها وەک کوردێکی هزر کوردستانی لە کۆڕو کۆمەڵەی کولتووریو کۆمەڵایەتی کوردیدا کاردەکات و دەکۆشێت بۆ پەیداکردنی دۆست بۆ نەتەوەکەی.
بەرهەمەکانی
ــ دادگایی ئەنفال وەرگێڕان بڕوانە ماڵپەڕی (کۆشکی کورد)
ــ زەردەشت و ئامۆژگارییەکانی وەرگێڕان بڕوانە ماڵپەڕی (کۆشکی کورد)
ــ گەلێکی پەژموردەو نیشتمانی پەرت وەرگێڕان بڕوانە ماڵپەڕی (کۆشکی کورد)
ــ نووسین لە گۆڤارو ڕۆژنامەی چاپیو ئەلیکترۆنی بڕوانە بەشێکی لە ماڵپەڕی (کۆشکی کورد)
ــ ڕێکخەر، سەرپەرشتیارو خاوەنی ماڵپەڕی کولتووری (کۆشکی کورد http://www.koskikurd.com) ـە
ــ بەشدار لە فلیمی ڤیدیۆیی (ئاسۆ 1989) و (چارەنووس 1991) وەک ئەکتەرو دیکۆریست لەگەڵ کۆمەڵێک کوردی پەنابەرو بە سەرپەرشتی دەرهێنەر سەلمان کاکەیی