چاشتەو خاڎمی
هورگېڵنای و ئاماڎەکەرڎەی: #ئەسعەد ڕەشید#
بەشەی سەڎ و هەشتا و پەڼجەمە
واتم: ئەی حېزبو پارتی و دواڼزە دیناری؟!
ماچۊ: پارتی چېشی و دینارو چېشی؟! تەنانەت نەزانانشا ئینایمې چکۊ و چېشمان سەرئامان! ئەچی ساڵېنە، وردە وردەی دلېیانەمان ورەتەن و ژیوایێ مەمرەو مەژیوای و کولەمەرگیمان گوزەرنان و ئاڼەمان مەنەن کە ئاردەنمان.
دلې دەگاو (تربەسپی) کە نیمچە شارەکڵێ بې، هۊڎێمان دلې یانە کلدانیێنە بەکرې گېرت و حەسیرمان دلېنە یاوارەو دیسان جەمې بییەیمێ. مستەفا کە ئاما پەی سووریای تەمەنش دوەساڵە بې، تاکو فەترێ فرە نامې مامۊ محەمەڎ و ئەڎاو کەریمیش هەر سەرو زوانیۆ بې. محەممەڎی کوڕم، کە جە سابڵاخۆ ئاما یانەنە دەرسش پەنە واچېنا، پاییزو ساڵې دمایینې بەردما پەی وانگای. ئەزموویان دلې پۊلو یەرەمو سەرەتایینە قبووڵ کریا، کە ئاما سووریا، کلاسو چوارینە مەرزیارە و ساڵەی دمایینە پۊلو پەڼجیش تەمامنا، کە جیاتی پەڼج و ششی ئېراقی بې.
یانەکەمان فرە ڕووت بې، هەر حەسیرش دلېنە یاویابېرە. جۊڵێوەمان ئېستۆ کە جلە کۊنېش پەی شی بکەرمېوە و بە لەتەرې پەیش وابڎەیمې، مەترێ بە لیرێ سووری مەتەنۊش. کۊنە پاڵتاو و گجی و هەر جلە کۊنێمان ئامێ وەردەس باریک باریک پەیش مەدڕېنمېرەو مەبەرېنمېش پەی جۊڵای و ئاڎیچ دوې نمەڎېما پەی مەتەنې.
سەکوێ دۆراندۆر دلې هۊڎەکەیمانە بې، سەرو سەکۊکەیۆ یاوێمەرە، واتم: یاگې مېمانینە، یاگې گۆرەکانە، بەڵام ئانەی گول بې کە داوەکا ئەشناسېنمێ، ئانە داوەو پانتۊڵەکا وېمەنە، ئانە هینەو گجیەکەو تۊن.
نانو خەلەی و پېخۊر ساوەرەن، مەعسوومە قۊڵېش هورماڵێ و بە تەنوورە نانش کەرد. هەرگیز چاگە ئاورێ نەبېنمې. یانە حاجۆ خەلەمان پەی ئې، ئاڎې وېشا بەبې ئانەی ئېمە بزانمېن بە زەکات حسابش کەرېنې. شەوېنە پېسە تەمامو خەڵکو دەگێ لوېنا پەی دیوەخانو ئاغای. چەقە و هەراو دەگانشینا، قسې قۊڕې و بې مانێ. هەرچی نەواچیابې مەژنەوېنیش. ئەوەڵۆ مەرەجیېم ئاغا پېسە ئانېشا موکریانینې، بەڵام خراب یاوابېنانە، یانە حاجۆ ڕەئیسې خېڵو هەوێرکانی بېنې کە گۆرەتەرین خېڵو دۆرو سعێرت و میدیادنینې. بەشێ فرە چەنی حاجۆ ئاغای چڼگې تورکانە ڕەمێنې و دلې جزیرەو (ئیبن عومەر) میانو دیجلە و فوڕاتینە گېریێبېنێ. دێمەکار و دەشتەی فرېشان دێبېنې؛ چن دەگێوەشان ئاوەڎانې کەردېبېنێ و دلېشانە نیشتەجایې بیېبېنې. بەشێ هەرەفرېشان ئینێ تورکیا، گردشان موسوڵمانې نییەنې؛ یەزیدیې هەوێرکیچ فرېنې.
سەرنام: حاجۆئاغا و بنەیانەکەش
حاجۆئاغا، شۆڕشو شېخ سەعیدی پیرانینە بېتەرەف بییەن و کەمێچ یاردی ترکانیش دان، بەڵام تورکیا دمای مەڕیای ژڵېوەو شېخ سەعیدی و یاوەرەکاش، گېڵان دلې ناوچەو ئاغایانو کوردیرە، فرېشانش چەنە قەنارە دێنې، بەشێ فرەیچشانش کۊچی زۊرەملې پەنەکەردېنې. حاجۆ ئاغای بېتەرەفیچ گېریان و دلې زیڼانو نوسەیبینیشان خزنان. داڎگاو ترکا واتەن: تۊ یەزیدی و شەیتان مەپەرەسی!
ئاڎیچی واتەن: نەخێر موسوڵمانەنا و دنیا ئانەیە مزانۊ.
ئاڎیشایچ واتەن: دەی گەر یەزیدی نییەنی نەحلەت بکەرە شەیتانی.
ئاڎیچی واتەن: نمەکەرو.
واتا، ئانە بەرمەگنۊ کە شەیتان پەرەسەنی.
ئاڎیچی واتەن: من نما مەکەرو، ئانەی شمە ماچدېش من دلې گرڎ ڕکاتێ نمایەکامەنە ماچوش، بەڵام پەی شمەیش نمەواچو.
یەزیدییە قۆمەکېش وەرشەنە لاڵیێنێ: بواچە لەحنەت جە شەیتانی با تۊمان چەنە نەلۊن.
ئاڎیچی واتەبې: نا کوڕم! هەرگیز گەرەکم نییەن سەرە پەی زاڵمی بنامنو، پەی چەمچێ ونې نمەلاڵیەوە. بەشێ جە کتېبو چێشتی مجێور، نویستەی هەژار موکریانی، هورگېڵنای پەی سەرو زوانی هۆرامی: ئەسعەد ڕەشید. [1]