پێنجوێن دەکەوێتە 105کم، ڕۆژهەڵاتی #سلێمانی# و (15کم) لە سنووری ئیرانەوە دوورە، ژمارەی دانیشتوانەکەی نزیکەی 20 هەزار کەسە و بەپێی ئامارەکانی #یەکێتی کەمئەندامانی کوردستان#، لە شارەکەدا 475 کەمئەندام هەیە. هەروەها بە گوندەکانی چوار دەورییەوە ژمارەی دانیشتوانەکەی دەگاتە 40 هەزار کەس و ژمارەی کەمئەندامەکانیشی لە هەزار کەس زیاتر دەبێت.
پێنجوێن ساڵی 1950 کراوە بە مەڵبەندی قەزا و ئیتر لە ڕووی ئاوەدانییەوە زیاتر گەشەی کردووە، هەموو دامەزراوە خزمەتگوزارییەکان و پێداویستییەکانی ژیانی شارستانی تێدا بووە بۆ نموونە: فەرمانگە حکومییەکان، میوانخانە، گەرماو.
لەئێستاشدا پێنجوێن نەخۆشخانەیەکی گەورە و قوتابخانە و باخچەی تێدایە و پێش ماوەیەکیش بانکێکی تیادا کرایەوە. هەروەها 24 کاتژمێر کارەبای نیشتمانی هەیە، و تۆڕی ئاو و ئاوەڕۆشی تێدایە، زۆربەی شەقامەکانیشی قیرتاو کراون. [1]