بەهۆی درووستبوونی کێشە لەگەڵ #چیا نەوشیروان مستەفا#، عومەری سەید عەلی هەرێمی کوردستانی بەجێهێشتووە و ئێستا لە وڵاتی سویدە.
کێشەکانی نێوان چیا نەوشیروان مستەفا و عومەری سەید عەلی گەیشتووەتە ئاستی شەڕ و چیا نەوشیروان مستەفا ڕێکخەری پێشووی گۆڕانی بەسەر چاوەی شکستە یەک لە دوای یەکەکانی گۆڕان زانیووە.
پێویست بوو لە ساڵی 2018 کۆنفرانسەکانی گۆڕان ئەنجام بدرێن، بەڵام کەس بەتەنگ بانگەوازی ئاشتبوونەوەی هەڵسوڕاوانی گۆڕان و بەستنی کۆنفراسەکانی گۆڕان نەچووە.
#بزووتنەوەی گۆڕان# لە ئێستادا بەدەست سێ باڵەوەیە و هەریەکەیان ئاڕاستەیەکن، کە بریتین لە باڵی عومەری سەید عەلی و باڵی چیا نەوشیروان و باڵی تیمی حکومی گۆڕان کە #مستەفا سەید قادر# سەرپەرشتی دەکات. [1]

بەڕێز #عومەری سەید عەلی#،
رێکخەری گشتیی #بزووتنەوەی گۆڕان#
سڵاو و ڕێز..
بەبۆنەی هەڵبژاردنتانەوە بە ڕێکخەری گشتیی بزووتنەوەی گۆڕان، بەگەرمی پیرۆزباییتان لێ دەکەم، هیوای سەرکەوتنان بۆ دەخوازم. پیرۆزبایی لە بەڕێزان ئەندامانی خانەی ڕاپەڕاندن و سەرکردایەتیی تازەی بزووتنەوەی گۆڕان دەکەم، هیوادارم لە کار و ئەرکەکانیاندا سەرکەوتوو بن.
بە وەرگرتنی پۆستی یەکەمی هێزێکی گرنگی سیاسی لە هەرێمی کوردستان وەک بزووتنەوەی گۆڕان، بەڕێزتان قۆناغێکی تازە لە خەبات و ئەرک و بەرپرسیاریەتی دەگرنە ئەستۆ، ئەلقەیەکی دیکەش دەخەنە سەر ئه و زنجیرە خەبات و تێکۆشانەی کە ساڵانێکی دوور و درێژ و تەمەنێکی پێشمەرگایەتی و خەبات و کوردایەتی لەپێناو کوردستاندا بەڕێتان کردووە.
ئێمە بە هیوا و گەشبینییەوە دەڕوانینە وەرگرتنی ئەم پێگەیە لەلایەن بەڕێزتانەوە، ئومێدیشمان زۆرە کە ئامانجە هاوبەشەکانی هەموو هێز و لایەن و پێکهاتەکانی کوردستان لە بەدیهێنانی مافە ڕەواکانی گەلەکەمان، وادەکات هەموومان پێکەوە لەگەڵ بەڕێزتان و بزووتنەوەی گۆڕان و لایەنەکانی دیکە بتوانین چارەسەری کێشەکان بکەین و ئه و دەرفەتەی ئەمڕۆ بۆ گەلی کوردستان هاتۆتە ئاراوە، بە باشترین شێوە بۆ بەرژەوەندیی کوردستان و بەدیهێنانی ماف و خەونەکانی، کە بە درێژایی سەتان ساڵ خەباتی بۆ کردووە و شەهید و خوێن و قوربانی بۆ داوە، بقۆزینەوە.
دووبارە پیرۆزباییتان لێ دەکەم، سەرکەوتوو بن.
#نێچیرڤان بارزانی#
سەرۆک وەزیرانی هەرێمی کوردستان
25-07-2017

[1]

شەهید عەبدولڕەحیم و عومەری سەید عەلی و فەرەیدون عەبدولقادر و محەمەد تۆفیق ڕەحیم

لە ساڵی 1945 لە گەڕەکی شێخان لە #سلێمانی# لەدایکبووەو خانەی مامۆستایانی تەواو کردووە.
ساڵی 1976 بە شەش ساڵ زیندانی سزا دەدرێت، دوای سێ ساڵ لەتەواوی کردنی زیندان بەر لێبوردنی گشتی دەکەوێت و ئازاد دەکرێت.
دوای ئازادبوونی لە زیندان بە ئەندامی سەرکردایەتی #کۆمەڵە#، سەرکردایەتی یەکێتی هەڵبژێردراوە.
لە ساڵی 1980 بەهۆی بۆردومانی فڕۆکە لە بناری #کێوەڕەش# بریندار بووە، پاشان ڕەوانەی سوید کراوە هەر لەوکاتەوە سەرپەرشتی ڕێکخستنەکانی یەکێتی کردووە لە ئەوروپا.
لە هەموو کۆنگرەکانی یەکێتی بە ئەندامی سەرکردایەتی و پاشان مەکتەبی سیاسی هەڵبژێردراوە.
ساڵی 1992 بووەتە ئەندامی #پەرلەمانی کوردستان#.
ساڵانێکیش لێپرسراوی مەڵبەندی سلێمانیی یەکێتی بوو.
ساڵی 2009 لەگەڵ #نەوشیروان مستەفا# و قادری حاجی عەلی و #عوسمانی حاجی مەحمود# و #محەمەد تۆفیق ڕەحیم# و #مستەفا سەید قادر#، دەستی لە ئەندامێتی مەکتەبی سیاسی یەکێتی کێشایەوە و بۆ هەڵبژاردنەکانی 2009 لەسەر لیستی گۆڕان خۆی کاندید کرد و دواتر کشایەوە.
پێش ئەوەی بەرێکخەری گشتی گۆڕان هەڵبژێردرێت، سەرپەرشتیاری فراکسیۆنەکانی گۆڕان بووە.
لە ڕۆژی 25-07-2017 بووە ڕێکخەری گشتیی #بزووتنەوەی گۆڕان#.
دەست لەکارکێشانەوە
عومەری سەید عەلی لە 13ی تشرینی یەکەمی 2021 بەھۆی ئەنجامە خراپەکانی بزووتنەوەی گۆران لە ھەڵبژاردنی پێشوەختەی ئەنجومەنی نوێنەرانی عێراق لە 2021 کە نەیتوانی ھیچ کورسییەک بەدەست بھێنێت و لە ھەمان کاتدا وەک ھەڵگرتنی بەرپرسیارێتیی ئەو شکستە سیاسییەی گۆڕان، لەگەڵ ئەندامانی جڤاتی نیشتمانی بزووتنەوەکە بە شێوەی گشتی دەست لە کارکێشانەوەیان ڕاگەیەندرا.

دوای سڵاو و ڕێز بۆ جەنابتان، هیوادارم بەڕێزتان لەتەندروستییەکی زۆر باش دابیت.
کاک عومەر من وەکو هاوڵاتییەکی دڵسۆز بەنیشتمان و پرسە چارەنووسسازەکانی ئه و نامەیەم نوسییوە و نامەکەم لەچوارچێوه و بازنەی هیچ ئۆرگان و لایەنێکی سیاسیدا نییە، تەنها دەرهاوێشتەی ویژدان و خەمخۆری و دڵسۆزیمە بۆ نیشتمان.
.. گومانی تێدا نییە کە لەسیستمە ڕۆژهەڵاتییەکاندا سەرۆک و سکرتێر و ڕێکخەر و ڕابەر ڕۆڵی سەرەکی دبینین لەرووداوەکان و هەر ئەوانیش ئەبن بەرێکخەری هاوسەنگی لەناو حزبەکانیان و هەروەها لەناو جولانەوەی سیاسی و ململانێکانیدا، بۆیە بەکۆچی دوای کاک نەوشیروان ئەرکی گەورەی #بزوتنەوەی گۆڕان# ئێستا لەئەستووی بەڕێزتان دایه و ئەوەش بەرپرسیارەتی بەڕێزتان وەکو ڕێکخەری بزوتنەوەی گۆڕان و ئه و جەماوەرەش چ هەوادارو ئەندام بن یاخود دەنگدەری هەڵبژاردنەکان، هەمووی لەچوارچێوەی ئه و ئەرکە قورسانەی جەنابتان دایە.
.. جەنابی کاک عومەر.... دوورە پەرێزی گۆڕان لەپڕۆسەی ڕیفراندۆمی سەربەخۆیی کوردستان بەهەر بیانوێکی پاک و مەشروعیش بێت، مەودایەک بزوتنەوەی گۆڕان لەنەخشەدانانی سیاسی ئێستا و ئایندەی کوردستان دووردەخاتەوە، دوور نییە بزوتنەوەی گۆڕان بێبەش و بێ توانابکات لەپەڕینەوە بۆ قۆناغی دواتر ئەوەش دەبێتە هۆی زیانهێنێکی سیاسی گەورە بۆ بزوتنەوە بەڕێزەکەتان.
.. بەڕێز کاک عومەر... لەهەموو مێژووی جیهانی دوور و نزیکدا دامەزراندنی دەوڵەت هەرگیز پەیوەست نەبووە بە مەرجی بوونی شەفافیەت و حوکمی ڕەشید و نەزاهەت بەڵکو هەمیشە ڕێککەوتی سیاسی و هەڵکەوتنی هەلی مێژوویی و وەچەرخانی ڕووداوە سیاسییەکان وایان لەسەرکردە ئازاکان کردووە بڕیار بدەن و پشت به و ئەگەرانه و و بەتوانای میللەتەکەیان ببەستن بۆ وەدەستهێنانی سەربەخۆیی و بونیادنانی دەوڵەت، بەرێزیشتان دەزانن کەجیاوازی زۆر لەنێوان دەوڵەت و حکومەتدا هەیە، دەوڵەت بەمانای سیادەی نیشتمانی و پێناسەیە بۆ هاوڵاتیانیەتی، ئەما حوکمی ڕەشید و شەفافیەت و نەزاهەت و ڕێگەگرتن لە گەندەڵی ئەوا لەتایبەتمەندییەکانی ئه و حکومەتە یەکلەدوایەکانەدایە کە لەلایەن خەڵکەوە لەچوارچێوەی سیادەی دەوڵەتدا هەڵدەبژێردرێن و بەشێوەیەکی دیموکراسییانەش دەستاودەست دەکرێت هەر ئەوەشە دەبێتە هۆی بەرقەراربوونی دەوڵەتی هاوڵاتیبوون.
.. ئەگەر لەئێستادا بزوتنەوەی گۆڕان وەکو ئۆپۆزسیۆنی سیاسی و پارێزەری بەرژەوەندییەکانی میللەت خۆی وێناکردووە، ئەوا دەتوانێت هەمان ڕۆڵ لەچوارچێوەی دەوڵەتی سەربەخۆشدا بەگوڕ و تینێکی زیاتر ببینێت و دوور نییە لەهەڵبژاردنەکانی گشتی دەوڵەتی کوردستانیشدا متمانەی میللەتیش وەدەست بهێنێت بۆ دروستکردنی حکومەتێکی شەفاف و ڕەشید کە دمێکە بزوتنەوە بەڕێزەکەتان و تەنانەت لایەنەکانی تریش کە لەدەسەڵاتن هەوڵی بۆ ئەدەن. هەرگیز پێشبینی ئەوەش ناکرێت کە دەوڵەتی کوردستان دەوڵەتێکی دیکتاتۆری بێت لەبەر زۆر هۆکاری ناوخۆیی و دەرەکی و ئیسترایجی وەڵاتە زلهێزەکانیش ڕێگر دەبن، تەنانەت ئیمزاکردنی دەوڵەتی کوردستانیش لەسەر میساقی نەتەوە یکگرتووەکان و ڕێککەوتنە پاشکۆکانیشی زامنی پرسی حوکمی ڕەشید و شەفافن.
جەنابی کاک عومەر.... لەئێستادا کوردستان بەره و ڕیفراندۆم دەڕوات و هەموو ئەگەرەکانیش ئەوەمان پێدەڵێت کە گەلانی کوردستان بە ڕێژەیەکی زۆر بەرچاو دەنگ بۆ سەربەخۆیی ئەدەن و بێگومان لەهەمان کاتیشدا بەشێکی بەرچاویش بەنەخێر دەنگ دەدەن کەمن ئەوانیش بەکەسانی دڵسۆز دەزانم! بەڵام لەئایندەدا و لەنێو دێڕەکانی مێژوودا ئه و خۆدوورگرتنه و هەڵوێسێتەی بزوتنەوەکەتان بەکارێکی ئەرێنی تۆمارناکرێت و دووریش نییە ئەم هەڵوێستە ببێتە هۆی پەراوێزبوونی بزوتنەوەی گۆڕان و ئینتحاربوونی سیاسی و کوژانەوەی لەمەیدانی کاریگەربووندا لەسەر نەخشەی سیاسی کوردستان.
.. لەکۆتایدا هیوادارم جەنابتان وەکو سەرکردەیەکی ئازا لەپاڵ سەرکردەکانی ترو ئه و جەماوەرەش کەمتانەی بەئێوە داوە هەموو ئه و گرفت و کێشەو(غوبن)انە کەلەئەنجامی ململانێی سیاسیدا دروستبوون وەلا نێن وەکو چۆن بزوتنەوەی گۆڕان لەسەرتادا بەمومێکی داگیرساوەوە هاتە مەیدان ئاوەهاش بەهەمان مۆم و هەمان وزە ڕێگای سەربەخۆیی ڕۆشنتر بکەنەوه و جەنابتان و بزوتنەوەکەتان ببن بەخاوەنی ئه و پرسە کە لەمێژوودا هەر یەکجار ڕوودەدات و دووبارە نابێتەوە.
هەر بژین، بەهیوای سەرکەوتن و سەرفیرازی
هاوڵاتی
هەڵگورد عبدالوهاب جندیانی
هەولێر - 30-08-2017

#نێچیرڤان بارزانی# پیرۆزبایی لە #بزووتنەوەی گۆڕان# دەکات
بەڕێز عومەری سەید عەلی، ڕێکخەری گشتی
بەڕێزان ئەندامی خانەی ڕاپەڕاندن و جڤاتی نیشتمانيی بزووتنەوەی گۆڕان
لە يادی یازدە ساڵەی دامەزراندنی بزوتنەوەی گۆڕاندا، بە گەرمی پیرۆزبایی لە بەڕێزتان و ئەندامان و لایەنگرانی بزووتنەوەکەتان دەکەم، هیوای بەردەوامی و پێشکەوتنتان بۆ دەخوازم.
بزووتنەوەی گۆڕان هەر لە دامەزراندنیيەوە لەسەر دەستی خوالێخۆشبوو #نەوشیروان مستەفا# کە لەم یادەدا سڵاو بۆ گیانی دەنێرین و یادی دەکەينەوە، ڕۆڵێکی دیاری لە کایەی سیاسیدا گێڕاوە، ئێستاش لایەنێکی کاریگەر و سەرەکیی پێکهاتەی حکوومەت و پرۆسەی سیاسیی کوردستانە، هەڵوێستەکانیشی بەرپرسیار و خەمخۆرانەن.
هیوادارم ئەم یادە گوڕوتینی زیاتر بداتە تێکۆشانی سیاسيی بزووتنەوەکەتان لەپێناو ئامانجە ڕەواکانی گەلەکەماندا، ئەم بۆنانە ببنە دەرفەتی قووڵکردنەوەی گیانی هاوکاری و پتەوکردنی هاوخەباتی و دەستگرتنی کۆی لایەنە تێکۆشەرەکانی کوردستان بە نەگۆڕ و ئامانجە نیشتمانی و بەرژەوەندییە باڵاکانی گەلەکەمانەوە.
دۆخی نالەبار و کێشە و قەیرانەکان کە بەرۆکی کوردستانیان گرتووە، یەکڕیزی و تەبایی و پیکەوەیی لە هەموو لایەک دەخوازێت تا بتوانین ئەم قۆناغە سەختە تێپەڕێنین، گەلەکەمان لە قەیران و کێشەکان دەرباز بکەین، پارێزگاری لە قەوارەی دەستووريی هەرێمی کوردستان بکەین و هەنگاوی زیاتر بۆ خزمەتکردنی خەڵکی کوردستان بنێين.
دووبارە پیرۆزباییتان لێدەکەم و هیوای سەرکەوتنتان بۆ دەخوازم.
نێچیرڤان بارزانی
سەرۆکی هەرێمی کوردستان
#25-07-2020#

بەهۆی نەخۆشییەوە، چانسی #عومەری سەید عەلی# بۆ بوون بە ڕێکخەری گشتی #بزووتنەوەی گۆڕان#ی کەمکردووەتەوە.
هەرچەندە عومەر سەید عەلی پشتگیرییەکی بەهێزی ناوخۆیی هەبوو بۆ ئەوەی ببێتەوە بە ڕێکخەری گشتی گۆڕان، بەڵام چەند ڕۆژێکە باری تەندرووستی تێکچووە.
بەهۆی تێکچوونی باری تەندرووستییەوە، عومەر سەید عەلی لە ئێستادا بۆ وەرگرتنی چارەسەر چووەتە دەرەوەی وڵات ، لەکاتێکدا هەشتی مانگی داهاتوو هەڵبژاردن بۆ ئەندامانی خانەی ڕاپەڕاندن و ڕێکخەری گشتی دەکرێت.
بەهۆی تێکچوونی باری تەندرووستی عومەر سەید عەلی، ئەگەر زۆرە لە کێبرکێ ڕێکخەری گۆڕان بکشێتەوە و ڕکابەرییەکە بۆ #مستەفا سەید قادر# یەکلابێتەوە. [1]

دوای کۆچی دوایی ڕێبەر و دامەزرێنەری #بزوتنەوەی گۆڕان# برامان #نەوشیروان مستەفا#، بزووتنەوەکەتان دەستی بە، قۆناخێکی نوێ هەڵبژاردنی دیموکراتی لە نێو دام و دەزگاکانی دا کرد و لە ئەنجامدا ڕێکخەری گشتی و بەڕێوەبەرایەتی نوێ دیاریکران. بە بۆنەی ئەم پرۆسە دیموکراسیی و خۆ ڕێکخستنەوەی که ئەنجامتان داوە، پیرۆزبایی خۆمان ئاراستەی بەڕێزتان و هەموو هەڤاڵانی هەڵبژێردراو دەکەین.
برایانی بەڕێز:
بێگومان هەڵبژاردنی ڕێکخەری گشتی و ئەندامانی بەڕێوەبەرایەتی دوای کۆچی دوایی ڕێبەری دامەزرێنەر، لە زۆر لایەنەوە قۆناخێکی دژوارەو لە هەمانکاتیشدا ئەرک و بەرپرسیارێتییەکی گرنگە، به تێیەڕاندنی ئاستەنگییەکان و بە جێهێنانی ئەرکەکانی قۆناخ، بزووتنەوەی گۆڕان دەتوانێت پێویستی بەرپرسیارێتی خۆی لە بەرامبەر ڕێبەری دامەزرێنەر، ئەندامانی بزووتنەوە و گەلی کورد بەجێ بهێنێت، سەرکەوتنی ئێوە لەم بوارەدا بە تایبەت لە کاتێکدا که باشووری کوردستان ڕووبەڕووی قەیرانی ئابووری و سیاسی بۆتەوە خاوەن بەها و گرنگییەکی تایبەتە. بزووتنەوەی گۆڕان ئەم ئەزموونەی بە سەرکەوتوویی تێپەڕاندو بزەی خۆشی و سەرکەوەتنی خستە سەر لێوی لایەنگران، دۆستان و هەموو گەلی کورد.
هەبوونی بزووتنەوەی گۆڕان و ئەو نرخ و بەهایانەی که دەیپارێزێت، وایکردەوە که ببێتە بەشێکی دەست لێ بەرنەدراوی سیاسیەت و دیموکراسی کورد. لە ڕۆژی دامەزراندنیەوە هەتاکو ئێستا، بزووتنەوەی گۆڕان نەک لە ئاستی هەرێمایەتی، بەڵکو لە ئاستی نەتەوەییدا لە گەڵ کێشەی کورد مامەڵەی کردووەو لە تێکۆشان و نرخ و بەهاکانی هەموو پارچەکانی کوردستان خاوەندارێتی کردووە. هەروەکو چۆن یاسا و پرەنسیپەکانی دیموکراسی وەکو فاکتەری بنەڕەتی دامەزراندنی خۆی داناوە، هیچ کاتێک دەستبەرداری یەکێتی نەتەوەیی کورد و ژیانی برایەتی نەبووە. یەکسانی، ئازادی، عەدالەت و ئازادی ژنی وەکو بنەمای سەرەکی چەمکی دیموکراسی پەسند کردووە. ئەمانەو زۆر تایبەتمەندی پێشکەوتووخوازانەی تر، به باشترین شێوە لە کەسایەتی و ژیانی خوالێخۆشبوو نەوشیروان مستەفا و پرۆگرامی بزووتنەوەی گۆڕاندا ڕەنگی داوەتەوە. هیچ گومانمان لەوەدا نییە کە ئێوە وەکو هاوڕێیانی نەوشیروان مستەفا نوێنەرایەتی ئەم نرخانە بکەن و زیاتر بەروە پێشەوەی بەرن. ئێمە وەکو تەڤگەرێکی برای بزووتنەوەکەتان که هەمان نرخ و بەها پەیڕەو دەکەین، بەردەوام لە گەڵ ئێوە لە نێو تەبایی و هاوکاریدا دەبین. لەو باوەڕەداین لەم قۆناخە دژوارەی کە کوردستان و ڕۆژهەڵاتی ناوین تیایدا تێپەڕ دەبێت، بتوانین لە زۆر بواردا تێکۆشانی هاوبەش بەڕێوە ببەین. لە سەر ئەم بنەمایانە، جارێکی دی پیرۆزبایی گەرمی خۆمان ئاراستەی جەنابتان دەکەین.
لەگەڵ ڕێزدا
هاوسەرۆکایەتی کۆنسەی بەڕێوەبەری #کۆما جڤاکێن کوردستان# - #کەجەکە#
27-07-2017