[1]

ساڵى تازەى زایینى (2024) له خانەوادەى سەربەرزى شەهیدان، پێشمەرگە قارەمانەکان، هێزەکانى ناوخۆ و تەواوى کوردستانییان بە هەموو پێکهاتەکانییەوە لە هەر کوێ بن، لە گەلانى عێراق و جیهان بەگشتى پیرۆز دەکەم. هیواى ساڵێکى پڕ لە ئارامى و خۆشى و سەرکەوتن بۆ هەمووان دەخوازم.
بەهۆى لێکەوتەکانى دۆخى سیاسى، ئەمنى، ئابوورى و کێشە و قەیرانەکانەوە‌ لە ناوچەکە و عێراق و هەرێمى کوردستان، ساڵێکى سەختمان بەڕێکرد کە تیایدا ڕووبەڕووى چەندین مەترسى و ئاڵنگارى بووینەوە.
ناتەبایى و ناکۆکیى سیاسیى ناوخۆ، ڕەنگدانەوەى خراپى بەسەر توانا و پێگەى کوردستانەوە لە عێراق و دەرەوە هەبوو. بووە هۆى ئەوەى هەرێمى کوردستان نەتوانێت وەک پێویست ماف و شایستە دەستوورییەکانى بەدەست بهێنێت. هەڵبژاردنى پەرلەمانى کوردستان دوا خرا، لە هەڵبژاردنى ئەنجومەنى پارێزگاکانیشدا لە ناوچەکانى مادەى (140) کاریگەرییە خراپەکانى، دیار بوون.

پێچەوانەى ڕێککەوتنە سیاسییەکان و دەستوور، وێڕاى هەموو گفتوگۆ و هەوڵ و پابەندییەک، زۆرێک لە ماف و شایستە دەستوورییەکانى هەرێمى کوردستان لە عێراق فەراهەم نەبوون. چەندین جار بە هێرش و پەلاماری درۆنی، هەڕەشە لە ئارامى و سەقامگیریى هەرێمى کوردستان کرا.
جێبەجێنەکردنی ڕێککەوتنە سیاسییەکان و نەناردنی شایستە و مافە دەستوورییەکانى هەرێمى کوردستان، جگە لە زیان هیچ سوودێکى دیکە بە عێراق ناگەیەنێت. لە عێراق و هەرێمى کوردستان دەبێ هەمووان بە گیانى بەرپرسیاریەتیى هاوبەش، بە یەکترقبووڵکردن و تەبایى، بە گفتوگۆ و لێکگەیشتن، کار بۆ چارەسەرکردنى کێشەکان و تێپەڕاندنى قەیرانەکان بکەین.
با لە ساڵى تازەدا‌ لە عێراق و هەرێمى کوردستان، پەند و وانە لە ڕابردوو وەرگرین و پێکەوە بەره و داهاتوویەکى باشتر و سەقامگیر و ئاسوودە هەنگاو بنێین. با قەیران و ئاڵنگارییەکان بکەینە دەرفەت و بەرژەوەندیى گەل و نیشتمان، ئامانج و کۆکەرەوەى هەمووان بێت. عێراق بە پێکهاتەکانییەوە بەهێز و دەوڵەمەندە و تەنیا بە تەبایى و پێکەوەیی، هەمووان براوەن.
لەم بۆنەیەدا دووپاتى دەکەینەوە کە هەرێمى کوردستان لەگەڵ وڵاتانى دراوسێ و ناوچەکە و جیهاندا، لەسەر بنەماى ڕێزلەیەکگرتن و بەرژەوەندیى هاوبەش، بره و بە پەیوەندییەکانى دەدات. وەک هەمیشە بە فاکتەرى ئارامى و سەقامگیرى و بە هاوبەشێکى‌ کاراى کۆمەڵگەى نێودەوڵەتى و زێدى فرەیى و پێکەوەژیان دەمێنێتەوە. ‌[1]

=KTML_Bold=بە هیوا و ئومێدەوە لە داهاتوو دەڕوانین و ساڵى نوێ لە هەمووان پیرۆز بێت.=KTML_End=

#نێچیرڤان بارزانى#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

مەکتەبی سیاسیی #پارتی دیموکراتی کوردستان#، بەبۆنەی ھاتنی ساڵی تازە، پیرۆزبایی لە ھاووڵاتیانی خۆشەویستی کوردستان دەکات، ھەر بەم بۆنەشەوە مەکتەبی سیاسی پارتی داوا لە گشت ھێز و لایەنە سیاسییەکانی ھەرێمی کوردستان دەکات کە پێویستە بەرژەوەندیە باڵا نەتەوەیی و نیشتیمانیەکان لەسەرووی ھەموو شتێکەوەبێت و یەکڕیزی و یەکدەنگی گەلی کورد بپارێزن.

=KTML_Bold=دەقی پەیامەکەی مەکتەبی سیاسیی پارتی دیموکراتی کوردستان:=KTML_End=
بە بۆنەی ھاتنەوەی سەری ساڵی نوێی زایینی، گەرمترین پیرۆزبایی لە ھاووڵاتیانی ھێژا و خۆشەویستی کوردستان لە ناوەوە و دەرەوەی ھەرێم دەکەین، پیرۆزباییەکی گەرم لە بنەماڵە و کەسوکاری سەربەرزی شەھیدان و ھێزی پێشمەرگەی کوردستان و ھێزەکانی ئاسایش و پۆلیس و، سەرجەم کادیر و ئەندام و لایەنگرانی دڵسۆز و خۆڕاگری پارتیمان دەکەین و، ھیوای ساڵێکی ئاسوودە و ئارام و پڕ دەستکەوت بۆ ھەموو لایەک دەخوازین.
ئەمڕۆ #31-12-2023# ھەرێمی کوردستان و ناوچەکە بە ھۆی شەڕ و ناسەقامگیریی و ململانێ ھەرێمایەتی و نێودەوڵەتییەکان بە بارودۆخێکی ھەستیار و نەخوازراودا ڕەت دەبێ، بۆیە پێویستە ھەموو لایەک بەوپەڕی بەرپرسیارەتییەوە کاربکەین بۆ پاراستنی ئەزموون و قەوارەی ھەرێمی کوردستان و دەستەبەرکردنی ڕەوشێکی سەقامگیر و ئارام.

لە لایەکی دیکەوە، سەبارەت بە ھەڵبژاردنی ئەنجوومەنی پارێزگاکانی عێراق ھەروەکو ڕامانگەیاندووە، سەرەڕای ھەبوونی تێبینی بەڵام لەگەڵ ئەوەشدا ئامادەییمان دەربڕیوە بۆ دیالۆگ و ڕاگۆڕینەوە بۆ پێکھێنانی حکوومەتە خۆجێیەکانی پارێزگاکان لەسەر بنەمای شەراکەت و جێبەجێکردنی ڕێککەوتننامە سیاسییەکان و ئاساییکردنەوەی بارودۆخی ئەو ناوچانەی کە پێشتر ڕێککەوتنیان لەبارەوە کراوە لەپێناو دابینکردنی ئاسوودەیی و خزمەتگوزاری بۆ ھاووڵاتییانی ئەو شار و شارۆچکە و ناوچانە بەبێ جیاوازی.
ئێمە لە پارتی دیموکراتی کوردستان بۆ ساڵی تازە و، وەک ھەمیشەیش جەخت لەسەر گرتنەبەری ڕێگای گفتوگۆ و دانوستاندن دەکەینەوە لەگەڵ حکوومەتی عێراقی فیدڕاڵ بۆ چارەسەرکردنی کێشە ھەڵواسراوەکان و بابەتە پەیوەندیدارەکان بە شایستە داراییەکان و مووچە و بوودجەی ھەرێمی کوردستان و، سەرجەم ماف و ئیستیحقاقە یاسایی و دەستوورییەکانی گەلەکەمان.

بە بۆنەی ساڵی تازەوە، دووپاتی دەکەینەوە کە پاراستنی قەوارەی سیاسی و یاسایی ھەرێمی کوردستان و دەستکەوتەکانی گەلەکەمان بە ئەرکی لە پێشینەی خۆمان دەزانین و لە ڕۆشنایی ئەو بڕیار و باوەڕە نەگۆڕەشمانەوە داوا لە گشت ھێز و لایەنە سیاسییەکانی ھەرێمی کوردستان دەکەین پێویستە بەرژەوەندیە باڵا نەتەوەیی و نیشتیمانیەکانمان لەسەرووی ھەموو شتێکەوەبێت و یەکڕیزی و یەکدەنگی گەلەکەمان بپارێزین و پرەنسیپە ڕاستەقینەکانی ھاوپەیمانییەتی پتەوتر بکەین بۆ باشترکردنی بارودۆخی گوزەران و بژێوی ھاووڵاتییان و پاراستنی ئاسایشی کۆمەڵایەتی و سەقامگیری وڵاتەکەمان.
ئومێدەوارین ساڵی 2024 ساڵێکی موژدە بەخش بێت و، ساڵی کۆتایی ھاتنی قەیران و گیروگرفتەکان و ساڵی بەختەوەری و بەھێزترکردنی ئاشتەوایی و لێبووردەیی نێوان گشت پێکھاتەکان بێت. [1]

مەکتەبی سیاسیی پارتی دیموکراتی کوردستان
#31-12-2023#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

ئەمڕۆ یەکشەممە #31-12-2023#، سەرۆکی #حکومەتی هەرێمی کوردستان# پەیامێکی بەبۆنەی سەری ساڵی نوێوە بڵاو کردەوە و ڕایگەیاند، هیوادارم ساڵی نوێ، ساڵی خێر و خۆشی و خۆشگوزەرانی و پێشکەوتنی زیاتری کوردستان بێت.
#مەسرور بارزانی#، سەرۆکی حکوومەتی هەرێمی کوردستان، لە پەیامەکەیدا ئەوەشی خستووەتە ڕوو، هیوادارین لە ساڵی نوێوە، کۆتایی بەو ستەم و نادادییە بێت کە بەرامبەر خەڵکی هەرێمی کوردستان و بەتایبەتی مووچەخۆرەکانی دەکرێت و کێشەی شایستە داراییەکانی هەرێم، بە شێوەیەکی دادپەروەرانە و لە چوارچێوەی ڕێککەوتنەکان و یاسای بودجە چارەسەر بکرێت.

=KTML_Bold=ئەمەی خوارەوە دەقی پەیامەکەی سەرۆکی حکوومەتی هەرێمی کوردستانە:=KTML_End=
بە بۆنەی هاتنی ساڵی نوێی زایینی 2024، گەرمترین پیرۆزبایی لە سەرجەم کوردستانییان، بە تایبەتی پێشمەرگە قارەمانەکان و هێزەکانی ئاسایشی ناوخۆ و بنەماڵە و کەسوکاری سەربەرزی شەهیدان و هەروەها گەلانی عێراق و جیهان دەکەم، هیوادارم ساڵی نوێ، ساڵی خێر و خۆشی و خۆشگوزەرانی و پێشکەوتنی زیاتری کوردستان بێت.
سوپاسی خۆڕاگری هاونیشتمانییانی هەرێمی کوردستان دەکەم کە ساڵی ڕابردوو، بەهۆی نەناردنی مووچە و شایستە داراییەکانی هەرێم لەلایەن حکوومەتی فیدراڵەوە، بارودۆخێکی سەختی داراییمان بەڕێکرد، هیوادارین لە ساڵی نوێوە، کۆتایی بەو ستەم و نادادییە بێت کە بەرامبەر خەڵکی هەرێمی کوردستان و بەتایبەتی مووچەخۆرەکانی دەکرێت و کێشەی شایستە داراییەکانی هەرێم، بە شێوەیەکی دادپەروەرانە و لە چوارچێوەی ڕێککەوتنەکان و یاسای بودجە چارەسەر بکرێت و مووچەخۆرانی هەرێمیش، وەک مووچەخۆرانی ناوچەکانی دیکەی عێراق، مانگانە مووچەکانیان بەبێ تێکەڵکردنی لەگەڵ کێشە سیاسییەکان وەربگرن.

داوا لە هێز و لایەنە سیاسیەکانی هەرێمی کوردستان دەکەم کە بەرژەوەندییە باڵاکانی هەرێمی کوردستان بخەنە سەرووی بەرژەوەندییە حزبیی و کەسییەکان و لە پێناو پاراستنی ئارامی و مافە ڕەواکانی خەڵکی هەرێمی کوردستان کار بکەن.
جێی خۆشحاڵییە کە ساڵی ڕابردوو، سەرەڕای بارودۆخی سەختی ئابووری، توانیمان بە هاوکاری کەرتی تایبەت، چەند پڕۆژەیەکی خزمەتگوزاری لە شار و ناوچەکانی هەرێمی کوردستان لە بوارە جۆراوجۆرەکاندا ئەنجام بدەین، هەروەها لە بواری دیپلوماسیش، پەیوەندییەکانی هەرێمی کوردستان و وڵاتانی جیهان، لە ساڵی ڕابردوودا گەشەیەکی باشی کرد.
هیوادارم ساڵی نوێ، ساڵی کۆتاییهاتنی شەڕ و ئاڵۆزی و کاولکارییەکانی ڕۆژهەڵاتی ناوەڕاست و هەموو جیهان بێت بەگشتی و ئاشتی و ئارامی جێگیر بێت و ساڵی دەستکەوت و گەشەپێدان و بووژانەوەی گشتگیریی کوردستان بێت. [1]

=KTML_Bold=ساڵی نوێ لە هەمووان پیرۆز بێت.=KTML_End=
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=

=KTML_Bold=مەکتەبی سیاسیی #پارتی دیموکراتی کوردستان#، پرسەنامەیەکی ئاراستەی خانەوادەی خوالێخۆشبوو خاتوو (هەمین حەسەن فەتاح) کرد.=KTML_End=

=KTML_Bold=ئەمەی خوارەوە دەقەکەیەتی:=KTML_End=
بەڕێزان/ خانەوادەی خوالێخۆشبوو خاتوو (هەمین حەسەن فەتاح)
بە داخ و پەژارەیەکی زۆرەوە هەواڵی کۆچی دوایی خاتوو (هەمین حەسەن فەتاح) مان بیست، بە خەمناکییەوە پرسە و سەرەخۆشی خۆمان ئاڕاستەی ئێوە و کەسوکار و بنەماڵە بەڕێزەکەتان دەکەین، خۆمان بەهاوبەشی خەمتان دەزانین.
ئومێدەوارین دڵنەوایی و هاوخەمی دۆست و ئازیزانتان ببێتە مایەی سەبووری و ئارامگرتنتان و لە خەم و نیگەرانیتان کەم بکاتەوە و لە خوای گەورەش داواکارین خوالێخۆشبوو بە بەهەشتی بەرین شاد بکات و ئێوەش لە کۆستی دیکە بە دوور بگرێت. [1]

مەکتەبی سیاسیی پارتی دیموکراتی کوردستان
#31-12-2023#
=KTML_Bold=تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!=KTML_End=