#نێچیرڤان بارزانی#، بۆچی ڕۆڵی #ئیدریس بارزانی# خستە پێش ڕۆڵی #مەسعود بارزانی#؟
بۆچی باسی گرنگی ڕێککەوتنێکی نوێی لەنێوان #پارتی دیموکراتی کورستان# و #یەکێتیی نیشتمانی کوردستان# کرد؟
بۆچی باسی لە ڕۆڵی مام #جەلال تاڵەبانی# کرد بەوەی ئەندازیاری ڕێککەوتنی ستراتیژی نێوان پارتی و یەکێتی بووە؟
کۆدەکانی پشت قسەکانی نێچیرڤان بارزانی چی بوون، کە ویسی بە مام و ئامۆزاکەی بیگەیەنێت؟
بوار لەم شیکارییەدا، خوێندنەوە بۆ ئەو وتارەی نێچیرڤان بارزانی دەکات، کە لە ساڵیادی کۆچی دوایی مام جەلال تاڵەبانی و کردنەوەی دەزگای سەرۆک مام جەلال لە #هەولێر# پێشکەشی کرد.
لە سەرەتای وتارەکەدا نێچیرڤان بارزانی بە وەسفێکی زۆری مام جەلال دەستی بە قسەکانی کرد و وتی: ڕاستە چەند ساڵێک بەسەر ماڵاواییکردنیدا تێپەڕیوە، بەڵام ئێمە بە درێژاییی ئەم چەند ساڵە و دوای نەخۆشکەوتنی و دوورکەوتنەوەی لە کاری سیاسی و دەوڵەتی، هەمیشە هەستمان بەو بۆشایییە کردووە، کە مام جەلال بەجێی هێشتووە.
ئەم قسانە ئاماژەیەکی ڕوونە بۆ ئەوەی، کە مام جەلال لە دوای خۆی بۆشایی لە پەیوەندییەکانی نێوان پارتی و یەکێتی درووستکردووە، بەتایبەتیی دوای نەخۆشکەوتن و کۆچی دوایی ناوبراو ساڵ بە ساڵ پەیوەندییەکانی ئەو دوو حیزبە بەرەو خراپتر ڕۆیشتووە.
نێچیرڤان بارزانی دواتر باسی لە ڕۆڵی مام جەلال و ئیدریس بارزانی باوکی کرد، لە بارەی واژووکردنی ڕێککەوتنی ئاشتی و وتی: من مام جەلالم لە ڕۆژی درووستکردنی ئاشتی و تەباییدا ناسیوە، لەبەر ئەوە بۆ من زیاتر لە هەموو شتێک، سەرکردە و یادگارێکی گەورەی پاراستنی ئاشتی و پێکەوەکارکردنە.
ئەو نموونەیەکی هێنایەوە و وتی: ڕۆژی 8ی نۆڤەمبەری 1986 هەردوو ڕەوانشاد، مام جەلال و باوکم ڕێککەوتننامەی ئاشتیی نێوان پارتی دیموکراتی کوردستان و یەکێتیی نیشتمانیی کوردستانیان واژووکرد.
لێرەشدا نێچیرڤان بارزانی بەڕوونی ئەوەی وت، کە باوکی و مام جەلال ڕۆڵی گەورەیان هەبووە لە ڕێککەوتنی ئاشتی نێوان پارتی و یەکێتی و تەنانەت لە بەشێکی تری قسەکانی جەختیکردەوە، ئەو ڕێککەوتنەی ساڵی 1986 کرا، دواتر بە ئاشتبوونەوەی گشتی ناسرا، چونکە هەموو حیزبە کوردستانی و ئێراقییەکان دوای ئەو ڕێککەوتنە ئاشتبوونەوە و شەڕی ناوخۆ کۆتایی هات و بەرەی کوردستانی دامەزرا.
دواتر باسی قۆناغی دوای شەڕی ناوخۆیی کرد و وتی: دوای هەڵگیرسانەوەی شەڕی ناوخۆ لە ساڵی 1994، ویستی سەرۆک مام جەلال بۆ ئاشتی و باوەڕی جەنابی سەرۆک بارزانی بە ئاشتی، وای کرد ڕێککەوتنی ئاشتیی ساڵی 1998 لە واشنتن واژۆ بکەن و قۆناغێکی نوێی ئاشتی و پڕ لە دەستکەوتی دەستووری و سیاسی بۆ گەلی کوردستان تۆمار بکەن، زۆر دەستکەوت بۆ گەلی کوردستان بەدەست هاتن، هەموویان بەهۆی پێکەوە کارکردنی سەرۆک مام جەلال و سەرۆک بارزانی بوون.
هەروەها وتی: مام جەلال هەموو شتێکی دەکرد بۆ ئەوەی جەنابی سەرۆک مەسعود بارزانی دڵخۆش بێت، کاک مەسعوودیش هیچ داوایەکی مام جەلالی ڕەت نەدەکردەوە، تەنانەت سەرۆک بارزانی لە پێناو مانەوەی پۆستی سەرۆک کۆمار لەناو چوارچێوەی بڕیاری کوردستانی و لە دەستی مام جەلالدا، ملی نەدایە بەر گوشاری سەرۆکی ئەمەریکا و گوشارە ناوچەییەکانیش لە ساڵی 2010 و تاکوو مام جەلال نەبووەوە بە سەرۆک کۆمار، کۆڵی نەدا.
لە کۆتایی وتارەکەشیدا، نێچیرڤان بارزانی داوای واژووکردنی ڕێککەوتنێکی نوێی نێوان پارتی و یەکێتی کرد و وتی: ئێستاش جارێکی دیکە پێویستییان بە ڕێککەوتنێکی تازەی هاوبەشە بە گوێرەی ئەم قۆناغە. بە هەموو شێوەیەک ڕێککەوتنی پارتی و یەکێتی و یەکڕیزی و تەبایی لەنێوان هەموو لایەن و پێکهاتە کوردستانییەکاندا زۆر پێویستە بۆ ڕێگرتن لە لاوازبوونی زیاتری بڕیار و ئیرادەی سیاسیی گەلی کوردستان.
ئەوەشی وت: نابێت تەماشای هیچ پێوەرێک بکەین جگە لە بەهێزکردنەوەی پێگەی هەرێمی کوردستان، چونکە هێزی هەموومان بەندە بە هێز و پێگەی هەرێمی کوردستانەوە. بەهێزیمان، یەکڕیزیمانە. ئەوانەی دەتوانن هەرێمی کوردستان بەهێز بکەنەوە، بەر لە هەمووان پارتی دیموکراتی کوردستان و یەکێتیی نیشتمانیی کوردستان و تەبایی و یەکڕیزیی هەموو لایەنەکانە.
لەمەشدا نێچیرڤان بارزانی ئەو ئاماژەیدا، کە وەک ئەوەی مام و ئامۆزاکەی کاری بۆ دەکەن و دەیانەوێت پارتی بڕیاردەری یەکەم و کۆتایی بێت لە هەرێمی کوردستان و تەنانەت ئێراقیشدا نابێت، بەڵکوو دەبێت هاوبەشی لە بڕیاردا هەبێت، وەک سەردەمی ڕێککەوتنی ستراتیژی نێوان هەردوو حیزب.
نێچیرڤان بارزانی لەو وتارەیدا ویستی ئەوە بڵێت ئەوەی لەم قۆناغەدا پێویستە هەبوونی ڕێککەوتنێکی نوێییە لەنێوان ئەو دوو حیزبە نەک هەوڵدان بۆ پشتگوێخستنی لایەنێک. [1]