دواڕۆژ، زریان محەمەد
وتەبێژی #یەکێتی وەبەرهێنەرانی کوردستان# ڕایدەگەیەنێت، ساڵی 2017 ساڵێکی باشە بۆ وەبەر هێنەران و جوڵە کەوتۆتەوە بازاڕ و کارکردنیش گەشەی سەندووە.
یاسین مەحمود، وتەبێژی یەکێتی وەبەرهێنەرانی کوردستان بەدواڕۆژی ڕاگەیاند ساڵی 2017 ساڵێکی باشە لەڕووی ئابورییەوە، چونکە خواست لەسەر خانوبەرە بەڕێژەی 15% دروستبووەتەوە بە بەراورد بەساڵی ڕابردوو، بۆیە ئومێدێک هەیە کە لە ئایندەیەکی نزیکدا چەند بڕیارێکی گرنگتر دەربکرێن لە ئەنجومەنی وەزیرانەوە بۆ باشکردنی ڕەوشی وەبەرهێنارانی کوردستان.
وتیشی لەئێستادا چەند کۆمپانیایەکی دەرەکی گەڕاونەتەوە بۆ کوردستان کە پێشتر پڕۆژەکانیان جێهێشتبوو، پێشتر 31% وەبەرهێنانی دەرەکی هەبوو کە16%ی ڕۆشتبونەوە، بەڵام لەئێستادا 6% گەڕاونەتەوە و ڕێژەکە چووەتەوە 21%، گەڕانەوەی کۆمپانیا دەرەکییەکان بەندە بە زەمینە ڕێکخستنی لایەنە سیاسییەکان کە ڕەوشەکە باشتر دەکەن یان خراپتر.
بەهۆی قەیرانی داراییەوە لەساڵانی ڕابردوودا زۆرێک لە پڕۆژەکان ڕاوەستان ئێستاش بەوتەی وتەبێژی یەکێتی وەبەرهێنەران، پڕۆژەکان جوڵەیان تێ کەوتۆتەوە.
03-06-2017

سەرۆکی یەکێتی وەبەرهێنەرانی کوردستان ئاماژە بەوەدەکات، لە 80%ی کۆمپانیاکان کارەکانیان ڕاگیراوە ئەوەش دەخاتەڕوو، بازاڕی زەوی و خانووبەرە بەڕێژەی لە 60% دابەزینی بەخۆوە بینیوە و ئاشکرایدەکات، بەبڕی 47 ملیار دۆلار وەبەرهێنان لە هەرێمی کوردستاندا کراوە.
ئەحمەد ڕێکانی، سەرۆکی یەکێتی وەبەرهێنەرانی کوردستان لە چاوپێکەوتنێکی دواڕۆژدا کە دواتر بڵاودەکرێتەوە ئاشکرایدەکات، بەبڕی 47 ملیار دۆلار وەبەرهێنان لە هەرێمی کوردستاندا کراوە، لەئێستاشدا وەبەرهێنان ڕووی لە سستبوون کردووە، بەشێکی هۆکارەکەشی بۆ ناکۆکییە سیاسیەکانی نێوان لایەنەکان دەگەڕێتەوە.
سەبارە بە کۆنتڕۆڵکردنەوەی موسڵ و کاریگەری لەسەر بازاڕی هەرێمی کوردستان، سەرۆکی یەکێتی وەبەرهێنەران دەڵێت "موسڵ شارێکی گەورەیە و بەئازادکردنەوەی ئەو شارە جووڵەیەکی گەورە دەخاتە ناو بازاڕی هەرێمی کوردستان، بەتایبەت لەبواری وەبەرهێنان لە بیناسازیدا، کاریگەیی لەسەر سەرجەم پارێزگاکان دەبێت بەتایبەتیش هەولێر و دهۆک، بەهۆی ئەوەی نزیکن لە موسڵەوە".
- 09-11-2016