چاشتەو خاڎمی
هۊرگېڵنای پەی سەرو زوانی هۆرامی: #ئەسعەد ڕەشید#
بەشەی دوەسەڎ و دەهەمە
منیچ واتم: ها، زەبیحی! دەی ئەگەر مەردەنی بقۊزە! زوانشڕییەکەو من پاڼزە مارکېش ئاردێ، خاسم نەکەرد!؟
سەرنام: جە بەرلینی شەرقی
قیتار ئاما، وېما خزنانە. حۊل حۊلێ لوایمې دلې وانگۊنێ پەڕ جە زارۊڵە وردا نیشتیمېرە. ژەنێ دەرەجەدارە، کەمەر قاییمە، دەم و چەم تشیێ، قیتە قیت ئاما چوەر. پاسە نەڕناش بڕوا نمەکەرو هیچ مارشاڵێ هیتلەری پاسە نەڕنابۊش. دیاربې مەواچې: شمەی زەلامې چەنی ئامێندې دلې ئی واگۆنو زاروڵڵا؟!
باۋڵ هۊربگېرەو بڕەمە پەی دلې واگۆنو پیایا. دلې قیتارەکەینە مەڎیېنمې پەی دەر و دەشتی: سەڎان کناچې ناسکې پېسە پەلې ولە ناسکا، قاچېشان تاکو نزیک ڕاناشان هۊرکەردېنې، قۊڵې ڕووتې، کرېکاری قیرەو جادەیشان پەنە مەکەران، واتم: سینەم خان تەماشا بکەرە! فرەتان وات یەکسانی میانو ژەن و پیای، خوڎا کەریمەن ئەپاسە بوینوتۆ!
دلې ئېزگەو بەرلینی شەرقینە وەستیمېرە. باۋڵ بە نېخە نېخ هۊربگېرەو لوە. سڼۊقە پۊستەکەیچ نییەن بنیەیمېشارە. دەمو مێڎانێنە سەرو زەمینیۆ مدرایمې. کەس نییەن بېجگە جە ئەڵمانی بزانۊن، ژەنێم دیڎە گەنجە بې؛ ناشیرینە نەبې؛ بەڵام بروېش تاشێبېنې، بە قەڵەمی کەوە بروېش پەی وېش وەشې کەردېبېنې؛ چېوێم وات، لچێش هۊرقرچناو لوا.
واتم ئەی ڕاسە نەبیۆ، چن بە دەعیېنە!
دەی مەشۊم چېش بکەرمېن؟ مۊرەو لاوانو جەهانیم سەرو ڕۊنامێوە پەل گولانەیۆ دیڎە؛ دەسو زاروڵێوە بې و مەگېڵنېش. دیڎمۆ! ئا ڕۊنامە چکۊ بۊ، لاوې ئینێ چاگە، با بلمېن، کوڕەمان یاونانە؛ گېڵاوە، دمای هەشت نۊ هەنگاما بە دەس نیشانەش دایمې.
واتشان: وەش ئامایدې! باۋڵەکاتان بە ئەمانەت بنیەیدېرە.
واتمان چکۊ؟
واتشان ئەچا ساڵۊنەنە.
یەک ئەفسەری دەرەجە سەرهەنگی پیری لەرزن سەرو ئەمانەتەکانو قیتاریرە مەڕەمۊ، بە ڕووسیێ قسې مەکەرۊن ماچی زوانش بە دۊخەوای گەرم سۊتەن! زەبیحی ماچۊ: لاچاندې، من بە ڕووسی مەدۊنووش. هەڵای چوار کەلیمېش نەواتەبې، ماچۊ: مەلا! ڕووسیەکەم تەمامیا! سینەمې بچڕە!
نیم سەعات زیاتەرش خواینا تاکو باۋلې تەحویلې کریێ و ڕەسیدمان وەرگېرت. گەنجێ کۆت وەڵېمان! بەردیمېش پەی هۊڎێ سەرو ئیدارەو ڕۊنامەکەی.
تەلەفونمان پەی قاسملۊی کەرد، ئەلو کاکە قاسملۊ! یاوایمې بەرلین، دەی چېش بکەرمېن؟
قسې درېژەشا کېشت، واتم بڎەیدېش بە من، واتم: برا، هیچ کەری، هیچ مەکەری، قیر بە قەرەس! تۊ بواچە نانمان پەنە بڎان، ئاورامانەو یاگیمان پەی بنیارە چەنەش مەنمێ.
قاسملۊ ماچۊ: تەلەفونەکەی بڎە بەیۊ جە ساحېب یاگەکەیتان.
دمای تۊزێ واتە واتی و (شڵیختن پڵیختن) کابرا تەلەفونەکەش نیارەو ماچۊ فەرماودې.
واتم: ئەی خوڎا ساحېب فەرماوەت بکەرۊن!
لوایمې پەی ڕېستۊرانێ، بې تۊ ناوەش، گۊشتو بەرازی سوورۆکریا، لیکاوەو بابە غەلیفەی مەلیکنې! بە هەڵپە پەلامارەمان دا، پېشەکېچمان کڕناوە! مڕې بیەیمې، نیایمېشان دلې ماشینی. بەردیمېشا پەی وانگێوە بە نامې (شلێمان شولە)، سەرو جادەو نمەزانو کۊگەی بې.
سینەمە لاو ژەناوە، ئېمەیچ دوو بە دوو دلې هۊڎێوە درېژی، سەرو دۊشەکێ و سەرینگێوە لاسېقینە و دوې بەتانیېشان پەنە دایمې. ساعبەنە هېڵێ گریا و گۊشت بەراز؛ کە بلمې ڕېستۊرانتەنە نۊشوو گیانیش بکەرمېن. داواو ئاوېما بکەردێ نەبې؛ واچېنې لەمەتا ژانی کەرۊ؛ بیرە بوەردێ. بە دزی ئاڎیشاوە مەلېنا دەسشۊرەکەنە ئاوی مەوەرېناوە. ڕەفېقەکېچم فېرې کەردې؛ دیڎشا لەمەشا ژانیش نەکەردە.
بەشێ جە کتېبو چێشتی مجێور، نویستەی #هەژار موکریانی#، هورگېڵنای پەی سەرو زوانی هۆرامی: #ئەسعەد ڕەشید#. [1]