مامۆستای پەروەردەکار و ئاشقی وشەی کوردی عومەر ساقی (1913-1973) لە سەرەتای سییەکانی سەدەی ڕابردوودا بووەتە مامۆستایەکی پەروەردەکار لە قوتابخانە سەرەتاییەکانی #کوردستان# و زۆر بەدڵسۆزییەوە نەوەی نوێی کوردی پێگەیاند و لە پەنجاکانی ئەو سەدەیەش کرابە سەرپەشتیاری پەروەردەیی و زۆری حەز دەکرد هەموو وشەیەکی عەرەبی بکات بە کوردی و فێری قوتابییەکانی بکات و تەنانەت ناوی خۆیشی کردبووە کوردی و لە جیاتی عومەر ساقی تەمەنی ئاودێری بەکاردەهێنا هەرچەندە وەرگێڕانەکە پڕ پێستی واتای عومەر نەبوو، بەڵام هەرشانازی بەم ناوە کوردییەی خۆیەوە دەکرد.
مامۆستا عومەر ساقی ڕۆڵێکی بەرچاوی هەبوو لە دامەزراندنی #یەکێتی نووسەرانی کورد# - لقی #هەولێر# و کاتێک دکتۆر #مارف خەزنەدار# وەک نوێنەری مەڵبەندی گشتی بۆ باسی کردنەوەی لقی هەولێر لە بەغداوە هاتە هەولێر لە 1970-08-15دا لە پەرتووکخانەی گشتی لەگەڵ پتر لە 15 نووسەری ئەم شارە کۆببووە وە و مامۆستا عومەر ساقی یەکێک بوو لەو ئەدیبانە کە بریتی بوون لە محەمەد مەولوود مەم و مەلا شەریفی ڕەنگەڕێژانی و کەریم شارەزا و عومەر ساقی و مەدحەت بێخەو و بەدرخان سندی و پیرباڵ مەحمود و عەبدوڵڵا پەشێو و یوسف دەرگەڵەیی و هیی دیکە و لەگەڵ عەبدووڵڵا حەداد و و مەحموود زامدار و بڕیاردرا داواکارییەک بۆ کردنەوەی لقی یەکێتی نووسەرانی کورد لە هەولێر پێشکەش بکرێت و کە لە 1971.01.15یشدا کۆنفراسی یەکەمی لقەکە بەسترا.
داوا لە مامۆستا عومەر ساقی کرا خۆی بۆ دەستەی بەڕێوبەری لقەکە بپاڵێوێ، کەچی ڕازی نەکرد و وتی ئەم ئەرکەم پێ هەڵناگیرێ و من لە گۆڕەپانی بۆ شاعیر و نووسەرە گەنجەکان چۆڵ دەکەم.
بەڵام بەردەوام لە هەموو کۆڕو سیمینار و کۆنفرانس و کۆنگرەکانی یەکێتی نووسەران بەشداریی دەکرد و پێشنیاری بە کەڵکی پێشکەش دەکرد و هەمێشە پێی لەسەر هەڵوێستی کوردایەتی و بەرژەوەندی وێژەی کوردی دا دەگرت.
لەبارەی ڕۆژ و مانگ و ساڵی لە دایکبوونییەوە خۆی دەیوت لە #1913-11-22# دا لە دایکبووم، بۆیە لەم مانگەدا یادی لە دایکبوونی دەکەینەوه، کە لە #07-08-1973# دا ئەم مامۆستا و نووسەرە خۆبەختکەرە ڕۆح سووکە کۆچی دوایی کرد، لە گۆڕستانی گەورەی شاری هەولێر بەخاک سپێردار و شاندێکی یەکێتی نووسەرانی کورد لەسەر گۆڕەکەی ئامادەبوون و سەرۆکی لقی هەولێر مامۆستای نەمر عزەدین فەیزی تاجەگوڵینەی نووسەرانی لەسەر گۆڕەکەی دانا و مامۆستا کەریم شارەزای سکرتێری لقی هەولێریش وتاری یەکێتی نووسەرانی لەسەر گۆڕەکەی خوێندەوە و ئاماژەی بەنرخەکانی کرد.[1]
This item has been written in (کوردیی ناوەڕاست) language, click on icon
to open the item in the original language!
ئەم بابەتە بەزمانی (کوردیی ناوەڕاست) نووسراوە، کلیک لە ئایکۆنی
بکە بۆ کردنەوەی بابەتەکە بەو زمانەی کە پێی نووسراوە!
This item has been viewed 39,282 times
Write your comment about this item!