زۆر ووتار و گۆشەو ڕاپۆرتی میدیایی لە دەزگاکانی ڕاگەیاندن بەردەوامن لە بوارەکانی ژن , بەڵام تائیستا نەتوانراوە وەڵامێکی جدی گرفتی ڕێگریەکانی بەردەم مێدیاکارە ژنەکان بدرێتەوە.
گرفتەکان لە کوێی ژیانی ژنانی مێدیاکار دەبینرێتەوە؟ ئایا گرفتەکان کۆمەڵایەتین؟ یان دەزگاکانن؟ یاخود ژنانی مێدیاکار خۆیانن؟ئەمانەو چەندین پرسیاری کە.
بۆ پەنجە خستنە سەر گرفتە کان دەبێت سەرەتا لە گرفتە کۆمەڵایەتیەکانەوە دەست پێبکەین, چونکە وەک ئاشکرایە هێندەی لە سەرجەم کارە جۆراوجۆرەکاندا گرفت بۆ بەردەم ژن دروست دەبێت ئەوەندە بۆ پیاو دروست نابێت, ئالێرەوە دەکرێت باس لە بنەماکانی بەردەم ئەم شێوازە گرفتە بکەین.
ژن لە کاری مێدیادا پەیوەستە بە کۆمەڵێک داب و نەریتی کۆمەڵایەتی کە بووەتە هۆی هەڵویستە کردن لە بەردەوام بوونی کارەکەی وەک ڕەگەزی بەرامبەری,دەبینین کە ژن بە هۆی ئەو پەستانە دەرونیەوی کە لەلایەن خێزانەوە لەسەریەتی کاریگەری نەرێنی لەسەر تواناکانی دروست دەکات, ئەمە لەکاتێکدایە کە هەمان ئەو ژنە ئەگەر ڕێگرییە کۆمەڵایەتی و خێزانیەکان لەبەردەمی لەمپەڕنەبن بێگومان لەبواری بڕیاردان لە دەزگاکانی ڕاگەیاندت هیچی لە هاوڕێ پیاوەکەی کەمتر نابێت, ئەم گرفتانە لە کاتێکدا ڕودودەن کە ئەمڕۆ لەبواری خوێندنی ئەکادیمی بەشەکانی مێدیا لە زانکۆو پەیمانگاکان ڕێژەیەکی بەرچاو لە خوێندکاری کچ بونی هەیە,بەڵام ئایا دەکرێت لە گەڵ ئەو ڕێژەیەدا ژنی بڕیاربەدەستمان لە دەزگاکانی ڕاگەیاندن وەک پێویست هەبێت؟بێگومان نەخێر نە هەمانە و نە لە چەند ساڵی داهاتووی نزیکیش دەمانبێت,ڕەنگە لەم وەلامە بەڕەشبینم تێبگەن,بەڵام ئەمە واقیعە کۆمەڵایەتیەکەیە کە ژن بەگشتی پێوەی دەناڵێنێت ,شاهیدیش بۆ قسەکانم نەبونی ژنە لە ناوەندی بڕیار دەزگا مێدیاییەکان.
هەرچەندە ڕێژەیەک ژن لە مێدیاکان کاردەکەن ,بەڵام ئیستا کاری میدیایی بۆ ژن بەتایبەتی خۆی لە کاریکی وەزیفیدا دەبینێتەوە نەک لە کارێکی میهەنی ,چونکە کۆمەڵگە ڕێگە نادات بە ژن تا درەنگانێکی شە و وتا بەرەبەیانی کاری خۆی بکات لە دەزگاکەی یاخود هەندێک جار واپێویست دەکات سەفەر بکات یاخود پەیوەندیەکانی کارەکەی لە دەرەوەی دەزگاکە جێبەجێبکات,کەواتە کاری ئەو تەنها لەناو ئۆفیسەکەی قەتیسکراوە.
هۆکاری دووە م دەزگاکانی ڕاگەیاندنە ,کە خۆی لە دەستەڵاتی پیاودا دەبینێتەوە ,کەبێگومان ئەمیش دەگەڕێتەوە بۆ هۆکارەکۆمەڵایەتیەکەی باسمانکرد, لێرەدا وەک دەردەکەوێت کە ژن خۆی هەموو تواناکانی لەکاراکتەرێکی وەزیفیدا چڕدەکاتەوە, جگە لەمانەش دەزگاکانی ڕاگەیاندن ژنە مێدیاکارەکان بەدووردەگرن لە ناو دەزگاکانیان بە بیانوی ئەوەی کە مەتبەخی مێدیا کارەکانی لە نێوەشەوەوە دەست پێدەکات و ژن ناتوانێت تا ئەوکاتە بمێنێتەوە,لەکاتێکدا ئەمڕۆ تەکنەلۆژیا گەشتۆتە ئاستێک ئەگەر ژن لە ناوەندی بڕیاربەدەست بێت دەتوانێت لە ناو خێزا ن وماڵە کەی خۆیەوە کارەکانی ئەنجامبدات بەبێ مانەوەی لە دەزگاکە تا درەنگانی شەو.
کاتی دانانی ژن لە ناوەندی بڕیاری دەزگای مێدیاکان زیاتر سیاسییە و ئالێرەوە ژن تیایدا کەناردەخرێت ,هەروەک ئەوەی کە لە حکومەتدا کاتێک ڕاوێژکارێکی مێدیایی داداەنێن پەنا بۆ پیاوێک دەبەن.
هۆکاری سێهەم بێگومان ژنانی مێدیاکار خۆیانن , پێویست ناکات کە خۆمان لە کەم و کوڕیەکان بشارینەوە کە ژنیش خۆی بەشێکە لەو پەراوێزخستنە, زۆرجار نەیتوانیوە بەرگەی ململانێکان بگرێت تا بە ئامانجی خۆی بگات, تەنها کاری مێدیایی لە سەعاتێکی دیاری کراوی دەوام و کۆتایی دەوام دەبینێت ,کە ئاشکرایە کاری مێدیا وەخت و ناوەختی نیە.
زۆر کات ژنان خۆیان بە بوارە کۆمەڵایەتیەکانی کۆمەڵگەوە دەبەستنەوە وتەنها کار و چاڵاکیەکانیان لەو بوارە چڕدەکەنەوە و کەمتر خۆیان لە لایەنە سیاسیە کان دەدەن , کە بێگومان بواری مێدیای سیاسی زۆرترین ناوبانگ دروست دەکات.
دەکرێت چۆن گرفتەکان دەستنیشان دەکەین بەهەمان شێوەش چارەسەرەکان بخەینە ڕوو کە پێویست دەکات دەزگاکانی ڕاگەیاندن بە بەرنامەی کاری خۆیاندا بچنەوە و هەلی بەشداری لەبڕیاری مێدیایی دەزگاکەدا ژنە مێدیاکارەکانیان لەو پەراوێزخستنە بێننەدەرەوە.
دەکرێت سوود لە بەکارهێنانی تەکنەلۆژیابوەربگیرێت تا ئەو ژنانە لە ناو خێزان و ماڵەکانی خۆیانەوە کارەکانیان ئەنجامبدەن.
دەکرێت ژنە مێدیاکارەکان لە دەزگاکانیان بە ڕەو بواری سیاسی هانبدە ن و تەنها لە بوارە کۆمەڵایەتیەکان قەتیسیان نەکەن.
ڕەچاوکردنی یەکسانی نێوان هەردوو ڕەگەز لە دابەشکردنی کارە مێدیاییەکان.
لەسەر و ئەمانەشەوە پێویستە ڕیکخراوەکانی ژنان و کۆمەڵگەی مەدەنی کاریگەریان هەبێت لەسەر شکاندنی ئەو کۆت و بەندەی لەڕێگەی کۆمەڵگاوە بوەتەهۆی کەنارگیری ژنان بەگشتی تابتوانرێت لە داهاتودا نەوەیەکی یەکسانی خواز پەروەردەبکرێت[1].
24-06-2019