چاشتەو خاڎمی
هۊرگېڵنای پەی سەرو زوانی هۆرامی: #ئەسعەد ڕەشید#
بەشەی دوەسەڎ و یاڼزەهەمە
تووشو یاو و لەرزێ قورسی ئامانې؛ حەواڵەو نەوەشخانەیشان کەردان. ژەنێ دکتۊرې ئاما سەرم، ماچۊ: تۊ یاگێ پەڕ مەلاریانە ئامانی دنیا؛ هەرگا یاوای یاگێ ئاو وهەواش پېسە ئا یاگېتە بۊ، مەژیوۊوەو سەرهۊرمڎۊوە، منیچ کاتێ جە لینینگراد دیلە بېنا پاسەم سەرئاما. دەرمانش پەی نویستا و گېڵانێ پەی یاگې وېم. تاوەو یاوینە مەناڵنېنا، زەبیحی دۊشەکەکەش فش کەردەبېناوە، کۆتا سەرو زەمینی، ئاڎیچ چا کاتەنە هۊکو گەمەیش هۊرستەبې!
کناچێ باریکەلې گەنم ڕەنگەی ئەڵمانییە، کە نامېش (زگریتا) بې، میانمانە هۊرگېڵنی مەکەرې، فەڕەنسی و ئینگلیسی و ئیسپانی مەزانې. ئڼە ڕۊح سوکە و دەس و بردە بې فرە وەشەما مەسیې. گرڎ ڕوێ تەلەفون پەی پڕاگی مەکەرېنمې. واتشان جە مۆسکۆ مەلا مستەفا بارزانیچ ئینا حۆلېنە پەیمان؛ بەڵام وەختو ڤیستیڤاڵی سەرشیەبې. ئېمە هەر جە بەرلین مەنیمێ، زەبیحی فېرە شەترەنجش کەردا و وەختش پەنە مەویەرنېنمې.
دیڎەبېم کە چایی جە ئۆروپا کەمەن و چایی زەردیچ (کەم ڕەنگ) مەوەراوە. قۊریێم پەنەبې، پەی وېما چایی ئېراقی مەنیېنمې سەر. چایی مەکەرېنا چاڎان و مەبەرېناش ئاوی گریێ مەکەرېنې سەرشەرە. ڕوێشا کە یاوم هورستەبې، واتم: کاکە تۊ لوە ئاوی گریێ وەربگېرە.
ماچۊ مەلا من نمەزانو بواچو چېش؟
واتم: زوانش گەرەک نییەن، کتریە سەرو غازەکەیۆ مەگریۊ، چەنەش پەڕ بکەرە.
ئاماوە ماچۊ: نمەڎام پەنە!
کەردم قۊریېرەو لوانې پەی حۆشې، پیرەژەنێ قڼگ زلە ویەردە، غارم دا، دەسێم ماڵا شانەشەرە، واتم: (شڵخن پڵخن، ئاوی گریێخن)!). چەنەش وەرگېرتاو پەیش پەڕ کەردا.
لاوێ عەرەبی ئېراقی بە نامې (فالح غەڼام) کە ئەجېم ئاڎیچ پېسە (سەلیم شاهین)ی، هەر پەی لەم لەوەڕنای مەگېڵې، ئاما پەی لایمان و بییەیمې بە یەرې کەسې دلې هۊڎەکەینە. دانشجۊ ئەندازەو باڵەخانەی بې، ڕوانە تەماشەو سمېڵاش مەکەرېنمې و پەنەش مەواچېنمې:
لاسمېڵی چەپت جە هینو ڕاسیت کوڵ تەرەن!
واتما بە ڕاسی موهەندیسێوە شارەزانی!
ئەقیڎێ فرەش بە زانایی زەبیحی بې، جارێشا ئەو منش پەرسا، ماچۊ: مامۊسا دلې کام دانشگاینە بەرشییەن؟
منیچ واتم: دانشگاو (ترکەشی)
ماچۊ: بەڵې بەڵې، بەخوڎا دانشگایێ عالەن!
خۊ نەکریې بواچۊ ترکەشم نەژنیەن!
پەردێوە دلې هۊڎێوەنە هۊرواسیابې؛ سەرەمان گېرت پۊرە، فالح غەڼام دەسش دلېگەڵاو زگریتاینە بې، دەمیچشان نیابې دلې دەمو یۊترینی. فالح ئامابې بەر قەسەمې مەوەرۊن ئی کناچې شوېعیەنەو فرە دامنە پاکەنە؛ خیاڵې خرابې نمەکەردې!
ئېمەیچ واتمان: نا نا، کاک فالح! مەزانمې گەرەکت بې هېڵېش چەنە بەرباری؛ ئڼا ویرێ تەرتان نەبې!
کابرێوە کوڵەباڵای مل کوڵی ئېرانی ئاما پەی دیڎەنیمان، ماچۊ:
من ئاغای یەزیدینا. ژەنێ ئەڵمانیەم ئاردېنە؛ ماروش بوینۊتان.
ئېمەیچ واتمان: لازم نمەکەرۊ، خوڎا پېوەرە بازۊتان!
ماچۊ: بەخوڎا هەر مارووش!
ژەنێ شڵەی چەرمەڵې، چەمېش وەرو وەرەتاویۆ هۊرنمەیا؛ قاچ باریکە، زاییفە، ئاما و دەسش نییا دلې دەسیما.
منیچ واتم: ئاغای یەزیدی کەست دەس نەکۆت ئا تانجییە ڕووتی نەبۊ؟
ماچۊ: توخوڎا سەرو وې قسې بکەرە! ژەنەکېم کوچێ فارسی میاوۊنە!
هەرکە لوایمې وانگاکە، دواڼزە مارکې ئەڵمانی غەربیمان مەنەبې. بە قیتار لوانې بەرلینی غەربی، فاڕامۆ بە چل و هەشت مارکې شەرقی و قاچاخیێ فرە عال بې. ئانەیچ (زگریتا)ی فېر کەردا؛ دیاربې کۊنە کارەنە!
بەشێ جە کتېبو چێشتی مجێور، نویستەی #هەژار موکریانی#، هورگېڵنای پەی سەرو زوانی هۆرامی: #ئەسعەد ڕەشید# [1]