ئێک ژ گۆندێن گەلەک کەڤنارە یێن کو گرێداى (دەشتا سپنەى) ڤە یە، دۆیراتیا وێ نێزیکى(52کم) یە ژمەڵبەندێ پارێزگەها دهۆکێ ژلایێ باکوورى ڤە، و دکەڤیتە رۆژئاڤ فروکەخانا (بامەرنێ) دناڤبەرا چیایێ مەتینا (2080م) سەر رویێ دەریایێ و (چیایێ گارە) 2160م سەر رویێ دەریایێ،وسنوورێ وێ یێ جوگرافى ب ڤى رِەنگێ ل ژێرى یە:
- ژلایێ ژوورى(باکوورى)ڤە : گۆندێ بارزانکا(شرتێ)یە
- ژلایێ ژێرى(باشورى)ڤە: گۆندێ (دۆلا سپنە)یە
- ژلایێ رۆژهەلاتى ڤە: گۆندێن (تنێ)و(کولى)یە
- ژلایێ رۆژئاڤاى ڤە: گۆندێ (خلبیش)ە.
ئاکنجى یێن گۆندى:
ئاکنجى بوویێن ڤى گۆندى ژئایینێ (فەلەکاتیێ) نە، ل سەر هزروبیرێن کاسولیکى (کلدانى)، ل دویڤ سەرژمێرى یا سالا(1957)ێ ژمارا خەلکێ وێ نێزیکى (524) کەسان بووینە، و ژمارا خانیان ل سالا(1961)ێ نێزیکى (120) خانیان بووینە وئاکنجى بوویێن وێ ژى پتر ژ(150)ى خێزانان، وهەر ژ ڤێ دیرۆکێ ئاوارەبوونێ دەست پێکرى یە بۆ باژێران هەروەکى گوندێن دیتر یێن فەلەیان یێن کو دکاودان وسەروبەرەکێ نەسروشتى دا دبورین،و ل سالا(1988)ێ گۆند هاتیە کاڤل کرن د کریارا ئەنفال کرنا دەڤەرا بەهدینان دا،وپشتى بەرقەراربوونەکا رِێژەیى بەشەک ژخێزانێن گۆندى ژڤرینە ڤەگۆندى و لێ جهواربووینە پشتى سەرهەلدانا بهارا سالا(1991)ێ، و هەروەسا پشتى کەفتنا رژێما بەعسا عیراقێ ل سالا (2003) ێ یێ ڤەگەریان و ئاکنجى بوون دزێدە بوونێ دابوویە کو ل دویڤ سەرژمێرى یا ئەیلولا سالا (2005)ێ ژمارا خەلکێ وێ (400)خێزان بووینە دناڤبەرا یێن دناڤ وەلاتى و یێ ل مشەختییێ کودبنە (1724) کەس ژوانا (955) ل ناڤ وەلاتى و (769) ژى ل مشەختییێ.
ناڤکرنا گۆندى:
بووچوونا ل دۆر ناڤکرنا ڤى گۆندى وەسان دهێتە ڤەگێران : کو دبیتن ناڤێ ڤى گۆندى هاتبیتە وەرگرتن ژ ناڤێ ئێکەم کەسێ لێ ئاکنجى بووى ل سالا(550 ى یێ بەرى زایینى) کو ناڤێ وى (داودو) بوویە، کو ئەڤە (7) برا و خویشکەکا بتنێ بووینە، ل هەرێمەکا تورکیا، کو دهێتە ڤەگێران ودبێژن:کو هندیکە کورِێ میـرێ حوکمدارێ هەرێما تورکى بوویە، بەرتەنگى یا خویشکا وان کرى یە، ول دەمێ برایێن وێ ب ڤێ چەندێ ئاگەهدار بووین و زانى، ل بەر کورِێ میرى دانایە وکوشتى یە و مشەخت بووینە ژ ڤێ هەرێمێ و ژێک جودا بووینە و هەر ئێک ل گوندەکێ ل باکورێ عیراقێ ئاکنجى بووینە ژ بەر ترسا تول ڤەکرنێ، ئەو ژى ب ڤى رِەنگێ ل ژێرى:
ز نــــــــــاڤ دەڤەر (گوند)
1 داودو داودیێ
2 کەژو مرکا
3 شابو مرکا
4 بیجو بیجوایێ
5 هیدو تیارێ
6 تاجی کیرامون
7 بکو (بنیامین) هزار جوت
قوتابخانا گۆندى:
قوتابخانا گۆندێ داوودیێ یا سەرەتایى یا تێکەل ل سالا(1953)ێ یێ یا هاتیە دامەزراندن و ژ دامەزرێنەرێن وێ ییًن پێشەنگ مامۆستا (بنیامێن حەداد) ژ(ئەلقوش) و مامۆستا (یوحەنا یوسف) ژ(ئەرادنا) بووینە.
ژیدەر/ پەرتۆکا (قریة الداؤودیة بین الماضی والحاضر)، إسحق خزقیل إسحق زیا، 2006.