بەیاننامە ‎بۆ بەڕێز وەزیری ناوخۆ
بۆ بەڕێزان لە لێژنەی بەرەنگاربوونەوەی کۆرۆنا
‎لەگەڵ سەرهەڵدانی پەتای کۆڤید 19 پزیشکانی کوردستان هاوشانی کارمەندانی تەندروستی و هێزە ئەمنییەکان پێشمەرگە ئاسا وەکو جەنگاوەری هێڵی یەکەمی ئەم جەنگە شەو و ڕۆژ لە خزمەتی هاووڵاتیانی هەرێمەکەماندا، بە بەردەوامی و بێ وچان گیانی خۆیان و خێزانەکانیان خستووەتە مەترسییەوە، تاوەکو چارەسەری تووشبووان و هاوکاری هاووڵاتیان بکەن و ڕێگری لە زیاتر بڵاووبوونەوەی ئەم پەتایە بکەن.
‎بەڵام بەداخەوە کە هەندێک جار لێرە ولەوێ گوێبیستی بێڕێزی و ڕێگەگرتن دەبین لە پزیشکان لەکاتی چوونە سەرکار و گەڕانەوەیان بۆ ماڵەکانیان، تازەترینیان ئەو بێڕێزی و ئازاردانەیە کە بەرامبەر هاوپیشەیەکمان ئەمڕۆ لە شاری #سلێمانی# کراوە.
‎هەر لەسەرەتای حاڵەتەکەوە وەکو سەندیکا هاتوینەتە سەرخەت لەگەڵ بەڕێزان پارێزگاری سلێمانی و بەڕێز بەڕێوبەری گشتی تەندرووستی سلێمانی و بە سوپاسەوە ئەوانی بە دەنگمانەوە هاتوون و هەوڵی جددیان داوە بۆ چارەسەرکردن و دیاریکردنی ئەو کەسەی کە بێ ڕێزییەکەی ئەنجام داوە و بەڵێنیان پێداین کە سزای سەرپێچیکارەکە دەدەن.
‎ئێمە دەزانین کە زۆربەی برایانمان لە هێزەکانی ناوخۆ و ئاسایش و پێشمەرگە، بەوپەڕی ڕێزەوە لەگەڵ هاووڵاتیان بە گشتی و پزیشکان بە تایبەتی مامەڵەیان کردووە، بەڵام بەداخەوە ژمارەیەکی زۆر کەم دەیانەوێت بە مەبەست ئازاری هاوپیشەکانمان بدەن، کە نازانین هۆکار چییە.
‎لێرەوە وەکو سەندیکا داوا لە سەرجەم لایەنە پەیوەندیدارەکان دەکەین، کەرامه ت و سەلامەتی گیانی پزیشکانی کوردستان بپارێزن و سنوورێک بۆ ئەم جۆرە هەڵسوکەوتانە دابنێن، چونکە پزیشکان لە هێڵی یەکەمی بەرەنگاربوونەوەی ئەم پەتایەن.
داوا لە بەڕێزتان دەکەین بە بڕیار و ڕێنمایەکانتاندا بچنەوە سەبارەت بە پزیشکان، پزیشکان ئازادانە و تەنها بە ناسنامەی سەندیکای پزیشکان و وەزارەتی تەندروستی ڕێگەپێدراوبن بۆ هاتوچۆ.
‎بەهەمان شێوە داوای خۆڕاگری وپابەندبوون لە سەرجەم هاوپیشەکانمان دەکەین، کە نابێت هیچ جۆرە هەڵسوکەتێکی ناڕەوا کار بکاتە سەر جێبەجێکردنی کارەکانمان و ساردمان بکاتەوە لە خزمەتی گەل و وڵاتەکەمان.
‎دووبارە و سێبارە داوا لە هاوڵاتییان دەکەین، پابەندی ڕێنماییەکان بن و لەماڵەکانیان بمێننەوە
سەندیکای پزیشکانی کوردستان
#06-04-2020#

بۆ/ سەرۆکایەتی ئەنجوومەنی وەزیران
بۆ/ وەزارەتی تەندروستی
لەگەڵ سەرهەڵدانی قەیرانی دارایی و جێبەجێکردنی سیستەمی پاشەکەوتی موچە، سەرەرای ئەوەی پزیشکانی کوردستان قوربانی یەکەمی سیستەمەکەبوون، بەڵام بەردەوام بوون لە خزمەتکرن بەبێ ماندووبوون لە چارەسەری ئازار و نەخۆشیەکانی هاووڵاتیانی کوردستان کەئەمەش وای کرد ڕۆژ بە ڕۆژ باری دارایی پزیشک خراپتر بێت و کاریگەری نەرێنی بکاتە سەر ژیانیان و کەچی هەر بەردەوام بوون لە کارەکانیان.
بەڵام پاش ڕێکەوتنی حکومەتی هەرێم و عێراقی فیدراڵ بەناردنی مووچەی تەواوی پزیشک و کارمەندانی وەزارەتی تەندروستی، پزیشکان دووبارە بوونەوە قوربانی و بەهەمان شێوەی پاشەکەوتکراو مووچەکانیان وەرگرتەوە کە ئەمەش نیشانەی گرینگی نەدانە بەم توێژە گرنگە.
بۆیە وەکو سەندیکای پزیشکان زۆر بەتووندی ئیدانەی ئەم بڕیارە دەکەین و داوا لەبەرێزتان دەکەین کە لەماوەی (72) حەفتا و دوو کاتژمێری داهاتوودا پێداچوونەوە بەم بڕیارە بکرێتەوە و بەنووسراوی فەرمی وەڵاممان بدرێتەوە و مووچەی ماندووبوونی پزیشکان بەتەواوی و بەبَی پاشەکەوت مانگانە لەکاتی خۆیدا بدرێت، بەپێچەوانەوە هەڵوێستی دیکەی پێویستی مەدەنیانە (گردبوونەوە، خۆپیشاندان، بایکۆتی سەرتاسەری) لە هەردوو سێکتەری حکومی و تایبەت ڕادەگەیەنین و پاشهات و لێکەوتە سلبیەکانی دەخەینە ئەستۆی لایەنی بەرپرس.
هاوکات داوا لە پزیشکە بەرێزەکان دەکەین دان بەخۆیاندا بگرن و خاوەن ئیرادە و یەک ڕیزبن.
#سەندیکای پزیشکانی کوردستان#
#24-03-2018#

پەیامی #سەندیکای پزیشکانی کوردستان# ژمارە (6):
هاوڵاتیانی خۆشەویست:
سەرچاوە زانستیە پزیشکیەکانی جیهان بەڕوونی ئەوەیان ڕاگەیاندووە کە وەرگرتنی (دەرمانی ستیرۆید و نەن ستیرۆیدەکان وەکو دیکادڕۆن و پڕۆفین و ڤۆڵتارین و هاوشێوەکانی) نابنە هۆکار بۆ خۆپارێزی لە تووشبوون بە ڤایرۆسی کۆڕۆنا (کۆڤید 19) بە پێچەوانەوە گەر بە بێ ڕاوێژی پزیشکی پسپۆڕ بەکار بێت زیانی دەبێت. بەتایبەتی گەر تەمەنیان خوراووی 50 ساڵ بێت و هەڵگری ڤایرۆسەکە بن بە بەکارهێنانی ئەم جۆرە دەرمانانە خراپتر دەبن.
بۆیە داوا دەکەین، بەهیچ جۆرێک بەبێ ڕاوێژی پزیشک ئەو جۆرە دەرمانانە وەرنەگرن، چونکە لە لایەن چەندین هاووڵاتیەوە ئاگادار کراینەوە، کە بەبێ ڕاوێژی پزیشک تێکەڵەیەک لە دەرمانی ڤۆڵتارین و دیکادڕۆنیان پێ دراوە.
با هەموومان، پشتیوانی یەک بین و بەشێوەیەکی زانستی خۆپارێز بین و دژی ئەم پەتایە بجەنگین.
سەندیکای پزیشکانی کوردستان
#14-03-2020#

بۆ: سەرۆکایەتی ئەنجومەنی وەزیرانی عیراقی فیدڕاڵ
سەرۆکایەتی ئەنجومەنی وەزیرانی هەرێمی کوردستان- عیراق
هەر لە سەرەتای سەرهەڵدانی قەیرانەکان پزیشکانی کوردستان بەوپەڕی هەست کردن بە بەرپرسیارێتی و لە خۆ بردوییەوە خزمەتی هاوڵاتییانی کوردستانیان کردوە و بێ گوێدانە سوودە ماددیەکان هەمیشە وەکو سەربازی ون لە نەخۆشخانە و دامەزراوە تاندروستییەکانی حکومەتی هەرێمدا شەوو ڕۆژیان خستۆتە سەر یەک بۆ کەم کردەوەی ئازاری خەڵکی شارو شارۆچکەکانی ئەم هەرێمە خێر لە خۆ نەدیوە تەنانەت هاوڵاتیانی ناوڕاست و خوارووی عیراقیش بێ جیاوازی لەلایەن پزیشکانی کوردستانەوە خزمەت کراون.
پاش ئەوەی کە سیستەمی پاشەکەوت کەوتە بواری جێبەجێکردنەوە، دوبارە و سەرەڕای ئەوەی کە توێژی پزیشکان زۆرترین بڕی موچەیەن لێ پاشەکەوت کراو هیچ حسابێک بۆ هەستیاری و قورسی و بەرپرسیارێتی کاری پزیشک نەکرا، پزیشکی ئەم وڵاتە بەردەوام بوون لە کاری پیرۆزی خۆیان بەو هیوایەی ڕۆژێک بێت ئاوڕ لە پێویستی و داواکانی پزیشک بدرێتەوە.
کاتێکیش پرۆسەی پێداچونەوە بە میلاکی وەزارەتی تەندرووستی لە لایەن حکومەتی فیدڕاڵەوە دەستی پێکرد، و چەند جارێک لیژنەی تایبەت زانیاریی و ژمارە و ناووناویشانی پزیشکان وردبینی لێکرایەوە، دواجار بڕیاری سەرفکردنی موچەی وەزارەتی تەندرووستی و پەروەردە لەلایەن حکومەتی فیدڕاڵەوە درا،هیوایەک گەڕایەوە کە پزیشک و کارمەندان دڵی ماڵ و منداڵی خۆیان بە موچەیەکی تاراددەیەک شایستە خۆش بکەن و هەست بە پایەی خۆیان بکەن.
بەڵام بە داخەوە هەموو ئەو چاوەڕوانی و هیوایە لە بار چون ئەویش پاش ئەوەی هەردوو حکومەتی فیدڕاڵ و هەرێمی ڕایانگەیاند کە سیستەمی مووچەکە هەر بە پاشەکەوتکراوی دابەش دەکرێت. ئەمەش وای کرد کە ناڕازایەتیەکی زۆر لە نێو پزیشکانی کوردستاندا درووست بێت.
#سەندیکای پزیشکانی کوردستان# وێڕای پاڵپشتی کردنی پزیشکانی خۆشەویست لە دەڕبڕینی ناڕازاییەکانیان،داوا دەکەین وبە زوترین کات ئەنجومەنی وەزیرانی عیراقی فیدڕاڵ و هەرێمی کوردستان ڕوون کردنەوەی پێویست سەبارەت بەو گۆڕانکارییە لە ناکاوەی بەسەر بەڵێنەکاندا هاتوە بدەن و هەوڵی گەڕاندنەوەی مافە ڕەواکانی پزیشکان بدەن.
هیوادارین هەردوو حکومەت نرخ و گرنگی پزیشکان لە پاریزگاری کۆمەڵگادا بە هەند وەر بگرن.
لەگەڵ ئەوپەڕی ڕێزدا
سەندیکای پزیشکانی کوردستان
#19-03-2018#

لە ساڵی‌ 1991 دامەزراوە و لەئێستادا هەشت هەزار و 200 ئەندامی‌ لە هەرچوار لقی‌ (هەولێر و دهۆک و سلێمانی‌ و کەرکووک) هەیە.
دوای‌ دوولەت بوون بۆ هەردوو ئیدارەی‌ هەولێر و سلێمانی‌، سەندیکای‌ پزیشکان لە هەولێر ساڵی‌ 2000 دووەم کۆنگرەی‌ وەک دوا کۆنگرە ئەنجامداوە و لە سلێمانیش لە ساڵی‌ 2004 سێیەم کۆنگرە ئەنجامدراوە، کۆنگرەی‌ ئەمجارەش دەبێتە چوارەمین کۆنگرە بۆ هەردوولا.
- 12-05-2014