ناڤێ وى یێ دروست عەبدولقادر عەبدال عەبدولقادر حسین لسالا 1946 ل گوندێ شێخکا ل دەڤەرا شێخان ل بنەمالەکا بناڤ و دەنگ ژ دایک بوویە، بابێ وان ب عەبدالێ نێچیرفانىیێَ ناڤدار بوو، وشەش برا هەبوون ب عەمر ژ وى مەزنتر بوون، دگەل خوشکەکێ بناڤی مسریخان
1. شەکر عەبدال شێخکى / بو ماوەیەکێ دریژ جێگرى حسو میرخان دوڵەمەرى بوویە، هەروەکى سەرۆک بارزانى دپەرتۆکا خو یا دوماهیێ بەحس ژێ کرى.
2. تەیار عەبدال شێخکى / پێشمەرگەبوو ل شورەشا ئەیلولێ زۆر پلێت لەشکەرى وەرگرتینە ل ساڵا 2008 ل گۆندێ شێخکا چوویە بەر دلوڤانیا خودیێ مەزن.
3. جەهوەر عەبدال شێخکى / پێشمەرگەبو ویە ل شۆڕەشا ئەیلولێ لسالا 1995 جویە بەر دلوڤانیا خودێ، دهەمان سالدا کۆڕێ وى سەکڤان ژى هاتیە شەهید کرن.
4. بشار عەبدال شێخکى / پێشمەرگەبوویە ل شورەشا ئەیلولێ نها لدهوکێ دژیت.
5. حاجى عەبدال شێخکى /دەرجویێ کولیژا کارگێرى و ئابوورى بوو-لسالا 2005 لدهوکێ چوویە بەردلوڤانیا خودێ.
6. تەیمور عەبدال شێخکى /ئامر بەتەلیون بۆ ل شێخان و ل سالا 1974 د شەرەکى دا ل دۆر ئازادکرنا باعەدرێ دهێتە شەهیدکرن.
7. مسریخان عەبدال شێخکی / (هەیڤا 4/1962) دگەل کجا خۆ یا بناڤێ (جویرا) و زاڤایێ خۆ کۆ پسمامێ شەهیدێ ناڤبرى بوو بناڤێ عادل حسێن شێخکى دگەل (2) زاروکێن وى ل گوندێ بیرێ ل دەڤەرا شەمکان ب توبارانکرنا فروکێن دوژمنی دهێنە شەهیدکرن.
• شەهیدێ ناڤبرى ب سەر و سیمایێ خویێ ماقویل وجوان بوو، وحەزا کوردینیێ وبەرەڤانیکرن ژهەژاران وپێشمەرگەى ومەردینیێ وجورئەت و زیرەکاتیێ یێ بەرنیاس بوو،و هەر شەرەکێ شەهیدنورى شێخکى دگەل دابا یان سەرکێشیا پێشمەرگا دشەریدا کربا پالدەر و زیرەکینیەکا مەزن ددا پێشمەرگەى و زۆر ورەیێن پێشمەرگەى بلند دکرن. و وەکهەڤ سەحدکرە هەمى پێشمەرگان بیێ سەحکەتە خزماتیێ یا عەشیرەتیێ وگونداتیێ بەلکو زور جاران زێدەتر قەدر و بها و رێزگرتن ژ پێشمەرگێن نە مروڤێن وى ونە ژ گوندو عەشیرەتا خۆ دگرتن.
شەرێن شەهیدێ ناڤبرى بەشدارى تێداکرى چ وەکو پێشمەرگە یان
سەرکردە هەر ل ساڵا (1961 1975)
وەکو یا دیار دەڤەرا شێخان و بتایبەتى دەڤەرا شەمکانێ هەر ژگوندێ شەهیا هەتا گۆندێ خورت و دەکان ل شۆڕەشا مەزنا ئەیلولێ دەڤەرەکا سنورى بوو دگەل دوژمنى، ودەر ئەنجامدا دوژمنى بەردەوام ب تەیارە وتوب تانگ ودەبابە و زر یپووشان هێرش دئینانە سەر دەڤەرێ، وزۆر ئەندامێت خێزان وبنەماڵا شەهیدى پلێت بەرپرساتیێ هەبوون وبەرپرس بوون ژپاراستنا دەڤەرێ ژهەر دەست درێژى وهێرشەکا دوژمنى.
1. شەرێ بامەزرێ (ل ئەیلولا سالا 1961 و ل دە سپێکا شورەشێ دگەل حکومەتا عیراقا وى سەردەمى وجاش و جەر دەجیا.
2. شەرێ مرێبا (ل سالا 1962) ودڤى شەریدا پێشمەرگە (محەمەد امین میرخان بارزانى) دهێتە شەهید کرن.
3. شەرێ سەرێ بریفکا (ل سالا 1962) دگەل جاش وجەردەجیا.
4. شەرێ رزگارکرنا ئەتروش (ل سالا 1962) کو ئەڤ شەرە ب جاڤدێرى وسەرپەرشتیا راستەوخو یا مستەفا بارزانى بوویە.
5. شەرێ (راس عین) لدەڤەرا ئاکرێ(ل سالا 1962) لدژى حکومەت وجاشان.
6. شەرێ دەڤەرا زاوێتە (ل سالا 1962 ل) دژى جاشان.
7. شەرێ دەڤەرا باگێرا و لومانا و ئاشەوا (ل سالا 1963).
8. شەرێ شەمکانێ (ل سالا 1963) دەما کۆ لەشکەرێ دەولەتا سوریا یێ ب سەرکێشیا (فهد الشاعر) هێرش کرى یە دەڤەرێ، وزۆر کەس ولایەن ژکوردینێ خائین بووین ودەڤەر رادەستى دوژمنى دکر، بەلێ شەهیدى وهەڤالێن خو جەپەر بەر نەدان وشەرکر،و (13)ژ لەشکرێ دورمنى کوشتن.
9. شەرێ هنداڤى گەلیێ بێسرێ(ل سالا 1964)
10. شە رئ مە لکیشان ل سالا 1965،پێشمەرکە (حسێن رکاڤایى)شەهید
بیت.
11. شەرێ درینێ ل نێزیک مرێبا و د ڤى شەریدا پێشمەرگەک کو برازایێ (عیسا بانى)بوو شە هید بوو.
12. شەرێ رزگارکرنا سەرێ ئەتروش ل سالا 1966.
13. شەرێ باشیکێ (فازلیێ) ل سالا 1967،کۆ چەندین لەشکەر و جاش
هاتنە گرتن ودەستە سەرکرن.
14. شەرێ پرا ئەتروش ل سالا 1969،د ڤى شەریدا پێشمەرگە(عومەر حەسەن) پسمامێ شە هیدێ ناڤبرى شەهید د بیت،دیسان پێشمەرگە (مودیر مشو شێخکى) د هێتە بریندارکرن.
15. شە رێ چیاپانکى ل سالا 1969،کو د ڤى شەریدا پێشمەرگە(عەبدى بارانى شێخکى)ژ لایێ دوژمنى ڤە دهێتە دەستە سەرکرن و زور دهێتە ئەشکەنجدان و ئێشاندن پاشان ل هەڤپەیڤینێن رێکەفتنا -11-ى ئادارێ دهێتە ئازادکرن.
16. شەرێ بیرو باسڤرا ل سالا 1969 کو بشەرێ بەرەڤانیکرنێ ل گوندێن بیر و باسڤرێ د هێتە بناڤکرن.
17. شەرێ گەلیێ قێرکێ ل سالا 1969،د ڤى شەریدا_22_کەس ژ لەشکەرێ دوژمنى هاتبوو نە ئیخسیرکرن و_2_لەشکەرێت دوژمنى هاتبوو نە کوشتن و هژمارەکا زور یا چەک و تەقەمەنى دەستکەفتیێن پێشمەرگەى بوون.
18. شەرێ کورێ کوخیێ ل سالا 1973،د ڤى شەریدا_18_کەس ژ لەشکەرێ دوژمنى د هێنە ئێخسیرکرن،و هژمارەکا زور ژ چەک و تەقەمەنیان د بنە دەست کەفت بو پێشمەرگەى.
19. شەرێ خورت و دەکان،دەما کو دوژمنى هژمارەکا زور ژ زاروک و ژن و بێگونەها ل شکەفتا دەکان سوتین و شەهیدکرین،ئاها ل وى دەمى شەهید(نورى شێخکى) د گەل هەڤالێن خوو شیان دەڤەرێن شێرەسوار و باژێرە و بانیرێ و باقوسپێ ژ جاش و دوژمنى ڤەمالن و پاقژ بکەن و تولا شەهید و بێگونەها ڤەکەن.
20. شەرێ باعەدرێ ل سالا 1974،پشتى کو هێرشەک ژ لایێ پێشمەرگەى ڤە د هێتە کرن بو سەر باعەدرێ ب ئارمانجا ئازادکرنا وێ ژ دەستێت دوژمنى،بە لێ جهێ داخێ یە د ڤێ هێرشێدا پێشمەرگێ سەرکردە(تەیموور عەبدال شێخکى) کو ئامر بەتالیون بوو برایێ شەهیدێ ناڤبرییە د هێتە شەهیدکرن،دیسان هەر دوو پێشمەرگە(عیسا بانى)و(عەزیز شەهى) د ڤێ هێرشێدا د هێنە شەهیدکرن،بەلێ بتنێ پشتى ببورینا _14_روژان ژ شەهید بوونا ڤان قەهرەمانا شەهید(نورى عەبدال شێخکى) دگە ل چەندین هەڤالێت خو رادبیت ب رێکئێخستنا هێرشەکا مەزن بو سەر باعەدرێ و ددەرئەنجامدا باعەدرێ دهێتە ئازادکرن ژ دەستێ دوژمنان و گیانێ شەهیدان شاد د بیت،و دڤى شەریدا پێشمەرگە(ئیسڤ ترک) کو خەلکێ کوردستانا باکوور بوو بریندار د بیت،و ڤى قەهرەمانى ژى د پەرتوکا خودا یا کو لژێر ناڤێ(گەریلایەکێ بێ سنوور) بدرێژى باسى ڤى شەرى و قەهرەمانیا پێشمەرگەى و ڤان شەهیدان کرى یە.
21. شەرێ گەلیێ عەمەر ئاغا ل سالا 1974،کو ب سەرپەرشتى و چاڤدێریا راستەوخوو یا شەهیدێ جوانەمەرگ(ئیدریس بارزانى)بوو، و بشەرێ هات و نەهاتێ ئەڤ شەرە ژ لایێ سەرکردێ کورد(ئیدریس بارزانى)ڤە هاتبوو بناڤکرن،د ڤى شەریدا پشتى کو شەهید(نورى شێخکى)و هەڤالێت وى رواەکێ باش گێرایى ژ بو بەرەڤانیکرنێ ژ گەل و وەلاتى،شەهید(نورى شێخکى)کو د ڤى شەریدا ئامر بەتالیون بوو ب گرانى دهێتە بریندارکرن د هێتە رەوانەکرن بو وەلاتێ ئیرانێ ژ بو چارەسەریێ،و لژێر چاڤدێریا راستە و خوو یا شەهیدێ جوانەمەرگ(ئیدریس بارزانى)د هاتە چارەسەرکرن.
هەلبەتە هژمارەکا زور ژ ڤان شەرا ب شەرێن مەزن گران و ناڤدار د هێنە نیاسین کو براستى داستان بوون د شورەشا مەزنا ئەیلولێ دا هاتینە تومارکرن مینا شەرێ هاتنا لەشکەرێ عیراق و دەولەتا سوریێ بهەڤرا بو سەر کوردستانێ-شەرێ گەلیێ عەمەر ئاغا-شەرێ باعەدرێ-شەرێ مرێبا-شەرێ ئەتروش....هتد،چەندین شەرێن دى ژى وەکو بیسە و کەمینا بووینە ل بەر دوژمنى هاتینە دانان.
پلێت شەهید(نورى شێخکى)د شورەشا مەزنا ئەیلولێدا ل سالێن(1961-1975)وەرگرتین
پێش سالا 1967 پلێت لەشکەرى نە هاتبوو نە دانان د ناڤ شورەشێدا و شەهید(نورى عەبدال شێخکى) سەرقوول بوو.
ل سالا 1967 بوویە سەر لق (ئامر سریە مغاویر)کو هێزەکا تایبەت بوو.
ل سالا 1969 بوویە بەرپرسێ گشتى یێ هێزێن بەرگرى مللى یان ل هەمى دەڤەرا شێخان.
ل سالا 1971 بوویە سەرپەل.
ل سالا 1974 و پشتى شەهید بوونا برایێ وى(تەیموور شێخکى)،شەهید(نورى شێخکى) د بیتە ئامر بەتالیون.
ل 22-03-1975 و پشتى شکەستنا شورەشا مەزنا ئەیلولێ شەهیدێ ناڤبرى د گەل خێزانا وى د هێنە ڤەگوهاستن ژ بو باژێرێ(سماوە) ل باشوورێ عیراقێ،دیسان برایێن وى ژى د گەل خێزانێن وان د هێنە ڤەگوهاستن ژ بو باژێرێ (حلە) ل باشوورێ عیراقێ.
(شەهید نورى عەبدال شێخکى و شۆرەشا گۆلانا پێشکەفتنخواز)
دۆژمنى وە هزر د کر،کۆ ب دەربەدەرکرنا کەساتیێن شۆرەشگێر بو بیابان و باشوورێ عیراقێ،دێ روحا شۆرەشگێریێ د ناڤا وان کەساتیان دا سست و خاڤ کەت،وەلێ بەرۆڤاژیا هزرکرنا دۆژمنى،گەرما دەشت و بیابانا تێهن و گەرماتیەکا دژوارتر د دایێ و هەر دەم د زانى کۆ ئاگرێ شۆرەشەکا وەها مەزن هو زوى ب زوى ناڤەمریێت بەلکو دێ هەر جریسک ژێ پەشن.
هەر چەوا بیت ل سالا 1977 ێ و جارەکا دى شەهیدێ ناڤبرى ل(سەماوە) و د گەل برایێن وى ل (حلە) ڤەگەریانە کوردستانێ و ل باژێرێ(دهوک)ئاکنجى بوون.
ژ بەر حەز و ڤیانا پڕ مەزن ژ بۆ شۆرەش و کوردینیێ شەهید(نورى شێخکى) بۆ چەندین جاران د هێتە گازیکرن ژ پال دەزگەهێن ئەمنا بەعسییان و چەندین جاران ژى بو ماوەیێن کورت یێن ئێک رۆژى و دوو رۆژى د هێتە دەستەسەرکرن، هەتا باوەرى بۆ چێبووى کۆ پێدڤى یە جارەکا دى تەڤلى شۆرەشا گۆلانا پێشکەفتنخاز ببیت،ئەو بو ل سالا 1983 ێ د گەل(36)زەلامان ب ژیانا بندەستیێ قایل نەبوون و چوونە د ناڤ رێزێن شۆرەشا گۆلانێ دا و جهێن هەژى د ناڤدا گرتن و بفەرمانا شەهیدێ جوانەمەرگ (ئیدریس بارزانى)،شەهیدێ ناڤبرى د بیتە بەرپرسێ رێکخراوەکا لەشکەرى بناڤێ رێکخراوا شەهید(تەیموور شێخکى) بسەر (ل.ن) شێخان ڤە.
ل وى دەمى ژى بەشداریێ د چەندین شەران دا د کە ت وەکو:
شەرێ دێرەلوکێ.
شەرێ سەرێ کانیکا،دەمێ دوژمنى هێرش ئینایە سەرێ سێدەرا(سەرێ کانیکا).
هێرشکرن بۆ سەر هێزێن دوژمنى ل مرێبا و ئیسڤنێ.
هێرشکرن بۆ سەر رەبیێن دوژمنى ل سەرێ زاویتە.
هێرشکرن بۆ سەر رەبیێن دوژمنى ل زەنگلو.
هەژى یە بێژین کۆ چەندین جاران پەیوەندى ب شە هیدێ ناڤبرى د هاتە کرن ژ ئالیێ کەساتیێن عەشائیرى و بەحسا (أمتیازاتێن) باش بۆ د هاتەکرن ژ موستەشاریێ و پارە و سەیارەیان،هەر وەکو پێش بهێتە د ناڤ شۆرەشا گۆلانێ ژى دا هەمان داخازى و (امتیازات)بو د هاتنە دان کۆ دەست پاڤێتە جەکێ خیانەتێ،بەلێ شەهید نورى شێخکى بێ دوو دلى ئەڤ هەمى پەیوەندى یە د برین و هەمى (أمتیازات)ێت دوژمنى رەتدکرن و یێ رژد بۆ بەر دەوامیێ بدەتە خەبات و قوربانیدانێ ژ بۆ کورد و کوردستانێ.
هەتا سالا 1988 ێ و ئەنفالێن رەش، کۆ ب نەچارى جارەکا دى و پشتى لێبورینا رژێمێ (کۆ بتنێ بناڤ لێبورین بوو)ئەوى و زەلامێن د گەلدا خو رادەستى دوژمنى کرن و ئینانە(شێخان)و ڤەکولین د گەلدا هاتنەکرن و پاشى بۆ چەندین رۆژان ئەو و هەر دوو کۆرێت وى یێن مەزن و زەلامێن د گەلدا د ناڤ کەلها نزارکێ دا مان،و پاشى بەرێ وان ژى وەکو هەزاران ژ خەلکێ د ناڤا شۆرەشێدا کەتە جێژنیکان و بەحرکێ ل مەها 9/1988 و پشتى مەهەک و یازدە رۆژان و بدروستى ل شەڤا 17|18-10-1988 ێ ئەمنا رژێما بەعس د هێنە بەردەرێ خیڤەتێ شەهیدێ ناڤبرى دەستەسەر د کەن ب بهانە یا وێ چەندێ کۆ خەبەر(جڤین)داینە (صدام حسین).
پشتى چەندین هاتوو چوو ژ ئالیێ کۆر و برا و مروڤێن ویڤە رێڤەبەرێ ئەمنا بەعسیا ل (هەولێر) رۆى ب رۆى کەس و کارێت وى د بێژیت: مە سێدارەدا و گەهشتە حەقێ خو ژ بەر کۆ مرۆڤەکێ نە راوەستیاى بو و (تخریب)ا خو بەردەوامى پێ ددا.
بڤى رەنگى تەرمێ پیروزێ(شەهید نورى شێخکى) نە هاتە رادەستکرن (تەسلیمکرن) ژ ئالیێ رژێمێ ڤە بو کەس و کارێت وى،بڤێ چەندێ ترس و سەهمەکا مەزن بۆ خەلکێ جێژنیکان چێبو و خەلکێ وێرێ ژ بۆ گرتن و سێدارەدانا وى پر عاجز و غەمگین بوون،جنکو شەهیدێ ناڤبرى یێ بەرنیاس بۆ د ناڤ خەلکێ کۆمەلگەها جێژنیکان کۆ بهەمى شیانێت خوو بەرەڤانى ژ خەلکێ بێگونەهێ کۆمەلگەهێ دکر دژى هەمى سیخوور کەسێن پیسێن بەعسیان بێى هیچ ترس و سەهمەکێ ژ وان بکەت و خەلکێ ئاکنجیێ جژنیکان هەمى ڤێ دیدەڤانیێ بۆ شەهیدێ ناڤبرى ددەن،دەما ئەو کەسێ ئیخبارى دایە رژێما بەعس لسەر شەهیدێ ناڤبرى کۆ جڤین داینە(صدام حسین)،کۆ ئەو کەس زۆر کەسکێ پیس بێ رەوشت بو هەر وەکو نڤیسەر(عەلى بەندى) د پەرتۆکا خۆدا یا لژێرناڤێ(ئەنفالکرنا بەهدینان)پشکا دوویێ بدرێژى باسى دڕندى و هۆڤەتیا وى کەسى د کەت دا چەند ئیزعاجا خەلکێ کومەلگەهێ د کر، لەوما دەما ئەڤ کەسێ نە باش بدەستێ کۆڕێ شەهیدێ ناڤبرى ل باژێرێ(مویسل)هاتیە کوشتن بدەهان و سەدان پیرۆزباهى ل بنەماڵا وان هاتنەکرن ژ ئالیێ خەلکێ کۆمەلگەها زۆلم لێکرى(چێژنیکان).
دەما عیراق ژ ئالیێ هێزێن هەڤپەیمان هاتیە رزگارکرن کۆرێن شەهیدێ ناڤبرى شیان فایلا بابێ خو بدەست پێخن و د ڤێ فایلێ دا دیار د بیت،کانێَ دەستهەلاتا بەعسیا ژ حزبێ و ژ ئەمنێ چەند دویڤچونا شەهیدى کریە و چەند کەس تەرخانکرینە ژ بۆ ڤەگۆهاستنا ئەخباریا ل سەر وى لدەمێ شۆرەشێ،دیسان کا چەند مەفرەزێن ئیستخباراتى تەکلیف کرینە ب شەهیدکرنا وى.
(چەند خەسلەتێن شەهید نورى شێخکى پێ ناسیار)
ژ بلى زیرەکى و وێرەکیا وى و ڤیانا وى یا بێ سنوور ژ بۆ کوردینیێ ب چار تشتێن دى د هاتە نیاسین:
1.مەردینى و ناندەهى.
2.ب سەگڤانیا خو.
3.بسەر و سیمایێ خۆ یێ جوان ماقویل.
4.ب سوحبەتێن خۆ کۆ هەتا نوکە ژى گەلەک حیکایەت و سوحبەتێن وى ژ سەر دەڤێ کادر و پێشمەرگەیى د هێنە ڤەگێران و گۆتن.
(بەردەوامیا خەباتى ژ بۆ کوردینیێ)
پشتى شەرێ ئازادیا عیراقێ هەڤژینا شەهیدێ ناڤبرى (زەلیخا محەمەد)ژى د چیتە بەردلوڤانیا خۆدێ،لەوما نها شەهیدى(7)کۆر و (5)کچ ل پشت خو هێلاینە :
1.عەبدال/دەرچوویێ کۆلیژا یاسایێ یە،ئەندام بەشێ (م.ناوەندیە یا هەلبژارتنا) ب نڤیسەر و رەوشەنبیر ناسیارە.
2.بەرۆژ/ نقیب ل فەرماندەیا زێرەڤانى لدهۆکێ.
3.نزار/ ملازم ل فەرماندەیا دهۆک.
4.ئێشهاد/ ل ئوروپا دژیت.ژ دایکبوویێ سالا 1975 دەما شۆرەش شکەستى لەوما ئەڤ ناڤە بابێ وى دانایە سەر.
5.ناڤسەر/ دەرچوویێ کولیژا کارگێرى و ئابووریە،ئەندامێ(م.سکرتاریەتا)قوتابیان بوو،ب نڤیسەر و رەوشەنبیر ناسیارە.
6.کاوە/دەرچوویێ پەیمانگەها هونەرێن جوانە، بەرپرسێ بەشێ راگەهاندنێ لهەیڤا سورا عراقى/ لقى دهوک.
7.بێکەس/کادرە ل(ى.ل.د.ک) ناوەندا باڵا یا دهوک،قوتابى یە ل پەیمانگەها هونەرێت جوان/ دهوک.
8.پەروین/رێڤەبەرا ماڵە.
9.تاریک/دەرچوویا کولیژا پزیشکى فیتەرنێرى،فەرمانبەرە ل زانکویا دهوک.
10.خوزیک/دەرچوویا کولیژا پەروەردا بنیات-زانکویا دهوک/ نها ماموستایە.
11.نێزیک/ دەرچوویا پەیمانگەها بەرهەڤکرنا ماموستایێن کچە/نها ماموستایە.
12.هیڤى/ قوتابى یە ل کولیژا ئادابێ-پشکا زمانێ ئینگلیزى/زانکویا دهوک.
ئانکو شەهیدى کومەکا کەسان ل پشت خۆ هێلاینە و هەمى د پەروەردەکرینە ب پەروەردەکا نەتەوەیى و نشتیمانپەروەرى و د چەکدارن ب زانستێ ژ بۆ بەرەڤانیکرنێ ژ گەڵ و وەلاتى،و دێ د بەردەوام بن لسەر بزاڤ و خەباتێ داکو هەمى ئارمانجێت گەل و وەلاتێ وان جێبەجێ ببن کۆ ئەوژى ئاڤاکرنا دەولەتەکا کوردى یا سەربخو و ئازاد.
ژێدەر :
1.عەلى بەندى،ئەنفالکرنا بەهدینان، بەرگێ دوویێ.
2.ئیسڤ ترک،پێشمەرگەکێ بێ سنوور، لشۆرەشا ئەیلوولێ پێشمەر گەبوو.
3.دیدار د گەل (یونس مامیزدینى) کۆ ل شۆرەشا ئەیلولێ سەرقوول بوو.
4.دیدار د گەل (حسین عەبوى) کۆ لشۆرەشا گولانێ بەرپرسێ رێکخراوا شەهید على بوو.
5. دیدار دگەل (شەکر عەبدال) کو لشورەشا ئەیلولێ جێگرێ ئامر هێزێ شێخان بوو.
6.دیدار دگەل (جەمیل سەعدو) کو لشورەشا ئەیلولێ پێشمەرگەبویە.
[1]