جلوبەرگێن #ئێزدیان# یێن کەڤنار ناسناما ئێزدیانە،لەوا ب بریارا میرێ ئێزدیان هەر ئافرەت و کچەکا سەرەدانا پەرستگەها پیرۆزا لالش دکت دڤێت پێگیریێ ب چەند ڕێنمایان بکن،ئه و ژى جلوبەرگێن وان سپى بن و هێژایى پیرۆزیا لالش بن و ئەڤ بریارە تا ڕادەیەکێ باش هاتیە بجهئینان و خەلک د پێگیرن،هەروەسا نفشێ نۆکە بتر ژ سالێن بۆرى گرنگیێ ددەنە کەلتۆر و فلکلۆرى و ڕەسەنایەتیا خۆ ب ڕێیا ڤان جلوبەرگان دپارێزن.
تۆرا لالش یا ڕاگەهاندنێ / ڕاپۆرت:رائد غانم

فەیسەل عەلى،بەرپرسێ گرۆپێ هیڤى یێ خۆبەخش ل کەمپا چەم مشکو،بۆ دەنگێ لالش خویاکر،جلوبەرگ ژبۆ ئێزدیان د گرنگن، بەرى سالا 2014ێ ل شنگالێ خەلکى گەلەک گرنگى ب جل و بەرگێن ڕەسەن یێن ئێزدیان نەددا بتریا وان جلوبەرگێن نۆرمال بکار دئینان و خەلکى شەرم دکر وان جلوبەرگان بکاربینن و ئه و کەسێن جلوبەرگێن ئێزدیان بکار دئینان ڕێژەیەکا گەلەکا کێم بوون دناڤ خەلکێ شنگالێ دا،پشتى جینۆسایدا شنگالێ و هێرشا داعش ل سەر دەڤەرا شنگالێ کو مەرەما ئەوان تیرۆرستان ئەوبوو فلکلۆر و کەلتۆرێ دەڤەرا شنگالێ و ئێزدیان ژناڤ ببەن و ئێزدیان بنبر بکن و ئێزدیاتى نەمینت ،لەورا گرۆپێ مە ئه و هزرە کر کو جارەکا دى وان جلوبەرگێن ئێزدیان دناڤ خەلکێ دا زندى بکەین و خەلکى ل سەر ڤێ چەندێ هشیار بکەین و مە کارکر داکو ڕێژا بکارئینانا جلوبەرگێن سپى یێن ئێزدیان زێدە بکەین،د ئەنجام دا مە کارى ڕێژا ڤان جلوبەرگێن ڕەسەن یێن کەلتۆرى و فلکلۆرى زێدە بکەین و سال بو سالێ حەز ژێکەرێن ڤان جلوبەرگا دناڤ ئێزدیان دا زێدە دبن و گرۆپێ مە جل و بەرگ چێکرن و د هەموو بیرەوەرى و هەلکەفتان دا بکار دئینین خەلک ژى مفایى ژێ وەردگرن و بەردەوامین ل سەر ساخکرن و زێندیکرنا فلکلۆرێ ئێزدیان ل سەرانسەرى دەڤەرێن ئێزدینشین،چنکو کراسێ سپى دناڤ ئێزدیان دا نیشانا ئێزدیاتى یا وى/ێ کەسى یە ئەڤجا چ کچ بت یان کور بت،ئەم بەردەوامین ل سەر هشیارکرنا خەلکێ خۆ داکو فلکلۆرێ ڕەسەنێ ئێزدیان نەئێتە ونداکرن.

ل سەر هەمان بابەت(لوقمان سلێمان)بەرپرسێ نڤیسینگەها لالش ل پەرستگەها لالش،بۆ دەنگێ لالش گۆت:ب بریارا میرێ ئێزدیان هەر ئافرەت و کچەکا سەرەدانا پەرستگەها پیرۆزا لالش دکت دڤێت پێگیریێ ب چەند ڕێنمایان بکن،ئه و ژى جلوبەرگێن وان سپى بن و ئه و جلوبەرگ هێژایى پیرۆزیا لالش بن و ئەڤ بریارە تا ڕادەیەکێ باش هاتیە بجهئینان و خەلک د پێگیرن،نەخاسمە پشتى میر و جڤاتا ڕۆحانى یا ئێزدیان بریار دایى تاووس بێتە گێران دناڤ ئێزدیان دا و خەلکێ ئێزدى ب جلوبەرگێن ڕەسەن یێن ئێزدیان پێشوازیا تاووسێ کرن،ئەڤ چەندە ژى جیێ سەربلندیێ بوو کو خەلک ڤان جلوبەرگان بکاربینت،هەروەسا ئەڤ جلوبەرگێن سپى دناڤ ئێزدیان دا د کەڤنارن و پیرۆزیا خۆ هەیە، دەما خەلک سەرەدانا پەرستگەها پیرۆزا لالش دکن بتریا وان ب جلوبەرگێن سپى دئێنە لالشێ و ڤێ یەکێ ژى جوانیەکا دى دایە لالشا نوورانى و هەر دچت خەلک بتر پێگیریێ ب ڤان ڕێنمایان دکت و جلوبەرگێن خۆ یێن ڕەسەن بکاردئینت،نۆکە بتریا وان کەسێن ڤان جلوبەرگێن کەڤنار بکاردئینن کچ و کورن و فلکلۆر و ڕەسەناتیا ئێزدیان ساغ دکن و دەما خەلکەکى نەئێزدى وان کەسان دبینن ئێکسەر دزانن ئەڤ کەس ئێزدینە ئه و ژى ژبەر جلوبەرگان.
دبەردەوامیا ئاخفتنا خۆ دا گۆت:جلوبەرگێن ئێزدیان یێن کەڤنار ناسناما ئێزدیانە،دەما ئێزدى ژ وەلاتێن ئەورۆپا ژى سەرەدانا لالشا پیرۆز دکن ڤان جلوبەرگان بکاردئینن و ئه و ژى پابەندى ڕێنمایێن میر و جڤاتا ڕۆحانى یا ئێزدیانە،هەروەسا دڤێ سالێ دا بتریا ئێزدیان یێن سەرەدانا لالشێ کرین جلوبەرگێن وان گەلەک جوانن،چنکو ئه و جلوبەرگێن سپى نە و ئەڤ سالە بتر ژ هەموو سالان خەلکێ ئێزدى ڤان جلوبەرگان بکاردئینن ب تایبەتى ل لالشا نوورانى کو مەزنترین و پیرۆزترین جیێ ئایینى یێ ئێزدیایە.

دەربارەى بکارئینانا جل و بەرگێن ڕەسەن و زندیکرنا وان دناڤ خەلکى دا،سەعید تەتەر ئەندامێ تیپا گرعزێر یا هۆنەرێ شانۆیێ ل شنگالێ،بۆ دەنگێ لالش دبێژت:ئەڤە پێنگاڤەکا پیرۆزە،خەلکێ مە ل هەموو دەڤەران ڤان جلوبەرگان بکاردئینن و ئەڤ یەکە ژى جیێ سەربلندى و سەرفەرازیا ئێزدیایە،ژبەرکو نفشێ نۆکە کەلتۆر و فلکلۆر و ڕەسەنایەتیا خۆ ب ڕێیا ڤان جلوبەرگان دپارێزن،نەخاسمە دەما هەلکەفتێن ئایینى و گێرانا ڕێورەسمان چ ل لالشێ یان ژى دناڤ گوند و کۆمەلگەهێن ئێزدیان دا هەر ژ شنگال هەتا شێخان،داخواز دکەم گەنج و لاوێن ئێزدیان بەردەوام بن ل سەر پاراستنا کەلتۆر و فلکلۆرێ خۆ یێ ڕەسەن نەخاسمە جلوبەرگان.
س.س[1]