ئاسۆ یاخود هەڵۆ، ڕۆژی 04-01-1966 لە گەڕەکی (گۆیژە) ی #سلێمانی# لە دایکبووە، سەرەتای ساڵی 1981 پەیوەندیکردووە بەڕێکخستنەکانی #یەکێتیی نیشتمانیی کوردستان# لەپۆلی شەهید فەرهاد- کەرتی شەهید ئاری سەر بە هەرێمی 5ی قەرەداغ بەناوی نهێنی (هۆزەر)، لەبەر هۆی سیاسی وپەیوەندیی بەڕێکخستنەوە نەیتوانییەوە پۆلی دووەمی ناوەندی تەواوبکات و لە ساڵی 1983 بووە بەپێشمەرگە لەبارەگاکانی سەرکردایەتی ناوەندی شۆڕشگێڕان، لەپێشمەرگایەتیشدا نازناوی (هەڵۆ) ی پێدراوە.
لەپێشمەرگایەتیشدا چەندین پلە و ئەرکی پێ سپێردراوە، دوای ڕاپەڕین بەردەوام بووە لەریزەکانی یەکێتیدا تائێستاش، ساڵی 1993 لەچوارچێوەی وەزارەتی کاروباری پێشمەرگە لەهۆبەی هەواڵگری بەفەرماندەی سریە و پلەی نەقیب دامەزراوە، لەگەڵ کۆمەڵێک کادری دیکە ناوەندی هەواڵگری سلێمانی-یان دامەزراند و بۆخۆی بۆتە جێگری بەڕێوەبەری ناوەندو پەیوەندییەکانی هەواڵگری سلێمانی تا کۆتایی ساڵی 1995، پاشان لەسەر داوای خۆم گوازراوەتەوە بۆ مەڵبەندی دەرەوەی یەکێتیی نیشتمانیی کوردستان لەئەوروپا، ئێستاش لەئەڵمانیا نیشتەجێیە و کاری ڕێکخستن دەکات، هەروەها لێپرسراوی لیژنەی باکووری ئەڵمانیای کۆمەڵەی پێشمەرگە دێرینەکانی کوردستانە.

ئێوارەی ڕۆژی پێنجشەممە #25-05-2023# #ئاسۆ مامەند# کارگێڕی مەکتەبی سیاسی #یەکێتیی نیشتمانیی کوردستان#، لە بارەگای مەکتەبی سیاسی لە شاری #کەرکووک#، پێشوازیی لە سەید عەمار حەکیم سەرۆکی ڕەوتی حیکمە کرد.
لە دیدارێکی دۆستانەدا کە ژمارەیەک لە هەڤاڵانی ئەنجوومەنی سەرکردایەتیی ئامادەی بوون، ئاسۆ مامەند دوای بەخێرهاتنی سەید عەمار حەکیم و وەڤدی یاوری بۆ شاری کەرکووک، هەردوولا تەئکدیان لە دۆستایەتیی هەماهەنگی نێوان هەردوولا و سەرجەم حزب و لایەنە سیاسییەکان کردەوە و ڕایانگەیاند؛ دەبێت پارێزگاری لەو دۆستایەتییە بکرێت و زیاتر پەرەی پێبدرێت.

لە درێژەی دیدارەکەدا، پرسی سیاسی، و خزمەتگوزاری، و پەیوەندیی نێوان لایەنەکان تەوەرێکی دیکەی دانیشتنەکە بوو، لەو ڕووەوە هەڤاڵ ئاسۆ مامەند کارگێڕی مەکتەبی سیاسی وتی؛ بوژانەوەی کەرتی ئابووری و بابەتیی خزمەتگوزاری، پەیوەستە بە سەقامگیری سیاسی، هەتا پەیوەندی نێوان لایەنە سیاسییەکان ئاسایی و باش بێت، کەرتی ئابووری و خزمەتگوزاری باشتر و خێراتر پێش دەخرێت.
دواتر سەید عەمار حەکیم سەرۆکی ڕەوتی حیکمە بە یاوەری ئاسۆ مامەند کارگێڕی مەکتەبی سیاسی یەکێتیی نیشتمانیی کوردستان، چاویکەوت بە ژمارەیەک لە حزب و لایەنە کوردستانییەکانی کەرکووک، و نوینەری چین و توێژەکان، و لە نزیکەوە گوێی لە پێشنیاز و کێشە و داواکارییەکانیان گرت. [1]

دەقی ڕونکردنەوەکە...
سەبارەت بە دۆخی ئیداری و ئەمنی #کەرکووک#‌، لە شاری بەغدا زنجیرەیەک کۆبوونەوە لەگەڵ نوێنەری پێکهاتەکانی کەرکووک ئەنجامدراوە، هەر بۆ ئه و مەبەستەش جەنابی سەرۆک کۆمار چاویکەوتووە بە نوێنەری پیکهاتەکانی کەرکووک.
سەبارەت بە لێدوانی بەرێز ئەرشەد ساڵحیش کە باس لە ڕێکەوتن لەسەرم نەگەڕانەوەی هێزی پیشمەرگە بۆ کەرکووک دەکات، لە کۆبوونەوە و گفتوگۆکاندا لە دوور و نزیکەوە باس له و بابەتە نەکراوە.
لەگەڵ ڕێزدا
#ئاسۆ مامەند# و #خالید شوانی#
#29-10-2018#

#ئاسۆ مامەند#، لە ئیڤێنتی د. ئەحمەد کەرکووکی لە شاری #کەرکووک# وتارێکی پێشکەش کرد و ڕایگەیاند”لە دوای ڕووداوەکانی 16ی ئۆکتۆبەرەوە خەڵکی خۆمان لە کەرکووک جێنەهێشت و لەگەڵ ئەو خەڵکە ماینەوە و ​خۆمان لە خەڵک جیا نەکردەوە”.
ئاسۆ مامەند، دەڵێت: هەندێک هێز بەناوی ئەوەی کەرکووک داگیرکراوە لە کەرکووکییەکان دوورکەوتنەوە و پشتیان لە کەرکووکییەکان کرد.
سەبارەت بە ئەگەری دواخستنی هەڵبژاردنی ئەنجوومەنی پارێزگا، ئاسۆ مامەند ڕایگەیاند ”کاک #بافڵ تاڵەبانی#، سەرۆکی #یەکێتیی نیشتمانیی کوردستان# چووەتە #بەغدا# بۆ ئەوەی ڕایبگەیەنێت چیتر یەکێتی ئەوە قبووڵ ناکات کە ستەم لە کەرکووک بکرێت و هەڵبژاردن دوابخرێت”.
ئاسۆ مامەند ڕاشیگەیاند ”ئەو نادادییانەی لە شەش ساڵی ڕابردوو لە کورد کراوە دەبێت هەمووی بۆ خەڵکی کورد بگەڕێتەوە”. [1]

=KTML_Bold=ئاسۆ مامەند، بۆ بەرپرسانی حیزبەکەی: هەر کەسێک دێتە ناو یەکێتی، مەیکەن بە هەڵڵای ئیعلامی=KTML_End=

#ئاسۆ مامەند#، سەرپەرشتیاری ”#کەرکووک#، سەڵاحەددین”ی یەکێتی لە بروسکەیەکی نهێنیدا بۆ بەرپرسی بازنەکانی هەڵبژاردنی حیزبەکەی داوای ڕاگرتنی شەڕی ڕاگەیاندن دەکات لەنێوان #پارتی دیموکراتی کوردستان# و #یەکێتیی نیشتمانیی کوردستان#.
ئاسۆ مامەند نووسراوێکی ئاڕاستەی سەرجەم بەرپرسی بازنەکامی هەڵبژاردنی یەکێتی کردووە و تیایدا داوای لێکردوون بە هیچ شێوەیەک خۆیان بە ململانێ لەگەڵ پارتی دیموکراتی کوردستان سەرقاڵ نەکەن.
ئاسۆ مامەند بە بەرپرسانی حیزبەکەی ڕاگەیاندووە کە ناکۆکی ئەوان لەگەڵ ئەو لیستانەیە کە دژی کوردن نەک لایەنە کوردییەکان.
لە بەشێکی دیکەی بروسکە نهێنییەکەی ئەو بەرپرسە باڵایەی یەکێتی باس لە سەنگەر گواستنەوەی بەرپرسان و ئەندامانی پارتی کراوە بۆ ناو یەکێتی و دەڵێت ”هەر کەسێک دێتە ڕیزەکانی یەکێتی، مەیکەن هەڵڵای ئیعلامی بۆئەوەی نەبێتە هۆی ململانێی حزبی لەنێو حیزبە کوردییەکان”. [1]

لە کۆبوونەوەی لەگەڵ ژمارەیەک گەنج لە شاری #کەرکووک# #ئاسۆ مامەند# کارگێڕی مەکتەبی سیاسی یەکێتی دوای ڕووداوەکانی ئۆکتۆبەری ساڵی 2017 داوام لە کامیل ساڵەیی، قایمقامی ناوەندی کەرکووک کرد، کەرکووک بەجێنەهێڵێت و بگەڕێتەوە سەر کارەکەی و تەنانەت پێم وت پاسەوانیشت بۆ دابین دەکەم. پێم ڕاگەیاند بەرپرسیارییەتی ژیان و ئەمنییەتت لە ئەستۆ دەگرین تەنیا بمێنەرەوە و چەند ڕۆژێک دوای ڕووداوەکان لە کەرکووک مایەوە، بەڵام وا دیاربوو پارتی داوایان لێکرد بگەڕێتەوە و بەهۆی کار نەکردنی کورد پۆستەکەی لە دەستدا.
کامیل ساڵەیی، لە پشکی پارتی قایمقامی شارۆچکەی ناوەندی کەرکووک بوو و دوای ڕووداوەکانی 16ی ئۆکتۆبەری 2017، شوێنەکەی بەکاندیدی بەرەی تورکمانی پڕ کرایەوە و حەسەن یایچلی کرا بە قایمقامی کەرکووک و لە ئێستادا #08-06-2023# لە کۆی چوار قایمقامی پارێزگای کەرکووک کورد هیچ پۆستێکی قایمقام بەڕێوە نابات. [1]

دەقی پرسەنامەکەی ئاسۆ مامەند:
بە داخ و پەژارەیەکی ئێجگار زۆرەوە، هەواڵی ماڵئاوایی یەکجاریی فەرماندە و پێشمەرگە کاکە (ئاکام عومەر) فەرماندەی ھێزەکانی کۆماندۆی کوردستان-مان پێگەیشت.
شەھید بوونی کاکە ئاکام، برینێکی قووڵی خستە جەستەمانەوە و ھەموومانی لە ناخەوە ئازاردا.
ئاکام عومەر نمونەی فەرماندەیەکی ئازا و جوامێر و پێشمەرگەیەکی چاونەترس و بوێر و دڵسۆزی خاک نیشتمان بوو، ڕۆڵێکی قارەمانەنەی لە شەڕی تیرۆریزمدا هەبوو، بۆ ئەم کۆستە خەمناکە، پرسە و سەرەخۆشی لە کەسوکار و بنەماڵە تێکۆشەرەکەیان، و هەموو پێشمەرگەکانی هێزی کۆماندۆی کوردستان دەکەم کە خویان کردە قوربانی خاک و نەتەوە.
ئاسۆ مامەند
کارگێڕی مەکتەبی سیاسی یەکێتیی نیشتمانیی کوردستان[1]

تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!

دەقی پیرۆزباییەکەی ئاسۆ مامەند، سەرپەرشتیاری #کەرکووک#-سەڵاحەدینی #یەکێتیی نیشتمانیی کوردستان#:
پەیامی پیرۆزبایی ئاسۆ مامەند بەبۆنەی (19)مین ساڵڕۆژی دامەزراندنی سایتی PUKmedia
بەڕێزان/ سەرنووسەر و ڕۆژنامەنووس و کارمەندانی سایتی PUKmedia ی ئازیز
بە گەرمی پیرۆزبایی (19)مین ساڵڕۆژی دامەزراندنی سایتی PUKmedia ی ئازیزتان لێدەکەم و دەستی ماندووبوونتان دەگوشم.
دەستخۆشی لە هەوڵ و کۆششی بەردەوامتان دەکەم کە توانیوتانە بێوچان ئەم سەکۆ ئازاد و ئاوەدانەی ڕاگەیاندنی یەکێتیی بکەنە هەوێنی ئارامی و پێکەوەیی.
لە ماوەی کارکردنی خۆیدا سایتی PUKmedia بەرپرسیارانە و پیشەییانە کارەکانی خۆی ڕاپەڕاندووە و ڕاستگۆیانە هەواڵ و پێشهاتەکانی بە خوێنەران گەیاندووە.
سایتەکەتان توانیوێتیی ببێتە مینبەرێکی ئاوەدانی بێ چەندوو چوونی سیاسی، کۆمەڵایەتی و فەرهەنگی و وەرزشی لە کوردستان و عیراق، هەروا هەواڵ و زانیاری بە کەڵک و پێویست بە خوێنەرانی بگەێنێت.
دووبارە (19)مین ساڵڕۆژی دامەزراندنی سایتی PUKmedia ی ئازیز لە بەڕێزتان و تەواوی خوێنەران پیرۆز بێت
ئاسۆ مامەند
سەرپەرشتیاری کەرکووک-سەڵاحەدینی یەکێتیی نشتمانیی کوردستان[1]

دەقی پیرۆزباییەکەی ئاسۆ مامەند:
بەڕێزان/ سەرنووسەر و ڕۆژنامەنووس و کادرانی سایتی PUKMEDIA ی ئازیز
جوانترین پیرۆزبایی 20 مین ساڵڕۆژی دامەزراندنی سایتی PUKMEDIA ی ئازیزتان لێدەکەم و ئومێدی سەرکەوتنی زیاترتان بۆ دەخوازم لە کارەکانتان.
هەوڵ و کۆششە بەردەوامەکانتان لە کایەی میدیایدا شایەتی ئەوەتان بۆ دەدەن کە ئێوە سەر مەشقی گەیاندنی هەواڵ و زانیاری ڕاست و درووستن، و توانیوتانە ببنە سەکۆیەک بۆ تەواوی خوێنەران و میدیای یەکێتیی نیشتمانیی کوردستان.
لە ماوەی کارکردنی خۆیدا سایتی PUKMEDIA بەرپرسیارانە و پیشەییانە کارەکانی خۆی ڕاپەڕاندووە و ڕاستگۆیانە هەواڵ و پێشهاتەکانی بە سەرجەم کوردستانیان گەیاندووە، و بووەتە سەرچاوەیەکی گرینگ بۆ میدیا ناوخۆیی و دەرەکییەکان.
دووبارە 20 مین ساڵڕۆژی دامەزراندنی سایتی PUKMEDIA ی ئازیز لە بەڕێزتان و تەواوی خوێنەران و میدیای یەکێتیی پیرۆز بێت
ئاسۆ مامەند
کارگێڕی مەکتەبی سیاسی یەکێتیی نشتمانیی کوردستان[1]

تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!

دەقی پەیامەکەی ئاسۆ مامەند:
پەیامی پیرۆزبایی ئاسۆ مامەند بە بۆنەی هاتنەوەی جەژنی ڕەمەزانی پیرۆز
بە بۆنەی هاتنەوەی جەژنی ڕەمەزانی پیرۆزەوە، گەرمترین پیرۆزبایی ئاراستەی سەرجەم موسڵمانانی کوردستان و عیراق و جیهان دەکەین، بە تایبەتیش پیرۆزبایی لە کەسوکاری سەربەرزی شەهیدان و ئەنفالکراوان و پێشمەرگە قارەمانەکان دەکەین کە بەردەوام لە سەنگەرەکانی پێشەوەدا بەرگری لە خاک و خەڵکی کوردستان دەکەن.
هیوادارین ئەم جەژنە ببێتە مایەی خێر و خۆشیی بۆ خەڵکی کوردستان، و هەروا ببێتە هەوێنی تەبایی و یەکڕیزی ناو ماڵی کورد و پێکەوەژیانی ئاشتییانەی نێوان پێکهاتەکانی ئەم ناوچەیە.
ئومێدی جەژنێکی خۆش و ئارامتان بۆ دەخوازین، دووبارە جەژنی ڕەمەزان لە هەموو لایەک پیرۆز بێت
ئاسۆ مامەند
سەرپەرشتیاری کەرکووک-سەڵاحەدینی یەکێتیی نیشتمانیی کوردستان[1]

⚠️ تێبینی: ئەم بابەتە بە ڕێنووسی سەرچاوەی ئاماژە پێکراو نووسراوە، کوردیپێدیا هیچ دەستکارییەکی نەکردووە!