#هاکان فیدان#، بەرپرسی دەزگای هەواڵگری تورکیا میت چەند مەرجێکی داناوە بۆ یەکێتی نیشتمانی، تا ئاسمانی وڵاتەکەی بەڕووی فڕۆکەخانەی #سلێمانی# بکاتەوە.
ڕۆژنامەی ئاکشامی تورکی ڕاپۆرتێکی لەسەر کۆبوونەوەی هاکان فیدان بەرپرسی دەزگای هەواڵگری تورکیا و #قوباد تاڵەبانی# جێگری سەرۆکی حکومەتی هەرێم بڵاوکردووەتەوە و ئاشکرایکردووە، کۆبوونەوەی ئەو دوو بەرپرسە لە ئەنقەرە ئەنجامدراوە.

هەر بەپێی ڕاپۆرتەکە، لەو کۆبوونەوەیە فیدان مەرجەکانی تورکیای بە قوباد تاڵەبانی گەیاندووە، تا ئەوەی وڵاتەکەی پەیوەندییەکانی لەگەڵ یەکێتی و ئاسمانیش بەڕووی فڕۆکەخانەی سلێمانی بکاتەوە.
هەروەها ڕۆژنامەکە ئاشکراشیکردووە، کە تورکیا مەرجی ئەوەیە کۆتایی بە تەواوی پەیوەندییەکانی لەگەڵ کوردانی ڕۆژاوا و بەرپرسانی #قەندیل# بهێنێت. [1]

سەرۆکی هەرێمی کوردستان و وەزیری دەرەوەی تورکیا ئەمڕۆ هەینی #16-02-2024# باسیان لە دوایین هەوڵ و هەنگاوەکانى هەناردەکردنەوەى نەوتى هەرێمى کوردستان بۆ وڵاتی تورکیا کرد.
هەر لە کۆنفرانسى ئاساییشى مینوشن، ئێوارى ئەمڕۆ هەینى 16-02-2024 #نێچیرڤان بارزانى# سەرۆکى هەرێمى کوردستان لە کۆبوونەوەیەکدا لەگەڵ هاکان فیدان وەزیرى دەرەوەى تورکیا دەر‌بارەى دەرفەت و بوارەکانى پتەوکردنى پەیوەندییەکانى تورکیا لەگەڵ ئێراق و هەرێمى کوردستان گفتوگۆیان کرد و بیروڕایان دەربارەى دوا پێشهاتەکانى ناوچەکە بەگشتى، گۆڕییەوە.
هەردوولا جەختیان لە پاراستنى ئاساییش و سەقامگیرى و هاریکاریى هاوبەشى تورکیا لەگەڵ ئێراق و هەرێمى کوردستان کردەوە بۆ بەرەنگاربوونەوەى هەڕەشە و مەترسییەکان لەسەر ئاساییش و ئارامیى هەردوو وڵات‌، هەروەها باسیان لە دوایین هەوڵ و هەنگاوەکانى هەناردەکردنەوەى نەوتى هەرێمى کوردستان و گفتوگۆکان لەمبارەیەوە کرد.
بەرەنگاربوونەوەى مەترسییەکانى تیرۆر و کارى پێکەوەیى وڵاتانى ناوچەکە بۆ پاراستنى ئارامى و سەقامگیرى و چەند بابەتێکى دیکەى جێى بایەخى هاوبەش، تەوەرێکى دیکەى کۆبوونەوەکە بوو. [1]

هاکان فیدان، سەرۆکی دەزگای هەواڵگری تورکیا (میت) لە ساڵی 1968 لە شاری ئەنقەرە لە دایک بووە.
هەر چەندە باوکی و باپیری لە شاری #ئەردیش#ی #باکووری کوردستان#ەوە ڕۆشتونەتە ئەنقەرە و بەڕەچەڵەک کوردن، بەڵام فیدان دانی بەمەدا نەناوە... ئەگەرچی کەسە نزیکەکانی نایشارنەوە خەڵکی شارۆچکەی ئەردیشن کە شارۆچکەیەکە سەر بە پارێزگای وانە و دەکەوێتە باکووری ڕۆخی #دەریاچەی وان#.
لە ساڵی 2018 میدیاکانی پەکەکە چاوپێکەوتنی گەڕیلایەکیان بڵاوکردەوە بەناوی ”عەگید زیلان” کە خۆی بە کوڕی ئامۆزای فیدان ناساند.[1]

هاکان فیدان، سەروکێ دەزگەها هەوالگرییا تورکیا (میت)ە و ل ساڵا 1968 ل باژێڕێ ئەنقەرە ژدایک بوویە.
سەرباری هندێ کوو باب و باپیرێن وی ل باژێڕێ ئەردیش یا باکووری کوردستانێ بەرەف ئەنقەرە چووینە و بنەجها وانا کوردن، بەلێ فیدان دان بڤێ ڕاستی یێ نادەینت... دهەمان دەمدە کەسێن نزیکێن وی دبێژن کو ئەم خەلکێ ئەردیشێنە کو باژێڕوکەکە سەر ب پارێزگەها وانە و دکەڤیتە باکوورێ دەریاچەیا وان.
ل ساڵا 2018 میدیایێن پ. ک. ک)ێ دیدارەک تەڤی گەریلایەک بڵاڤکر بناڤێ ”عەگید زیلان” کو دگوت ئەز کوڕێ پسمامێ هاکان فیدانم.[1]

هێمن عەساف
وەزیری دەرەوەی تورکیا باسی پەیوەندییەکانی نێوان یەکێتیی نیشتمانیی کوردستان و پارتی کرێکارانی کوردستان (پەکەکە) ی کرد و ڕایگەیاند، چەندینجار بە بەرپرسانی یەکێتی و سلێمانیی گوتووە، سنوورێک بۆ پەیوەندییەکان لەگەڵ پەکەکە دابنێن.
ئەمشەو، 04-02-2024، هاکان فیدان، وەزیری دەرەوەی تورکیا، بەشداری لە بەرنامەیەکی تایبەتیی کەناڵی (A HABER) کرد. لە وەڵامی پرسیارەکاندا هەڵسەنگاندنی لەبارەی دوایین پێشهاتە هەرێمی و نێودەوڵەتییەکان کرد. لە چوارچێوەی سیاسەتی بەرەنگاربوونەوەی تیرۆری دەوڵەتی تورکیاشدا باسی پەیوەندییەکانی نێوان یەکێتی و پەکەکەشی کرد.
هاکان فیدان ڕایگەیاند یەکێتی لە سلێمانی هاوئاهەنگی لەگەڵ پەکەکەدا هەیە و ئەم ڕاستییە لەمێژە لە ڕۆژەڤماندایە، بەتایبەتیی لە ڕووی هەواڵگریشەوە زۆر لە نزیکەوە چاودێریمان کردووە. تەنانەت لەو سەردەمەی سەرۆکی میت بووم، ئەو بابەتە یەکێک بوو لەو بابەتانەی زۆر کارم لەبارەیەوە کردووە.
باسی لەوەشکرد بەرلەوەی ئەم بابەتە بۆ ڕای گشتیی ئاشکرا بکەن، زۆر هەوڵیانداوە ''بە هێمنی و بێدەنگی چ لە ڕێگەی دیپلۆماسییەوە بێت، یان لە ڕێگەی میتۆدە کارپێکراوەکانی هەواڵگرییەوە، چارەیان بکەن'' بۆ ئەمەش چەندینجار لەگەڵ بەرپرسانی یەکێتیی لە سلێمانی دیدار و کۆبوونەوەیان کردووە.
هاکان فیدان وتی لە هەر دیدارێکماندا بە ڕاشکاوی پێمان گوتوون دەمانەوێت سنوورێک بۆ پەیوەندییەکانتان لەگەڵ پەکەکە دابنێن. ئەمانە ژێرخانی ئەم ناوچەیە بەکاردەهێنن، ئێوەش ناسنامەیان پێدەدەن، لە نەخۆشخانەکانتاندا چارەسەریان دەکەن، مافی نیشتەجێبوونیان پێدەدەن و ڕێگەیان بۆ خۆش دەکەن چالاکی و کردەوەکانیان بکەن. چاوەڕێی ئەوەتان لێناکەین ڕاستەوخۆ لەگەڵیان بجەنگن، لە هاوکێشەی هێزەکانتان تێدەگەین، دەتوانین هەموو شتێک لەم ڕووەوە بکەین، بەڵام ئەوەی داوای دەکەین هاوئاهەنگییان لەگەڵ مەکەن، چونکە ئێوە دەخاتە بەرەی دوژمنەوە و دەبێت وازبهێنن'.
وەزیری دەرەوەی تورکیا ئەوەشی خستەڕوو، بەرپرسانی یەکێتیی ماوەیەک بۆ ڕەواندنەوەی نیگەرانییەکانمان هەندێک هەنگاویان نا و بەهەمان شێوە لایەنی بەرانبەریشیان ڕازیکرد. دواتر بینیمان ئەمانە [یەکێتی] نیازیان نییە دەستبەرداری پەیوەندییەکانیان بن. پاشان دوای ڕاوێژکردن لەگەڵ سەرۆککۆماری تورکیا، ئەم بابەتەمان کردە سیاسەتی فەرمی و بۆ ڕای گشتیی ئاشکرامان کرد. قۆناخ بە قۆناخ دەستمانکرد بە سزادانیان. ئێستاش لە ڕێگەی سنووردارکردنی چالاکییە ئاسمانییەکان سزایان دەدەین. ئاسمانی تورکیامان بەسەریاندا داخستووە و هیچ فڕۆکەیەک لە ئاسمانی ئێمەوە بۆ ئەوێ ناچێت. گرنگ نییە لە کوێوە فڕۆکەیان بۆ دەچێت و چۆن کاری پێدەکەن، بەڵام ئەوەی دیارە، فڕۆکەخانەی سلێمانی 60٪ی تواناکان و جموجووڵە ئاسمانییەکانی پەکیکەوتووە و سنووردار بووە و هەموو چالاکییەکان ئاڕاستەی هەولێر کراون. لەنێوان سلێمانی و هەولێرەش ڕکابەرییەکی زۆر جدی هەیە.
هاکان فیدان جەختی لەوە کردەوە، لە پرسی بەرەنگاربوونەوەی تیرۆردا، هەولێر بۆ ئێمە نزیکترە و لەپێشینەن. چەند جارێک بە سلێمانیمان گوتووە، دەکرێت دەستبەرداری سزاکانمان بین؛ ئەگەر ئێوە سنوورێک بۆ پەیوەندییەکانتان لەگەڵ تیرۆر دابنێن. بەڵام ئەگەر بەمشێوەیە بەردەوام بن، ئێمەش ناچار دەبین هەنگاوی زۆر زیاتر بنێین. ئەمە خواست و بژاردەی ئێمە نییە، بەڵکوو لە چوارچێوەی بەرەنگاربوونەوەی تیرۆردا ئەمە پابەندیی و ناچاری ئێمەیە، کە ئەم هەنگاوانە بنێین. هەروەها ئەرکی سەرشانمانە بەرانبەر نیشتمان و هاووڵاتییانمان. بۆ تاهەتایەش لە پشتیووانیکردنی ئەو کەسانە (بەرپرسانی یەکێتی) بۆ ڕێکخراوی تیرۆریستی دەستەوەستان نابین. [1]

کۆسار عوسمان
وەزیری دەرەوەی تورکیا ڕایگەیاند، بەهۆی بوونی پەیوەندیی سەرکردایەتیی #یەکێتیی نیشتمانیی کوردستان# و #پەکەکە#، هەڕەشە بۆ ئاساییشی نیشتمانیی تورکیا درووستکراوە و درووست دەکرێت.
لە پرۆگرامێکی تەلەڤزیۆنیدا (CNN TURK) کە ئێوارەی دووشەممە #18-03-2024# پەخشکرا؛ #هاکان فیدان#، وەزیری دەرەوەی تورکیا نیگەرانیی نیشاندا و باسی لە بوونی پەیوەندی لەنێوان سەرکردایەتیی یەکێتی نیشتمانیی کوردستان و #پارتی کرێکارانی کوردستان# (پەکەکە) کرد.
بەشێکی گوتەکانی هاکان فیدان تایبەت بوو بە پەیوەندییەکانی تورکیا -ئێراق و بەرەنگاربوونەوەی پەکەکە. فیدان وتی، تورکیا پێداگرە لەسەر بەکارهێنانی هەموو هۆکارەکانی سیاسەتی دەرەوەی بەشێوەیەکی هاوئاهەنگ، بۆ ئەوەی ناوچەکە سەقامگیر بێت.
وەزیری دەرەوەی تورکیا ڕایگەیاند، لە #هەولێر#، #سلێمانی#، بەغدا، #کەرکووک# و موسڵدا بە یەکەوە داهاتوو بنیات دەنێن. وتیشی، لەوێدا هیچ شوێنێک بۆ ڕێکخراوە تیرۆریستییەکان نییە. ئیدی پێویستە ئەوان بخەینە دەرەوەی سیستمی خۆمان. ئیدی ئەو ڕێکخراوانە ماوەی بەکارهێنانیان بەسەرچووە. ئەو شارانەی باسیان لێوە دەکەم، شاری خاوەن کولتوورن و پێشتریش بەسەر هەڕەشەی لەم چەشنەدا زاڵبوون. پشتیوان بە خودا لەمەودواش زاڵدەبن.
لەبارەی ئەگەری هەر جۆرە ڕێکارێک لەلایەن تورکیاوە لەم ناوچەیە، هاکان فیدان وتی، تۆ کە پشتیووانی لە دوژمنەکەی من بکەیت، چاوەڕێی چیم لێدەکەیت؟ لەم بابەتەدا کراوەین. ئەرکی منە ڕێگری لەوە بکەم کە ئەو دوژمنەم نەتوانێت کەڵک لە تۆ ببینێت. ئەمەش دەکەم؛ کە دەشیکەم هیچ فێڵ و تەڵەیەکت بۆ دانانێم. ڕووبەڕوو پێتدەڵێم.

هاکان فیدان: خەڵکی سلێمانی دۆستی تورکیان

هاکان فیدان ڕووی قسەکانی ئاڕاستەی یەکێتی کرد و وتی، واز لەمە بهێنە، چونکە ئەمە لە بەرژەوەندیی تۆدا نییە و لە بەرژەوەندیی هیچ کەسێکدا نییە. خەڵکی سلێمانی، خەڵکێکن دۆستی تورکیان. خەڵکێک نین کاریان بە ڕێکخراوی تیرۆریستییەوە هەبێت. سەرکردایەتیی یەکێتیی نیشتمانیی کوردستان و ستافی پێکهێنەری ئەو حیزبە، بەو پەیوەندی و نزیکایەتییەی لەگەڵ پەکەکە هەیانە، بەدەر لەوەی کێشە بۆ ئێمە درووست دەکات، بووەتە هەڕەشە بۆ سەر ئاساییشی نیشتمانیش.
تورکیا پێشتریش چەندین جار لە ڕێی بەرپرسانی باڵایەوە، نیگەرانی و تێبینیی لەسەر سیاسەتی یەکێتیی نیشتمانیی کوردستان لە بابەتی پەکەکە هەبووە.
#ڕەجەب تەیب ئەردۆغان#، سەرۆککۆماری تورکیا ڕۆژی 15-02-2024 لەکاتی گەڕانەوەی لە قاهیرەوە بۆ وڵاتەکەی، وەڵامی پرسیاری ڕۆژنامەڤانێکی لەمبارەیەوە دایەوە و وتی، سلێمانی، هەمیشە دەستمان بەسەریەوەیە و شوێنێکە هاو نەژادەکانی ئێمەی لێیە. لە بابەتی بەرەنگاربوونەوەی تیرۆردا لەگەڵ هەولێر لە ئاڕاستەیەکی باشین و بەرەوپێش دەڕۆین. بەڵام سلێمانی، واتە ئیدارەی (ی.ن.ک) سەرەڕای ئەوەی چەندینجار ئاگادارمان کردوونەتەوە، بەداخەوە بەردەوامە لە پشتیووانیکردنی ڕێکخراوی تیرۆرستیی پەکەکە/#یەپەگە#/پەیەدە.
سەرۆککۆماری تورکیا لە بەردەوامی گوتەکانیدا باسی لەوە کرد لە دیدارەکەیان لەگەڵ #مەسرور بارزانی# لە دوبەی باسیان لەو بابەتە کردووە و ڕایگەیاند، لە دیدارەکەماندا ئێمە بابەتەکەمان خستە بەر باس و ئاگادارمان کردنەوە. با هیچ کەسێک چاوەڕێی هەڵوێستێکی جیاواز لە ئێمە نەکات. کاردانەوەی پێویستمان دەبێت. ئەم بابەتە فەرامۆش ناکەین و ئەو هەنگاوانە دەنێین کە لەدەستمان دێن. دەتوانین بەرگەی زۆر بابەت بگرین، بەڵام کاتێک باسەکە دێتە سەر مانەوە و ئاساییشی نیشتمانیمان، دەرگاکانی لێبووردەیی تاوەکوو کۆتایی دادەخەین و ئەوەی پێویستە دەیکەین.[1]

#قوباد تاڵەبانی#، جێگری سەرۆکی حکومەتی هەرێمی کوردستان لەسەر داوای #هاکان فیدان# بەرپرسی دەزگای هەواڵگری تورکیا میت چووە تورکیا.
قوباد تاڵەبانی لەسەر داوای هاکان فیدان چووەتە تورکیا، ئەوەش دوای ئەوەی لە بەغدا کۆبوونەوەی لەگەڵ جێگری بەرپرسی میت کردووە.
تورکیا دەیەوێت بە تەواوی کۆنتڕۆڵی سنووری #سلێمانی# لە ڕووی هەواڵگیرییەوە بکات، بۆیە میت دەستی بە کۆبوونەوە لەگەڵ قوباد تاڵەبانی لە ئاستی باڵا کردووە و دەیەوێت لەو بارەوە چەند ڕێککەوتنێک بکەن.
تورکیا کێشەی لە جموجوڵی هێزە نەیارەکانی لە سنووری سلێمانی هەیە و دەیەوێت لە ڕێگەی یەکێتییەوە کۆتایی بەو جموجوڵانە بهێنێت، بۆیە ئەو کۆبوونەوانە لەنێوان هەردوولا بەردەوام دەبن. [1]

ناونیشانی بابەت: هاکان فیدان، کوردێک لە لوتکەی هەواڵگری ڕۆژهەڵاتی ناوەڕاستدا

$هاکان فیدان، چۆن لە هەرێمی کوردستان دەڕوانێت؟$
هاکان فیدان، ڕاوێژکاری دەزگای هەواڵگری تورکیا (میت) لە ئێستادا بەکەسی یەکەمی هەواڵگری لە ڕۆژهەڵاتی ناوەڕاست دادەنرێت و دەزگاکەی هەژمونێکی هێندە بەهێزی هەیە نەخشی بەسەر زۆربەی ڕووداوەکانی ڕۆژ هەڵاتی ناوەڕاستەوە هەیە.
هاکان فیدان، تێکەڵبوونی بەبواری سەربازی دەگەڕێتەوە بۆ ساڵی 1986 وەک سەرباز لە ڕیزەکانی سوپای تورکیا دەست بەکار دەبێت. دواتر لە سوپا بەردەوام دەبێت و پلەی مولازم بەدەست دەهێنێت. دەبێتە ئەفسەر لە یەکێک لەو یەکە سەربازیانەی تورکیا کە لەناو هێزەکانی ناتۆ ئەرک دەبینێت. پاشان لە زانکۆی میریلاندی ئەمەریکی دەخوێنێت و بڕوانامەی بەکالۆریۆس لە بواری کارگێڕی سەربازی بەدەست دەهێنێت. لە ساڵی 1999 دەیەوێت لە زانکۆی بلیکێنت لە ئەنقەرە لە بواری کارگێڕی و ڕێکخستنی سەربازی بخوێنێت. بەڵام یەکێک لە مامۆستاکانی پێشنیار دەکات ماستەرەکەی لە بواری هەواڵگریدا بخوێنێت... بەو پێیەی دەزانێت هاکان خوێنەری ئەو پەڕتووکانەیە کە لەسەر دەزگا هەواڵگرییەکان نووسراون. پاشان هاکان فیدان پێشنیارەکە پەسەند دەکات و توێژینەوەکەی لەسەر ڕۆڵی دەزگای میت دەبێت لەدەرەوەی تورکیا.
ئەحمەد داود ئۆغڵۆ، سەرۆک وەزیری پێشووتری تورکیا زۆر سەرسام دەبێت بە توێژینەوەکەی. پاشان هاکان فیدان لە باڵوێزخانەی ئوسترالیا وەک شارەزای بواری سەربازی کاردەکات و دواتر لە ڕێکخراوی نێودەوڵەتی وزەی ئەتۆم دەست بەکارکردن دەکات. لەپاڵ شارەزاییە سەربازیەکەی وەکوو دبلۆماتێکی کارا دەردەکەوێت. دوای ئەوەی بڕوانامەی دکتۆرا بەدەست دەهێنێت و توێژینەوەکەی لەسەر داڕشتنەوەی دەزگای میت دەبێت و بەراوردی میت دەکات بەدەزگای هەواڵگری بەڕیتانیا لە سەردەمی جەنگی جیهانی دووەم.
لە ڕێگای ئەحمەد داود ئۆغڵۆوە پێشنیار دەکرێت بۆ کارکردن لە ئاژانسی هەواڵگری تورکیا. دوای نزیکبوونەوەی لە ئەردۆغان و ئاک پارتی وەک ڕاوێژکاری دەزگای میت دادەنرێت کە بەرزترین پۆستی هەواڵگری و ئەمنی تورکیایە.
فیدان، ڕۆڵێکی گەورەی بینی لە پتەوکردنی پێگەی ئەردۆغان و سەرەتا تەسفیەی جەنەڕاڵەکانی سوپای تورکیای کرد کەئەمە ئەستەم بوو لە دوای 85 ساڵ لە باڵا دەستی سوپا و جەنەڕاڵەکان لە تورکیا.
هاکان فیدان، سەرجەم تۆڕە گەورەکانی ناو سوپای ئاشکراکردو هەر زوو دەزگا گرنگەکانی تورکیای لە نەیارەکانی ئاک پارتی پاک کردەوە.
لەسەر ئاستی سیاسەتی دەرەوە، دووبارە دەزگای میت دادەڕێژێتەوە و تۆڕی فراوان بۆ دەزگاکە درووست دەکات بەتایبەت لە وڵاتانی هاوسنووری تورکیا.
میت لەو پەڕی کازاخستان و کۆمارە تورکەکانی ناوەڕاستی ئاسیاوە تا ئەفریقا و وڵاتانی عەرەب و باڵکان و ئەوروپا دەست بەچالاکی دەکات. لە ئێستا یەکێکە لە بەهێزترین ئاژانسەکانی هەواڵگری لە جیهان.
تێڕوانینی فیدان و توژینەوەکانی بەتەواوەتی ڕەنگی داوەتەوە لە دەزگای میتدا... هۆبەی جیاوازی بۆ سەرجەم ئەو ناوچەو وڵاتانەی دەرەوەی تورکیا کردووەتەوە کە بەلای تورکیاوە گرنگن.
فیدان پەیوەندییەکی پتەوی لەگەڵ ئەردۆغان هەیە. زۆرجار بە ڕووەکەی تری ئەردۆغان وەسفی دەکەن.
لە 15ی تەمووزی 2016، پلانی گەورەترین کودەتای دژی ئەردۆغان پوچەڵکردەوە کاتێک بەشێکی سوپا شوێنە گرنگەکان و ڕاگەیاندنەکانیان کۆنترۆڵکرد.
لەو کاتەدا هاکان فیدان، هەواڵی مردنی خۆی بەشێوەی فەیک دایە ڕاگەیاندنی کودەتاچییەکان و ئەوەیان بڵاوکردەوە کە فیدان کوژراوە و تەرمەکەی لە نەخۆشخانەی باشتەپەیە لە ئەنقەرە. گرووپێکی سەربەخۆ لەناو میت، هەواڵەکەیان گەیاندە ژەنەڕاڵە کودەتاچییەکان. گوایە ئەوان فیدانیان کوشتووە. بەوەش لینکێکی لەگەڵ کودەتاچییەکان درووستکرد. وایان دەزانی میت لەگەڵیاندایە و بەدرێژای شەوی 15ی تەمووز، توانی تەواوی نەخشەکانی کودەتاچییەکان ئاشکرا بکات.
دوای دەستکەوتنی ئەو نەخشەو زانیارییانە، توانی لە چەند کردەیەکی خێرادا ژەنەڕاڵەکان لە سوپا داببڕێت و بەناوی میتەوە زانیاری هەڵەی پێدان. بەمەش شکستی بەکودەتاکەیان هێنا... خۆشی بەدرێژایی ئەو شەوە پارێزگاری لە ئەردۆغان کرد و لە تەواوی هەوڵەکانی کوشتن ڕزگاری کرد.
دوای شکست هێنانی ئەو کودەتایە، ئەردۆغان و فیدان پێکەوە هەزاران کەسیان لە سوپاو دەزگاکانی تورکیا دەستگیرکرد... بەتەواوی پاکتاوی نەیارانی ئەردۆغان کرا و بەدرێژای مێژووی کارکردنی فیدان و ئەردۆغان تاکە کەسە تا ئێستا لەگەڵ ئەردۆغان پەیوەندی بەتینە پێچەوانەی هاوڕێ کۆنەکانی ئەردۆغان وەک داود ئۆغڵۆ و عەلی باباجان و عەبدوڵڵا گویل و محەمەد شیشمەک کە پەیوەندیان لەگەڵیدا تێک چوو.
زۆربەی شرۆڤەکارانی دۆخی تورکیا پێیان وایە فیدان کاریگەریی گەورەی لەسەر ئەردۆغان داناوە و بەشێکی بڕیار و دەست وەردانەکانی تورکیا لە وڵاتانی دەرەوە کاریگەریی فیدانە بەسەر ئەردۆغانەوە.
هاکان فیدان، بڕوای بە عوسمانی نوێ و درێژبوونەوەی جوگرافیای تورکیا هەیە... بەتەواوەتی بڕوای بە نەخشەی عەهدی میللی تورکیا هەیە کە باکووری قوبرس و #هەرێمی کوردستان# و #کەرکووک# و موسڵ و بەشێکی دورگەکانی یۆنان بە خاکی تورکیا دەزانێت...
لە ئاستی دەرەوە جگە لە ڕۆڵی گەورەی میت لە هەرێم کە چەندین چالاکی و کردەوەی ئەنجامداوە لە دەستێوەردانەکانی شەڕ لە سووریا و درووستکردنی دەیان گرووپی چەکداری نزیک لە تورکیا لەو وڵاتە ڕۆڵی هەبووە. لە لیبیا ڕۆڵی گەورەی هەبوو لە هێشتنەوەی حکومەتی تەرابلوس کاتێک هێزەکانی سەر بە خەلیفە حەفتەر بە پشتیوانی میسر و ئیمارات و سعودیە ویستیان بیڕوخێنن.
لە گەمارۆی سعودیەو ئیمارات بۆ سەر قەتەر ئەندازیاری فریاکەوتنی حکومەتەکەی قەتەر بوو... هەر زوو خۆی و یەکەیەکی سەربازی سوپای تورکیا گەیشتنە قەتەر و پلانی جوڵەی سەربازیان لە دژى ئەو وڵاتە پوچەڵ کردەوە...
لە جەنگەکانی ئەرمینیا و ئازەربایجان، ڕۆڵی یەکلاکەرەوەی بینی بە قازانجی ئازەربایجان. لە کەیسی کوشتنی خاشقچی ڕۆژنامەنووسی سعودیە لە کونسوڵخانەی تورکیا لە ئێستانبوڵ گورزێکی کوشندەی لە سعودیەو محەمەد بن سەلمان، شازادەی جێنشینداو هەرزوو بڕوای بەهەموو وڵاتان هێنا کارەکە بە فەرمانی شازادەی جێنشین کراوە و سعودیەی ناچارکرد بۆ داخستنی کەیسەکە سازش بە قازانجی تورکیا بکات لە سووریا و وڵاتانی عەرەبی.
هەموو ئەو ڕۆڵانەی تورکیا لە پشت پەردەوە دەیگێڕێت، دەرهێنەرەکەی هاکان فیدانە و لەپاڵ پەیوەندی لەگەڵ ڕۆژاوا لە هەمان کات پەیوەندی لەگەڵ ئێران و ڕووسیا درووستکردووە لە ئاستی هەواڵگری. ئەمەش نیگەرانی خۆراوای لێکەوتووەتەوە، بەڵام ئەردۆغان و فیدان وەکوو ستراتیجی تورکیا لە پەیوەندییەکانی میت دەڕوانن.
فیدان لە ئێستادا بەهێزترین پیاوی هەواڵگری ڕۆژهەڵاتی ناوەڕاستە و دەزگاکەشی بەهەمان شێوەیە، یار و نەیارەکانی حسابێکی گەورەی بۆ دەکەن.
هاکان فیدان، لە ساڵی 1968 لە ئەنقەرە لە دایک بووە. هەر چەندە باوکی و باپیری لە شاری ئەردیشی باکووری کوردستانەوە ڕۆشتونەتە ئەنقەرە و بەڕەچەڵەک کوردن، بەڵام فیدان دانی بەمەدا نەناوە... ئەگەرچی کەسە نزیکەکانی نایشارنەوە خەڵکی شارۆچکەی ئەردیشن کە شارۆچکەیەکە سەر بە پارێزگای وانە و دەکەوێتە باکووری ڕۆخی دەریاچەی وان.
لە ساڵی 2018 میدیاکانی پەکەکە چاوپێکەوتنی گەڕیلایەکیان بڵاوکردەوە بەناوی ”عەگید زیلان” کە خۆی بە کوڕی ئامۆزای فیدان ناساند.
هاکان فیدان، هەر چەندە لە بنەڕەتیشدا کورد بێت، بەڵام لە سەردەمی ئەودا میت زۆرترین کردەی دژی کورد ئەنجامداوە لە هەرێم و #ڕۆژاوای کوردستان#... چونکە هەموو بۆردومانەکانی فڕۆکەو درۆنەکانی تورکیا، ئامانجەکانی لەلایەن میتەوە دیاری دەکرێن.
ئێستا فیدان لە لوتکەی هەواڵگری ڕۆژهەڵاتی ناوەڕاستدایە و زۆرجار میدیاکانی تورکیا بەشوێنگرەوەی ئەردۆغانی دەزانن و پێیان وایە ئەگەر ئەردۆغان ئەم خولەی سەرۆکایەتی بباتەوە ئەوا بەهۆی تەمەن و نەخۆشییەوە ناتوانێت خولی ئاییندە بباتەوە، بەڵام لە فیدان دڵخوازتری دەستناکەوێت کاندیدی بکات بۆ سەرۆکی تورکیا.[1]